រាជធានីភ្នំពេញ ៖ នារីម្នាក់ជិះម៉ូតូលឿនមិនប្រយ័ត្នក៏ជ្រុលទៅបុកគូទរថយន្តសណ្តោងធុនធំដឹកជ្រូកមួយគ្រឿងទៀត ដែលខូចបានឈប់ជួសជុលនៅកណ្តាលផ្លូវ ។ ហេតុការណ៍នេះកើតឡើង កាលពីវេលាម៉ោង១០និង៤០នាទីយប់ថ្ងៃទី១៩ ខែសីហា ឆ្នាំ២០១៨ នៅតាមបណ្តោយផ្លូវណតប្រ៊ីត ស្ថិតក្នុងសង្កាត់អូបែកក្អម ខណ្ឌសែនសុខ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញនារីម្នាក់ជិះម៉ូតូមួយគ្រឿងម៉ាកហុងដាស្កុបភី ស៊េរី០១៨ ពណ៌ស ពាក់ស្លាកលេខ ភ្នំពេញ 1GL-0247 ធ្វើដំណើរតាមបណ្តោយផ្លូវណតប្រ៊ីត ក្នុងទិសដៅពីជើងទៅត្បូង និងក្នុងល្បឿនយ៉ាងលឿន ។ លុះមកដល់ចំណុចកើតហេតុនារីដែលជាអ្នកបើកម៉ូតូរវល់តែងាកមើលម៉ូតូកង់បីមួយគ្រឿងទៀត ដែលបើកស្របទិសគ្នានៅខាងស្តាំដៃ ដោយមិនប្រយ័ត្នក៏ជ្រុលទៅបុកគូទរថយន្តមួយគ្រឿងទៀតម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3D-6377 ជារថយន្តសណ្តោងដឹកជ្រូកបានខូចឈប់នៅចំកណ្តាលផ្លូវ បណ្តាលឲ្យនារីរងគ្រោះរងរបួសបែកក្បាល ត្រូវបានរថយន្តសង្គ្រោះដឹកយកទៅសង្គ្រោះនៅគ្លីនិកឯកជន ។ ចំណែកឯម៉ូតូរងការខូចខាតបែកចង្កៀងផ្នែកខាងមុខ ដោយឡែករថយន្តរងការខូចខាតបន្តិចបន្តួច ។
ក្រោយពេលកើតហេតុសមត្ថកិច្ចមូលដ្ឋានក៏បានចុះមកដល់ចំណុចកើតហេតុហើយបានទាក់ទងទៅសមត្ថកិច្ចជំនាញឲ្យចុះមកធ្វើការវាស់វែងយករថយន្ត និងម៉ូតូទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយគ្នានៅពេលក្រោយ ៕
ចែករំលែកព័តមាននេះ