ខេត្តកណ្តាល ៖ ដោយមានការភ្ញាក់ផ្អើលដល់សមត្ថកិច្ចនគរបាល និងមនុស្សម្នាយ៉ាងច្រើនកុះករមកចោមរោមមើល ខណៈអ្នកដាក់មងប្រទះឃើញសពបុរសម្នាក់អណ្តែតទឹកទន្លេមេគង្គកាលពីវេលាម៉ោង៥និង៣០នាទីព្រឹកថ្ងៃទី៣១ ខែសីហា ឆ្នាំ២០១៨ ចម្ងាយពីច្រាំងទន្លេប្រហែល១៥ម៉ែត្រទល់មុខវត្តគគីរធំ«ហៅវត្តចាស់»ស្ថិតក្នុងភូមិគគីរធំ ឃុំគគីរធំ ស្រុកកៀនស្វាយ ខេត្តកណ្តាល ។
ជនរងគ្រោះត្រូវបានគេស្គាល់ឈ្មោះ កង អូន ភេទប្រុស អាយុ៤២ឆ្នាំ ជនជាតិខ្មែរ មុខរបរកសិករ មានប្រពន្ធឈ្មោះ គិត ស្រ៊ាង អាយុ៥១ឆ្នាំ មានកូនចំនួន៧នាក់ ក្នុងបន្ទុករស់នៅក្នុងភូមិឃុំខាងលើ ។
បើតាមស្ត្រីជាប្រពន្ធឈ្មោះ គិត ស្រ៊ាង បានរៀបរាប់ទាំងទឹកភ្នែកប្រាប់ថា ប្តីរបស់គាត់«ជនរងគ្រោះ» កាលពីមុន គឺជាមនុស្សញៀនស្រា ប៉ុន្តែគាត់ខំប្រឹងធ្វើកិច្ចការងារផ្ទះណាស់ ហើយប្រហែលជា១០ថ្ងៃនេះ គាត់ផ្អាកឈប់ហូបស្រា ចេះតែដើររត់ពេញភូមិនៅពេលយប់ ។ ដោយដឹងថា ស្ថានភាពប្តីមិនសូវស្រួលរូបគាត់ជាប្រពន្ធក៏បានទៅសុំបើកថ្នាំសរសៃប្រសាទពីក្រុមគ្រូពេទ្យនៅមន្ទីរពេទ្យរុស្សី ភ្នំពេញ យកមកឲ្យប្តីលេប ទើបតែបាន២-៣ ថ្ងៃក៏ស្រាប់តែប្តីរត់បាត់ចេញពីផ្ទះ តាំងពីវេលាម៉ោងប្រហែល៣ទៀបភ្លឺ ឈានចូលថ្ងៃទី២៩ ខែសីហានេះ មកម្ល៉េះ ។
ស្ត្រីជាប្រពន្ធបញ្ជាក់បន្តថា បន្ទាប់ពីបាត់ប្តីរូបគាត់ និងក្រុមគ្រួសារសាច់ញាតិ និងអ្នកភូមិបានជួយដើររកផង ជិះម៉ូតូតាមរកគ្រប់ច្រកល្ហកនៅតែរកមិនឃើញប្តី ។ លុះដល់ព្រឹកថ្ងៃទី៣១ សីហានេះ មានអ្នកភូមិហែលទឹកទៅមើលមងបានប្រទះឃើញសពអណ្តែតទឹក បង្កឲ្យមានការភ្ញាក់ផ្អើលនាំគ្នាទៅមើល ទើបស្គាល់ថា សពនោះ គឺជាប្តីរបស់គាត់ពិតប្រាកដមែន ។
ក្រោយទទួលបានព័ត៌មានកម្លាំងនគរបាលប៉ុស្តិ៍បានចុះទៅការពារជុំវិញបរិវេណកើតហេតុ និងរាយការណ៍ជូនលោកអធិការបញ្ជាឲ្យមន្ត្រីនគរបាលបច្ចេកទេសវិទ្យាសាស្ត្រ និងនគរបាលព្រហ្មទណ្ឌចុះមកសហការជាមួយអាជ្ញាធរឃុំភូមិ និងលោកគ្រូពេទ្យឃុំបង្កើតគណៈកម្មាការចម្រុះធ្វើកោសល្យវិច្ច័យសពយ៉ាងយកចិត្តទុកដាក់បំផុត ។ បន្ទាប់ពិនិត្យរួចនគរបាលជំនាញបានធ្វើការសន្និដ្ធានជនរងគ្រោះពិតជាស្លាប់ដោយសារលង់ទឹកប្រាកដមែន មិនមានស្លាកស្នាមអ្វីគួរឲ្យកត់សម្គាល់ទៅនឹងករណីផ្សេងនោះទេ ។
ដោយមានការឯកភាពពីក្រុមគ្រួសារសពត្រូវក្រុមគណៈកម្មាការចម្រុះធ្វើកំណត់ហេតុប្រគល់ជូនប្រពន្ធ និងសាច់ញាតិរៀបចំធ្វើបុណ្យតាមប្រពៃណីនៅក្នុងវត្តគគីរធំហៅវត្តចាស់ ៕
ចែករំលែកព័តមាននេះ