រាជធានីភ្នំពេញ ៖ លោកស្រី Sarah Crocker (from Australia) នាយិកាកម្មវិធីសិក្សានៃសាលាអន្ដរជាតិទ្រូវីហ្សិនកម្ពុជា ប្រាប់អ្នកសារព័ត៌មាន ក៏ដូចជាអាណាព្យាបាលដែលមានកូនតូចៗត្រៀមនឹងចូលសិក្សាថ្នាក់មត្ដេយ្យអន្ដរជាតិ និងថ្នាក់បឋមសិក្សាអន្ដរជាតិឱ្យបានជ្រាបថា គោលដៅក្នុងការបង្កើតសាលាអន្ដរជាតិទ្រូវីហ្សិនកម្ពុជានេះឡើង គឺចង់ឱ្យអាណាព្យាបាលកុមារទាំងអស់មានភាពកក់ក្ដៅខ្ពស់លើជំនាញថែទាំអប់រំកុមារឱ្យទទួលបាននូវចំណេះដឹងខ្ពស់បំផុត ដើម្បីអនាគតក្លាយជាអ្នកដឹកនាំប្រកបដោយគតិបណ្ឌិត និងមានចិត្ដសប្បុរសធម៌បំផុត សម្រាប់សង្គមជាតិ តាមរយៈការរៀបចំកម្មវិធីសិក្សាថ្មីបំផុតពីប្រទេស សិង្ហបុរី(Singapore),នូវែលសេឡង់(Newzealand) និងអាមេរិក (America) ដែលបង្រៀនដោយសាស្រ្ដាចារ្យដែលមានសញ្ជាតិដើមនិយាយភាសាអង់គ្លេស(Native Speakers Only) ដូចជាប្រទេសអង់គ្លេស អាមេរិក អូស្រ្ដាលីជាដើម ។
លោកស្រី Sarah Crocker បន្ថែមទៀតថា ការអប់រំកុមារគឺជារឿងមួយដែលសំខាន់ និងហ្មត់ចត់បំផុតសម្រាប់អ្នកអប់រំទាំងអស់លើសាកលលោក ព្រោះថា កុមារជាគ្រឹះដ៏រឹងមាំបំផុតសម្រាប់ដឹកនាំ និងបន្ដការស្ថាបនាជាតិ ។ លោកស្រីបានបន្ដទៀតថា ហេតុដូច្នេះហើយ បានជាសាលាអន្ដរជាតិទ្រូវីហ្សិនកម្ពុជា រៀបចំបណ្ដុះបណ្ដាលគ្រូដែលមានជំនាញពិតក្នុងការអប់រំកុមារតូចសម្រាប់ថ្នាក់មត្ដេយ្យអន្ដរជាតិ និងថ្នាក់បឋមសិក្សាអន្ដរជាតិ ។
តាមប្រសាសន៍របស់អ្នកគ្រូ Hannah Signy (from London, England) កុមារតូចទាំងអស់សុទ្ធតែមានភាពវ័យឆ្លាត និងទេពកោសល្យតាំងពីកំណើត ដូច្នេះក្នុងនាមជាអ្នកជំនាញផ្នែកអប់រំកុមារតូច ពួកយើងត្រូវតែយកចិត្ដទុកដាក់ខ្ពស់ទៅលើចំណុចពិសេសទាំងនេះរបស់កុមារនីមួយៗ ។ ចំណុចនេះហើយ ដែលអាចធ្វើឱ្យយើងរកឃើញនូវអ្នកប្រាជ្ញវ័យក្មេងបាន ។
ឆ្លៀតក្នុងឱកាសនោះដែរ លោក Seng M.Bona នាយកប្រតិបត្ដិបានបញ្ជាក់ថា កម្មវិធីសិក្សាច្បាស់លាស់ គ្រូមានគរុកោសល្យបង្រៀនល្អ ទើបអាចធ្វើឱ្យសិស្សានុសិស្សទទួលបាននូវចំណេះដឹងពិត ។ តាមរយៈកម្មវិធីសិក្សាអន្ដរជាតិទាំងនេះ សិស្សានុសិស្សនៃសាលាអន្ដរជាតិទ្រូវីហ្សិនកម្ពុជាទាំងអស់នឹងទទួលបានការបន្ថែមសកម្មភាពសិក្សាថ្មីៗ និងការអនុវត្ដជាក់ស្ដែងលើមុខវិជ្ជាសិក្សានីមួយៗជាមួយសាស្រ្ដាចារ្យដែលមានទេពកោសល្យបង្រៀនខ្ពស់ ៕
ចែករំលែកព័តមាននេះ