ទីក្រុងវ៉ាស៊ីនតោន ៖ យោងតាមទិន្នន័យរដ្ឋាភិបាលដែលបានចេញផ្សាយកាលពីថ្ងៃពុធបានឲ្យដឹងថា ឱនភាពពាណិជ្ជកម្មសហរដ្ឋអាមេរិកកាលពីខែកក្កដាបានកើនឡើង ខណៈការនាំចូលបានកើនឡើងដល់កម្រិតខ្ពស់ជាងគេ ។
ក្រសួងពាណិជ្ជកម្មបានឲ្យដឹងថា ព្រោះតែប្រទេសជាច្រើនបានដាក់ពន្ធឆ្លើយតបនឹងសហរដ្ឋអាមេរិក ការនាំចេញបានធ្លាក់ចុះយ៉ាងខ្លាំង ធ្វើឲ្យឱនភាពពាណិជ្ជកម្មជាមួយប្រទេសចិន កើនដល់កម្រិតខ្ពស់ជាងគេក្នុងប្រវត្តិសាស្ត្រ ។
លើសពីនេះទៀត ឱនភាពនេះអាចនឹងជំរុញឲ្យលោកប្រធានាធិបតី ដូណាល់ ត្រាំ (Donald Trump) ដាក់ពន្ធដ៏ខ្ពស់លើផលិតផលជាច្រើនក្នុងសប្តាហ៍នេះផងដែរ ។
ឱនភាពពាណិជ្ជកម្មសហរដ្ឋាមេរិកជាមួយនឹងសហភាពអឺរ៉ុប ក៏បានកើនឡើងដល់កម្រិតខ្ពស់ជាងគេដែរ ដែលកើតមានឡើងប៉ុន្មានថ្ងៃមុនពេលលោក Robert Lighthizer អ្នកតំណាងផ្នែកពាណិជ្ជកម្មអាមេរិក ជួបជាមួយនឹងភាគីខាងអឺរ៉ុបគឺលោកស្រី Cecilia Malstrom កាលពីថ្ងៃចន្ទ ដើម្បីកាត់បន្ថយភាពតានតឹងរវាងសេដ្ឋកិច្ចធំៗទាំងពីរ ។
យោងតាមរបាយការណ៍ដែលបានចេញមុនពេលសហរដ្ឋអាមេរិកនិងកាណាដា បន្តការចរចាលើកិច្ចព្រមព្រៀងពាណិជ្ជកម្មសេរីអាមេរិកខាងជើង បានឲ្យដឹងថា ឱនភាពពាណិជ្ជកម្មជាមួយនឹងកាណាដាបានកើនឡើងដែរ ។
ឱនភាពពាណិជ្ជកម្មអាមេរិក បានកើនច្រើនជាង៤ប៊ីលានដុល្លារទៅទៀតឬ៩,៥%មកស្មើសរុប៥០,១ប៊ីលានដុល្លារ ។
វាជាខែទីពីរជាប់ៗគ្នាមកហើយដែលសហរដ្ឋអាមេរិកមើលឃើញឱនភាពពាណិជ្ជកម្មកើនឡើង បន្ទាប់ពីការនាំចេញបានស្ទុះឡើងយ៉ាងលឿននៅខែឧសភា ៕
ចែករំលែកព័តមាននេះ