រាជធានីភ្នំពេញ ៖ រថយន្តស៊េរីទំនើបមួយគ្រឿងបានបើកបរក្នុងល្បឿនលឿនរេចង្កូចពេញផ្លូ វនិងឡើងខឿនចិញ្ចើមផ្លូវបុកគម្របលូទឹកស្អុយទៅមុខលែងរួច បណ្តាលឲ្យអ្នកបើកបររងរបួសស្រាល ។
អ្វីដែលចាប់អារម្មណ៍បន្ទាប់ពីគ្រោះថ្នាក់អ្នកបើកបរបានយកតង់មកគ្របពីលើឲ្យជិតកុំឲ្យអ្នកសារព័ត៌មានថតផ្សាយ ។ ហេតុការណ៍គ្រោះថ្នាក់ចរាចរណ៍នោះបានកើតឡើង កាលពីវេលាម៉ោង១១និង៥៥នាទីថ្ងៃត្រង់ ថ្ងៃទី០៧ ខែកញ្ញា ឆ្នាំ២០១៨ ស្ថិតតាមបណ្តោយផ្លូវលេខ៥៩៨មុខ ភូមិគ្រឹះលោក ជា សុផារ៉ា ក្នុងភូមិទួលពពែ សង្កាត់ទួលសង្កែ២ ខណ្ឌឬស្សីកែវ ។
រថយន្តខាងលើស៊េរីទំនើបនោះម៉ាកហ្វើវ៉ារីពណ៌ក្រហម ពាក់ស្លាកលេខ ភ្នំពេញ 2AJ-7777 អ្នកបើបរមិនត្រូវបានស្គាល់អត្តសញ្ញាណនោះឡើយ ។
តាមព័ត៌មានឲ្យដឹងថា នៅមុនពេលកើតហេតុរថយន្តខាងលើ បើកដោយបុរសម្នាក់បានធ្វើដំណើរតាមបណ្តោយផ្លូវ៥៩៨ ទិសដៅពីជើងទៅត្បូង ខណៈមកដល់ចំណុចកើតហេតុក៏បានរេចង្កូតទៅស្តាំដៃក៏ជ្រុលទៅបុកគម្របលូដែលនៅអែបចិញ្ចើមផ្លូវតែម្តង ។ បន្ទាប់ពីកើតហេតុ ម្ចាស់ក៏បានយកតង់មកគ្របពីលើ និងរារាំងអ្នកកាសែតមិនឲ្យថត ។
ក្រោយពេលកើតហេតុសមត្ថកិច្ចប៉ុស្តិ៍ និងសមត្ថកិច្ចជំនាញបានមកដល់កន្លែងកើតហេតុពិនិត្យមើល ហើយម្ចាស់រថយន្តបានចេញមុខមកដោះស្រាយសងការខូចខាត់គម្របលូរបស់ លោកជា សុផារ៉ា ហើយស្ទចរថយន្តយកទៅជួសជុលខ្លួនឯង ៕
ចែករំលែកព័តមាននេះ