ផ្ទះជាង២ម៉ឺនខ្នង និងសត្វគោក្របីជិត២ពាន់ក្បាលត្រូវបានជន់លិច(មានវីដេអូ)
- ព្រៃវែង
ខេត្តព្រៃវែង ៖ ដោយសារតែស្ថានភាពទឹកជំនន់នៅក្នុងខេត្តព្រៃវែងនៅតែបន្តកើនឡើងបានធ្វើឲ្យដីស្រែចម្ការ និងផ្ទះសម្បែងរបស់ប្រជាពលរដ្ឋជាង២ម៉ឺនខ្នងត្រូវបានជន់លិចជាមួយគ្នានោះ មានសត្វពាហនៈរបស់ពួកគាត់ដែលរួមទាំងសត្វគោក្របីជ្រូកជិត២ពាន់ក្បាលក៏ត្រូវបានជម្លៀសទៅកាន់ទីទួលសុវត្ថិភាពផងដែរ ។ ការរស់នៅលាយឡំនៅលើទីតាំងប្រមូលផ្តុំតែមួយក៏ដូចជា នៅតាមដងផ្លូវដែលមានទឹកភក់ជ្រាំ គឺជាលក្ខណៈងាយ និងបង្កឲ្យសត្វគោក្របីរបស់អ្នកស្រុកមានជំងឺខ្លាំងណាស់…
ការរស់នៅលាយឡំនៅលើទីតាំងប្រមូលផ្តុំតែមួយក៏ដូចជា នៅតាមដងផ្លូវដែលមានទឹកភក់ជ្រាំ គឺជាលក្ខណៈងាយ និងបង្កឲ្យសត្វគោក្របីរបស់អ្នកស្រុកមានជំងឺខ្លាំងណាស់ ជាពិសេសពពួកប្រភេទជំងឺសារទឹក និងជំងឺអុតក្តាម ដែលឆ្លងពីមួយទៅមួយយ៉ាងឆាប់រហ័ស ហើយជំងឺប្រភេទនេះក៏អាចបង្កឲ្យសត្វគោក្របីជ្រូកឈឺងាប់យ៉ាងលឿន បើព្យាបាលមិនទាន់ពេលវេលានោះទេ ។
លោក ចិន វិសាល ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្មរុក្ខាប្រមាញ់ និងនេសាទខេត្តព្រៃវែងបានមានប្រសាសន៍ថា ដើម្បីបង្ការ និងទប់ស្កាត់កុំឲ្យកើតមានជំងឺទាំងនេះទៅលើសត្វគោក្របីរបស់អ្នកស្រុកទើបនៅថ្ងៃទី២៣ សីហានេះ រូបលោកបានដឹកនាំមន្ត្រីចុះធ្វើយុទ្ធនាការសំខាន់ៗនៅក្នុងស្រុកពោធ៌រៀង ជាស្រុកដែលរងគ្រោះ និងប្រឈមខ្លាំងជាងគេ ។
លោក ចិន វិសាល បានបន្តទៀតថា ជាលទ្ធផលនៅក្នុងយុទ្ធនាការថ្ងៃទី២៣ សីហានេះ មន្ត្រីពេទ្យសត្វបានផ្សព្វផ្សាយដល់ប្រជាកសិករចំនួន១៥៧គ្រួសារ អំពីវិធីសាស្ត្រនៃការចិញ្ចឹមសត្វ នៅតាមទីទួលសុវត្ថិភាព និងតាមដងផ្លូវក្នុងរដូវទឹកជំនន់ ។ ចុះចែកខិត្តប័ណ្ណណែនាំអំពីប្រភេទជំងឺនៃសត្វបានចំនួន៣០១សន្លឹក និងចាក់វ៉ាក់សាំងការពារជំងឺសារទឹក និងជំងឺអុតក្តាមលើសត្វគោក្របីរបស់អ្នកស្រុកបានចំនួន២៨៣ក្បាល ។
ចែករំលែកព័តមាននេះ