ទីក្រុងគូឡាឡាំពួរ ៖ ប្រទេសម៉ាឡេស៊ី បានព្រមព្រៀងជាមួយសិង្ហបុរីថា នឹងផ្អាកការអភិវឌ្ឍផ្លូវរថភ្លើងល្បឿនលឿន២ឆ្នាំ ខណៈដែលសេដ្ឋកិច្ចធំជាងគេលេខបីក្នុងអាស៊ីអាគ្នេយ៍ចង់ត្រួតពិនិត្យគម្រោងនេះ ដើម្បីកាត់បន្ថយបំណុលជាតិ ។
សារព័ត៌មានក្នុងប្រទេសម៉ាឡេស៊ីបានឲ្យដឹងថា ភាគីទាងសងខាងបានព្រមព្រៀងថានឹងផ្អាកគម្រោងនេះសិនរហូតដល់ថ្ងៃទី៣១ ខែឧសភា ឆ្នាំ២០២០ ដោយមិនមានការផាកពិន័យដល់ភាគីណាមួយឡើយដើម្បីអនុញ្ញាតឲ្យម៉ាឡេស៊ីត្រួតពិនិត្យហិរញ្ញវត្ថុរបស់ខ្លួន ។
រដ្ឋមន្ត្រីថ្នាក់ខ្ពស់ប្រចាំប្រទេសម៉ាឡេស៊ីមួយរូបបានបញ្ជាក់កាលពីថ្ងៃចន្ទថា ភាគីទាំងពីរបានព្រមព្រៀងថានឹងផ្អាកគម្រោងដោយមិនមានការពិន័យ ហើយព័ត៌មានលម្អិតនឹងមានច្បាស់ពេលដែលមានការសម្រេចកិច្ចព្រមព្រៀងថ្មីមួយក្នុងពេលឆាប់ៗនេះ ។
លោកនាយករដ្ឋមន្ត្រី មាហាធា មហាមេដ (Mahathir Mohamad) បានប្រកាសពីគោលបំណងបោះបង់គម្រោងនេះក្នុងរយៈពេលប៉ុន្មានសប្តាហ៍ បន្ទាប់ពីឡើងកាន់តំណែង ។
លោក Mohamad Azmin Ali រដ្ឋមន្ត្រីកិច្ចការសេដ្ឋកិច្ចរបស់ម៉ាឡេស៊ីបានឲ្យដឹងថា ម៉ាឡេស៊ីមានការប្តេជ្ញាលើគម្រោងនេះ ប៉ុន្តែពួកគេត្រូវតែធ្វើឲ្យវាមានតម្លៃសមរម្យ ។
លោកបានបន្តថា ៖« ពួកយើងចង់បន្តគម្រោងនេះ ព្រោះវានឹងល្អសម្រាប់ប្រទេសទាំងពីរ ប៉ុន្តែក្នុងរយៈពេលនៃការផ្អាកនេះ ពួកយើងនឹងពិភាក្សាពីវិធីក្នុងការកាត់បន្ថយការចំណាយ »។
គួរបញ្ជាក់ផងដែរថា កាលពីខែកក្កដា សិង្ហបុរីបាននិយាយថា ពួកគេនឹងទាមទារថវិកាចំណាយប្រមាណ១៨០លានដុល្លារ ប្រសិនបើម៉ាឡេស៊ីបោះបង់គម្រោងនេះ ៕
ចែករំលែកព័តមាននេះ