ខេត្តមណ្ឌលគិរី ៖ ប្រតិបត្តិការទ្រង់ទ្រាយធំដឹកនាំដោយព្រះរាជអាជ្ញាររងខេត្តមណ្ឌលគិរីបង្ក្រាបទីតាំងសិប្បកម្មកែច្នៃឈើ ខុសច្បាប់៧កន្លែង ខណៈការបំផ្លាញព្រៃឈើនៅតំបន់ដេអេនឹងពូជ្រៃ ក្នុងស្រុកពេជ្រដាកំពុងកើតមានសកម្មភាពរៀងរាល់ថ្ងៃ គ្មានមន្ត្រីជំនាញអើពើដោយទទួលបានការសារទរជាខ្លាំងពីប្រជាពលរដ្ឋចំពោះចំណាត់ការរបស់លោក ម៉ម វណ្ណដា ព្រះរាជអាជ្ញាររងសាលាដំបូងខេត្ត ដែលបានដឹកនាំមន្ត្រីពាក់ព័ន្ឋរឹបអូសវត្ថុតាងរួមនឹងឈើខុសច្បាប់រាប់រយសន្លឹកពីឈ្មួញ កាលពីល្ងាចថ្ងៃទី០១ កញ្ញា ២០១៨ ។
លោក ម៉ម វណ្ណដា បានឲ្យដឹងថា ក្នុងប្រតិបត្តិការនេះជំនាញបានដកហូតប្រភេទម៉ាស៊ីនអាជ្រៀក (តាប) បានចំនួន៧គ្រឿង ពីរោងសិប្បកម្មចំនួន៧ទីតាំងផ្សេងៗគ្នាក្នុងភូមិពូជ្រៃ នឹងភូមិដេអេ ប៉ុន្តែដោយពិបាកក្នុងការដឹកជញ្ជូនទើបជំនាញ សម្រេច ធ្វើការរក្សាទុកនៅទីតាំងដើម ដោយតម្រូវឲ្យម្ចាស់សិប្បកម្មទាំងនោះរត់ច្បាប់ អនុញ្ញាតក្នុងរយៈពេល១៥ថ្ងៃ ។ លោក ម៉ម វណ្ណដា បន្តថា បើក្នុងអំឡុងពេល១៥ថ្ងៃ ពួកគាត់នៅតែមិនព្រមធ្វើច្បាប់ជំនាញនឹងចាប់ឃាត់ជាស្ថាពរតែម្តង ។
លោកជ័យ សុខា នាយផ្នែករដ្ឋបាលព្រៃឈើសែនមនោរម្យនឹងពេជ្រាដា បានឲ្យអ្នកកាសែតដឹងនៅរសៀលថ្ងៃទី០២ កញ្ញាថា«ករណីនេះដោយមានការយល់ឃើញពីចៅហ្វាយស្រុកបានសុំទៅលោក ម៉ម វណ្ណដា ឲ្យធ្វើត្រឹមកិច្ចសន្យានោះទេ…ដោយផ្ញើ (វត្ថុតាង)នៅគាត់(ម្ចាស់សិប្បកម្ម)ដោយឲ្យគាត់រត់ការរត់ច្បាប់…យើងអត់បានយកមក អត់យកអីទាំងអស់…គ្រាន់តែឲ្យគាត់លើកចេញពីទីតាំងកន្លែងហ្នឹងយកទៅដាក់ផ្សេង…ហើយមិនទាន់បង្ក្រាបអីនោះទេ…ព្រោះស្រុកប្រជុំហើយ ចឹងទុកពេលឲ្យគាត់រុះរើដោយខ្លួនឯងនឹងរត់ច្បាប់ក្នុងរយៈពេល១៥ថ្ងៃ » ។ លោក ជ័យ សុខា បញ្ជាក់ថា «ឈើដែលបម្រើឲ្យសិប្បកម្មទាំងនោះតម្រូវឲ្យគាត់ទិញពីដីសម្បទានសេដ្ឋកិច្ច…អាហ្នឹងស្ថិតនៅលើជាក់ស្តែង» ។
គិតត្រឹមម៉ោង២រសៀលថ្ងៃទី០២ កញ្ញា ២០១៨ លទ្ធផលជុំវិញការចុះបង្ក្រាបទីតាំងកែច្នៃឈើអត់ច្បាប់ដុះស្លែទាំង៧កន្លែងខាង លើមិនមានព័ត៌មានជាក់លាក់ណាមួយបង្ហាញជាសាធារណៈដល់មហាជនថា តើមានការរឹបអូសវត្ថុតាងសម្រាប់កែច្នៃឈើដែលក្រុមជំនាញបានរកឃើញត្រូវចាត់វិធានការបែបណានោះទេ ? ចំណែកម្ចាស់ទីតាំងទាំងនោះត្រូវប្រឈមមុខច្បាប់អ្វីខ្លះ ក៏មិនអាចសុំការបញ្ជាក់ពីមន្ត្រីជំនាញបានដែរ ។
សេចក្តីរាយការណ៍ដាច់ដោយឡែកបានឲ្យដឹងថា «សកម្មភាពបង្ក្រាបដែលដឹកនាំដោយលោកព្រះរាជអាជ្ញាររងខាងលើបានធ្វើឲ្យមានមន្ត្រីក្នុងមូលដ្ឋានមួយក្តាប់តូចមិនសប្បាយចិត្តឡើយ ដ្បិតដូចវាយបំបែកឆ្នាំងបាយរបស់ពួកគេព្រោះសិប្បកម្មកែច្នៃឈើទាំងនោះបានដំណើរការរាប់ឆ្នាំមកហើយ ជាកន្លែងផ្តល់លាភសក្ការដល់មន្ត្រីជំនាញ» ។
ប្រភពបន្តថា«ជាការកត់សម្គាល់រាល់ឈើដែលត្រូវយកទៅកែច្នៃនៅគ្រប់សិប្បកម្មទាំងនោះត្រូវបានក្រុមឈ្មួញឃុបឃិតជាមួយ មន្ត្រីដែនជម្រកការពារសត្វព្រៃស្រែពកនឹងសង្កាត់រដ្ឋបាលព្រៃឈើពូជ្រៃ-ក្រង់តេះ អនុញ្ញាតឲ្យចូលទៅអារកាប់ដឹកចេញពីដែន ជម្រកដោយខុសច្បាប់ ដើម្បីផ្គត់ផ្គង់ដល់រោងសិប្បកម្មទាំងនោះ» ៕
ចែករំលែកព័តមាននេះ