ខេត្តកំពង់ឆ្នាំង ៖ បើទោះមានកិច្ចខិតខំបង្ក្រាបបទល្មើសនេសាទពីមន្ត្រីជំនាញរដ្ឋបាលជលផលសហការជាមួយនឹងសមត្ថកិច្ចចម្រុះ និងអាជ្ញាធរមូលដ្ឋានយ៉ាងណាក្តីក៏បទល្មើសនេសាទក្នុងរដូវហាមឃាត់នៅតែលួចកើតមានឡើងឥតឈប់ឈរ ។ ជាក់ស្តែងនៅថ្ងៃទី២ ខែកញ្ញា ឆ្នាំ២០១៨ ការបង្ក្រាបបទល្មើសរបស់សមត្ថកិច្ចចម្រុះដែលដឹកនាំដោយមន្ត្រីរដ្ឋបាលជលផលបានធ្វើឡើងក្នុងភូមិសាស្ត្រចំនួន២ គឺស្រុកកំពង់លែង…
ខេត្តកំពង់ឆ្នាំង ៖ បើទោះមានកិច្ចខិតខំបង្ក្រាបបទល្មើសនេសាទពីមន្ត្រីជំនាញរដ្ឋបាលជលផលសហការជាមួយនឹងសមត្ថកិច្ចចម្រុះ និងអាជ្ញាធរមូលដ្ឋានយ៉ាងណាក្តីក៏បទល្មើសនេសាទក្នុងរដូវហាមឃាត់នៅតែលួចកើតមានឡើងឥតឈប់ឈរ ។ ជាក់ស្តែងនៅថ្ងៃទី២ ខែកញ្ញា ឆ្នាំ២០១៨ ការបង្ក្រាបបទល្មើសរបស់សមត្ថកិច្ចចម្រុះដែលដឹកនាំដោយមន្ត្រីរដ្ឋបាលជលផលបានធ្វើឡើងក្នុងភូមិសាស្ត្រចំនួន២ គឺស្រុកកំពង់លែង និងស្រុករលាប្អៀរ ។
លោក សោម ភិរុណ នាយខណ្ឌរដ្ឋបាលជលផលនៃមន្ទីរកសិកម្ម រុក្ខាប្រម៉ាញ់ និងនេសាទខេត្តកំពង់ឆ្នាំងបាននិយាយឲ្យដឹងថា ការបង្ក្រាបបទល្មើសនៅតែបន្តឥតឈប់ឈរដរាបណាបទល្មើសនេសាទក្នុងរដូវហាមឃាត់នៅតែមិនទាន់អស់ ។ ការបង្ក្រាបបទល្មើសនេសាទនៅថ្ងៃទី២ ខែកញ្ញា ឆ្នាំ២០១៨ គឺមាននៅក្នុងភូមិសាស្ត្រ ស្រុករលាប្អៀរ និងស្រុកកំពង់លែង ជាលទ្ធផលសរុបការបង្ក្រាបបទល្មើសរយៈពេលមួយថ្ងៃនេះគឺបង្ក្រាបបានរបាំងស្បៃមុង និងរបាំងសាច់អួន មានប្រវែងប្រមាណជាង២ពាន់ម៉ែត្រ ។
លោកក៏បានបញ្ជាក់ដែរថា បញ្ហាបទល្មើសនៅតែកើតមានឡើងគ្រប់ទីកន្លែង ឯការបង្ក្រាបវិញបានធ្វើឡើងស្ទើរតែជារៀងរាល់ថ្ងៃ ប៉ុន្តែមិនងាយនឹងអស់ ព្រោះតែបងប្អូនប្រជាពលរដ្ឋមិនព្រមបោះបង់ផ្នត់គំនិតការនេសាទដោយខុសច្បាប់នៅឡើយ ។ ហើយការបង្ក្រាបបទល្មើសនេះបើចង់ឲ្យអស់ លុះត្រាណាតែចាប់ពួកគាត់តែម្ដង ប៉ុន្តែការចាប់អ្នកប្រព្រឹត្តបទល្មើសយកទៅដាក់ឃុំឃាំងមិនអាចទៅរួចនោះទេ ដោយសារតែអាជ្ញាធរភូមិ-ឃុំសុំយោគយល់អាធ្យាស្រ័យ និងសុំដោះលែង ។ ម្លោះហើយការបង្ក្រាបបទល្មើសគ្រាន់តែទៅការបង្ក្រាបរឹបអូស និងបំផ្លាញចោលឧបករណ៍តែប៉ុណ្ណោះ ។
សូមបញ្ជាក់ថា រយៈពេលមួយថ្ងៃគឺថ្ងៃទី២ ខែកញ្ញា ឆ្នាំ២០១៨ សមត្ថកិច្ចចម្រុះបានបង្ក្រាបបទល្មើសនេសាទនៅចំណុចកោះកែវ ក្នុងឃុំស្វាយជ្រុំ ស្រុករលាប្អៀរ ដោយបំផ្លាញរបាំងសាច់អួន៨កន្លែងស្មើនឹង១៨០០ម៉ែត្រ, លបលូ៨មាត់, បង្គោល១ពាន់ដើម, របាំងស្បៃមុង៦កន្លែងស្មើនឹង៣៥០ម៉ែត្រ, បង្គោលចំនួន២០០ដើម និងចាក់កូនត្រីចំនួន១០០គីឡូក្រាម ។
រីឯនៅភូមិកោះតាម៉ូវ ឃុំកំពង់ព្រះគគីរ ស្រុកបរិបូរណ៍ បង្ក្រាបរបាំងសាច់អួនពី២កន្លែង មានប្រវែង៣០០ម៉ែត្រ, លបលូសាច់អួនចំនួន៤មាត់, បង្គោលចំនួន១០០ដើម និងចាក់លែងត្រីចំនួន៥គីឡូក្រាម ។ ក្នុងកិច្ចប្រតិបត្តការនេះបានប្រើប្រាស់កម្លាំងសរុបទាំងពីរមុខសញ្ញាចំនួន៣៨នាក់ កាណូត១៩គ្រឿង ។
យោងតាមរបាយការណ៍របស់ខណ្ឌរដ្ឋបាលជលផលរយៈពេល១ខែសីហា (ចាប់ពីថ្ងៃទី១ដល់ថ្ងៃទី៣១ សីហា) បង្ក្រាបបទល្មើសសរុបចំនួន៤៧ករណី, របាំងទាំង២ប្រភេទ៤៩៩កន្លែងស្មើនឹង២៨២៧០ម៉ែត្រ, លបលូ៥៩២មាត់, បង្គោល១៧៤៦០ដើម និងចាក់លែងកូនត្រីប្រមាណ៨លាន៥សែនកូន ៕
ចែករំលែកព័តមាននេះ