កាមទាំងឡាយដ៏មានរសឆ្ងាញ់ ជាទីរីករាយនៃចិត្ត តែកាមនេះមានពិសពុលណាស់តែងញាំញីចិត្តសត្វឱ្យដល់នូវសេចក្តីទុក្ខដោយប្រការផ្សេងៗ, ដោយសារតែឃើញនូវទោសក្នុងកាមគុណទាំងឡាយ ទើបកុលបុត្រចេញចាកផ្ទះសម្បែងទៅបួសក្នុងព្រះពុទ្ធសាសនា ព្រោះយល់ថា ភាពជាសមណៈ មិនសូវខុសភ្លាត់ និងជាភេទដ៏ប្រសើរលើសលប់ ។
កុលបុត្របួសដោយសទ្ធា បានប្រតិបត្តិក្នុងសាសនានៃព្រះជិនស្រីដ៏តឹងរ៉ឹង បព្វជ្ជារបស់កុលបុត្រមិនមានទោស បរិភោគភោជនដែលមិនមានបំណុល ជាភេទដ៏ប្រសើរ ។ អ្នកបួសឃើញនូវកាមទាំងឡាយ ហាក់ដូចជាភ្លើងកំពុងតែឆេះសព្វប្រាណហើយ ឃើញនូវជាតរូប ហាក់ដូចជាគ្រឿងសស្ត្រាវុធ ឃើញហេតុនាំមកនូវទុក្ខ តាំងតែអំពីការចុះចាប់បដិសន្ធិក្នុងគភ៌ ឃើញនូវភ័យធំក្នុងនរកទាំងឡាយ ព្រោះតែឃើញនូវទោសនេះឯង ក៏បានដល់នូវសេចក្តីសំវេគក្នុងកាលនោះ ហើយស្វែងរកសេចក្តីសុខមិនងាកក្រោយ ។
ព្រះពុទ្ធសាសនា អ្នកបួសបានបម្រើហើយ ភារៈដ៏ធ្ងន់អ្នកបួសបានទ្រហើយ តណ្ហាជាគ្រឿងនាំសត្វទៅកាន់ភព អ្នកបួសបានដកចោលអស់ហើយ ។ កុលបុត្របានចេញចាកផ្ទះ ចូលមកកាន់ផ្នួស ដើម្បីប្រយោជន៍ណា ប្រយោជន៍នោះ គឺការអស់ទៅនៃកិលេសជាគ្រឿងចងឆ្វាក់ចិត្តសត្វ អ្នកបួសបានកម្ចាត់អស់ហើយដែរ ។
កាលបព្វជិតពិចារណាឃើញនូវទោសនៃកាមបែបនេះហើយ ក៏ធ្វើឱ្យចិត្តដល់នូវក្តីសង្វេគ នឿយណាយក្នុងកាមតណ្ហា ក៏កម្ចាត់ចោលនូវសំយោជនៈឱ្យអស់ពីខន្ធសន្តាន លែងជាប់ជំពាក់នឹងតម្រេកតទៅទៀតហើយ ។
ចែករំលែកព័តមាននេះ