រាជធានីភ្នំពេញ ៖ នៅក្នុងឆមាសទី១ឆ្នាំនេះ ក្រសួងពាណិជ្ជកម្មសម្រេចចុះបញ្ជីម៉ាកផលិតផលជាតិ និងអន្តរជាតិ បានចំនួន៣.៨០៨មុខ កើនឡើង១៦% បើធៀបនឹងរយៈពេលដូចគ្នាកាលពីឆ្នាំមុន ។ នេះបើយោងតាមរបាយការណ៍របស់ក្រសួងពាណិជ្ជកម្ម ។
របាយការណ៍បានឲ្យដឹងថា នៅឆមាសទី១ ឆ្នាំនេះ ក្រសួងពាណិជ្ជកម្មបានទទួលពាក្យស្នើសុំចុះបញ្ជីម៉ាកទាំងក្នុងស្រុក និងក្រៅស្រុកសរុបចំនួន៣.៨០៨មុខ ក្នុងនោះផលិតផលក្នុងស្រុកមានចំនួន២.៦៧០ម៉ាក និងម៉ាកសញ្ញាអន្តរជាតិមានចំនួន១.១៣៨មុខ បើធៀបនឹងរយៈពេលដូចគ្នា កើនឡើង១៦% ។
ប្រធាននាយកដ្ឋានកម្មសិទ្ធិបញ្ញានៃក្រសួងពាណិជ្ជកម្ម បានឲ្យដឹងថា ការចុះបញ្ជីម៉ាកផលិតផលគឺមានសារសំខាន់ណាស់សម្រាប់ក្រុមហ៊ុន ឬម្ចាស់ម៉ាកផលិតផលនីមួយៗ ដើម្បីសម្គាល់ម៉ាកទំនិញ ក៏ដូចជាទទួលបានសិទ្ធិផ្តាច់មុខនៅពេលដែលម្ចាស់ម៉ាកបានចុះបញ្ជីស្របច្បាប់រួចហើយ ។
លោក អប់ រ៉ាឌី ប្រធាននាយកដ្ឋានកម្មសិទ្ធិបញ្ញា បានឲ្យដឹងតាមទូរស័ព្ទនាព្រឹកថ្ងៃទី២០ សីហា ថា រាល់សំណើសុំចុះបញ្ជីម៉ាករបស់ក្រុមហ៊ុនណាមួយតាមរយៈអនឡាញ ឬដោយដៃក្នុងមួយលើកមានតម្លៃប្រមាណតែ៤២ម៉ឺនរៀល ឬស្មើនឹងជាង១០០ដុល្លារអាមេរិក ដែលមានសុពលភាពរហូតដល់១០ឆ្នាំ ។
លោកបញ្ជាក់ថា ៖« ការចុះបញ្ជីម៉ាកផលិតផល គឺមានសារសំខាន់ណាស់ ព្រោះនៅពេលម្ចាស់ម៉ាកបានចុះបញ្ជីត្រឹមត្រូវ និងស្របច្បាប់ហើយនោះ ម្ចាស់ម៉ាកគឺមានសិទ្ធិប្តឹងចំពោះជនណាដែលបានក្លែងបន្លំម៉ាក ឬទំនិញដែលមានលក្ខណៈដូច ឬស្រដៀង និងប្រហាក់ប្រហែលដែលធ្វើឲ្យមានការភាន់ច្រឡំជាដើម »។
កាលពីខែឧសភា ឆ្នាំ២០១៧កន្លងទៅ ក្រសួងពាណិជ្ជកម្មបានដាក់ឲ្យប្រើប្រាស់ប្រព័ន្ធចុះបញ្ជីម៉ាកពាណិជ្ជកម្មតាមអនឡាញ ក្នុងគោលបំណងផ្តល់ភាពងាយស្រួល ដោយកាត់បន្ថយពេលវេលា, ការចំណាយក្នុងការស្នើសុំចុះបញ្ជី និងសេវាផ្សេងៗពាក់ព័ន្ធ ព្រមទាំងការគ្រប់គ្រងប្រព័ន្ធចុះបញ្ជីម៉ាកប្រកបដោយប្រសិទ្ធភាព ៕
ចែករំលែកព័តមាននេះ