ប្រទេសអីុរ៉ង់ ៖ ដោយសារទណ្ឌកម្មរបស់អាមេរិកប្រឆាំងអីុរ៉ង់អាចប៉ះពាល់ដល់ពួកគេបើបន្តរកសីុជាមួយប្រទេសនេះទៀត ដល់វេនក្រុមហ៊ុនអាកាសចរណ៍ធំៗរបស់អឺរ៉ុប ប្រកាសផ្ដាច់ការរកសីុជាមួយអីុរ៉ង់ ពិសេសក្រុមហ៊ុន AIR FRANCE បារាំង ។…
ប្រទេសអីុរ៉ង់ ៖ ដោយសារទណ្ឌកម្មរបស់អាមេរិកប្រឆាំងអីុរ៉ង់អាចប៉ះពាល់ដល់ពួកគេបើបន្តរកសីុជាមួយប្រទេសនេះទៀត ដល់វេនក្រុមហ៊ុនអាកាសចរណ៍ធំៗរបស់អឺរ៉ុប ប្រកាសផ្ដាច់ការរកសីុជាមួយអីុរ៉ង់ ពិសេសក្រុមហ៊ុន AIR FRANCE បារាំង ។
ក្រុមហ៊ុន AIR FRANCE ប្រកាសនាថ្ងៃទី២៣ សីហា ថាដោយសារមើលទៅពុំអាចរកសីុបានកាក់កប បន្ទាប់ពីអាមេរិក ដាក់ទណ្ឌកម្មជាថ្មីប្រឆាំងអីុរ៉ង់ ក្រុមហ៊ុនAIR FRANCEត្រៀមបញ្ឈប់ទំនាក់ទំនងតាមអាកាសជាមួយក្រុងតេហេរ៉ង់ចាប់ពីថ្ងៃទី១៨ កញ្ញា តទៅ ។
កាលពីថ្ងៃទី២៣សីហាក្រុមហ៊ុនអាកាសចរណ៍អង់គ្លេស BRITISH AIRWAYS ក៏គូសបញ្ជាក់ដែរថាចង់បញ្ឈប់ការហោះហើរមកកាន់ក្រុងតេហេរ៉ង់ ចាប់ពីដំណាច់ខែកញ្ញាទៅ។ក្រុមហ៊ុននោះនិយាយថា ការរកសីុហាក់ពុំកក់ក្ដៅឡើយនាពេលបច្ចុប្បន្ន ។
ចំណែកក្រុមហ៊ុនអាកាសចរណ៍ហូឡង់ KLM ប្រកាសតាំងពីដើមខែកក្កដាមកពីការផ្អាកការហោះហើររវាងក្រុងអាំស្ទ័រដាមនិងក្រុងតេហេរ៉ង់ចាប់ពីថ្ងៃទី២៤ ខែកញ្ញា ទៅ ។
ការដកថយរបស់អាមេរិកពីកិច្ចព្រមព្រៀងនុយកេ្លអ៊ែរអីុរ៉ង់ ហើយការចូលជាធរមានចាប់ពីដើមខែសីហាទៅនៃទណ្ឌកម្មសេដ្ឋកិច្ចយ៉ាងខ្លាំងក្លាបំផុត ធ្វើឲ្យប៉ះពាល់ដល់គម្រោងវិនិយោគជាច្រើនរបស់បណ្ដាសហគ្រាសអឺរ៉ុប ។ ក្រុមហ៊ុនផលិតរថយន្តដ៏ធំរបស់អាល្លឺម៉ង់ DAIMLER ក៏ប្រកាសដកខ្លួន ចំណែកក្រុមហ៊ុនបារាំង PSA អះអាងរួចហើយពីការដកគម្រោងវិនិយោគច្រើនពាន់លានដុល្លារ ។
ក្រុមហ៊ុនឧស្ម័នបារាំង AIR LIQUIDE បានបញ្ឈប់សកម្មភាពពាណិជ្ជកម្មនៅអីុរ៉ង់ រីឯក្រុមហ៊ុនប្រេងបារាំងតូតាល់ប្រកាសជាផ្លូវការពីការផ្អាកគម្រោងវិនិយោគមានទឹកប្រាក់ច្រើនពាន់លានដុល្លារ ៕
ចែករំលែកព័តមាននេះ