រាជធានីភ្នំពេញ ៖ នៅថ្ងៃទី២០និង២១ ខែសីហា ឆ្នាំ២០១៨ គឺជាសម័យប្រឡងសញ្ញាបត្រមធ្យមសិក្សាទុតិយភូមិ ដែលមានបេក្ខជនប្រឡងសរុបចំនួន១១៧.០៦១នាក់ និងមណ្ឌលប្រឡង ចំនួន១៩៥មណ្ឌល ចែកចេញជា៤.៧៦១បន្ទប់ នៅទូទាំង២៥រាជធានី-ខេត្ត ។
យោងតាមសេចក្ដីប្រកាសព័ត៌មានរបស់ក្រសួងអប់រំ យុវជន និងកីឡា កាលពីថ្ងៃទី២៨ ខែមិថុនា ឆ្នាំ២០១៨ បានឱ្យដឹងថា ក្រសួងអប់រំយុវជន និងកីឡា នឹងបិទបញ្ជីឈ្មោះបេក្ខជន លេខតុ លេខបន្ទប់ និងបទប្បញ្ញត្តិផ្សេងៗទាក់ទងនឹងការប្រឡង នៅតាមមណ្ឌលប្រឡងចាប់ពីម៉ោង៩ព្រឹកថ្ងៃទី១៩ ខែសីហា ខណៈដំណើរការសំណេរនៃការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០១៧-២០១៨ នឹងប្រព្រឹត្តទៅនៅថ្ងៃ២០និង២១ ខែសីហា។
អ្នកសង្កេតការណ៍ស្ម័គ្រចិត្តប្រមាណ៥.០០០នាក់ដែលរៀបចំដោយអង្គភាពប្រឆាំងអំពើពុករលួយ ភាគច្រើនជាក្រុមយុវជននឹងចុះទៅតាមមណ្ឌលទូទាំងប្រទេស ក្នុងចេតនាដើម្បីធ្វើយ៉ាងណាឱ្យការប្រឡងនេះគោរពតាមគោលការណ៍ក្រសួងអប់រំ «អ្នកចេះគឺជាប់» ។
ដោយឡែក បេក្ខជនប្រឡងនៅរាជធានីភ្នំពេញទាំងអស់មានចំនួនជាង២ម៉ឺននាក់ ។ក្នុងកិច្ចប្រជុំជាមួយអាជ្ញាធររាជធានីភ្នំពេញលោក ជា ជាតិ អនុរដ្ឋលេខាធិការក្រសួងអប់រំយុវជននិងកីឡា បានថ្លែងថា នេះជាលើកទី៥ហើយ ដែលក្រសួងអប់រំធ្វើកំណែទម្រង់ការប្រឡងមធ្យមសិក្សាទុតិយភូមិ ដែលមានអ្នកសង្កេតការណ៍ចូលរួមតាមដានគ្រប់សកម្មភាពរបស់បេក្ខជនប្រឡង ។ ចំពោះកំណែទម្រង់នៃការប្រឡងទាំង៤លើកកន្លងទៅ គឺទទួលបានជោគជ័យដ៏ធំធេង ។
លោកអនុរដ្ឋលេខាធិការបានឱ្យដឹងថា មណ្ឌលប្រឡងនៅរាជធានីភ្នំពេញមានចំនួន២៥ គិតជាបន្ទប់ប្រឡងមានចំនួន៩១៣បន្ទប់ ដែលមានបេក្ខជនប្រឡងចំនួន២២.៧៧៨នាក់ ។ លោកបានស្នើឱ្យគ្រប់ស្ថាប័នពាក់ព័ន្ធ និងសមត្ថកិច្ចត្រូវបន្ដកិច្ចសហការគាំទ្រ ដើម្បីធ្វើការសម្របសម្រួលបេក្ខជនក្នុងអំឡុងពេលប្រឡងសញ្ញាបត្រសិក្សាទុតិយភូមិឆ្នាំនេះ ឲ្យប្រព្រឹត្តទៅទទួលបានល្អប្រសើរ ។
លោក ឃាង សេង អនុប្រធានអង្គភាពប្រឆាំងអំពើពុករលួយ(ACU) បានស្នើឱ្យអាជ្ញាធររាជធានីភ្នំពេញ ចូលរួមការពារសន្តិសុខសណ្តាប់ធ្នាប់២៤ម៉ោងលើ២៤ម៉ោង នៅតាមមណ្ឌលប្រឡងទាំងអស់ និងការពារសុវត្ថិភាពនៅមណ្ឌលទាំង១០កន្លែងនៅរាជធានីភ្នំពេញ រហូតដល់ថ្ងៃទី២៩ ខែសីហា ។ ចំពោះអ្នកសង្កេតការណ៍សម្រាប់មណ្ឌលប្រឡងនៅរាជធានីភ្នំពេញ លោក ឃាង សេង ឱ្យដឹងថា គឺអង្គភាពដាក់អ្នកសង្កេតការណ៍ស្ម័គ្រចិត្តចំនួន១.១១៤នាក់ទូទាំង២៥មណ្ឌលប្រឡង ។
លោកលើកឡើងថា គ្រប់បេក្ខជនប្រឡងទាំងអស់និងអ្នកពាក់ព័ន្ធនានា បើធ្វើឱ្យបែកធ្លាយវិញ្ញាសាជាសាធារណៈ គឺជាប់ទោសព្រហ្មទណ្ឌ ហើយបើមានការបែកធ្លាយវិញ្ញាសាមែននោះ អង្គភាពប្រឆាំងអំពើពុករលួយនឹងបើកការស្រាវជ្រាវស៊ើបអង្កេតឃាត់ខ្លួនជនល្មើសឱ្យខាងតែបាន ។
ភាពសម្ងាត់នៃវិញ្ញាសាប្រឡង ជារឿយៗ ACUនិងក្រសួងអប់រំ តែងតែដាស់តឿនឱ្យបេក្ខជនប្រឡង អ្នកសង្កេតការណ៍ មេប្រយោគ គ្រូអនុរក្ស និងអ្នកពាក់ព័ន្ធនានា ហាមដាច់ខាតការថតវិញ្ញាសា និងការរក្សាភាពសំងាត់នៃវិញ្ញាសាដែលសូម្បីតែការថតរក្សាទុកផ្ទាល់ខ្លួនក៏មិនអនុញ្ញាតឱ្យថតដែរ ហើយអ្នកថតនោះបើចាប់បានក៏ត្រូវមានទោសដូចគ្នា។
សូមជម្រាបថា សម័យប្រឡងកាលពីឆ្នាំ២០១៧ មានបេក្ខជនដាក់ពាក្យប្រឡងចំនួន១០៣.១១២នាក់
និងមានមណ្ឌលប្រឡងចំនួន១៧៦ ចែកចេញជា៤.១៥៥បន្ទប់នៅទូទាំងប្រទេស ។
យោងតាមអ្នកនាំពាក្យក្រសួងអប់រំ យុវជននិងកីឡា លោក រស់ សាលីន បានឱ្យដឹងថា មណ្ឌលប្រឡង១នៅខេត្តកំពត ត្រូវបានប្តូរដោយសារតែមណ្ឌលប្រឡងសាលាគរុកោសល្យនិងវិក្រិតការខេត្តត្រូវទឹកភ្លៀងជន់លិច ដោយប្តូរទៅសាលាឯកជនវឌ្ឍនវិជ្ជាវិញ ។ចំណែកទឹកជំនន់ទន្លេមេគង្គ មិនមានផលប៉ះពាល់ទេ ៕
ចែករំលែកព័តមាននេះ