ខេត្តសៀមរាប ៖ ជនសង្ស័យជាជនជាតិចិន២នាក់បានធ្វើសកម្មភាពឆក់កាបូបលុយពីស្ត្រីអ្នកលក់ត្រីក្នុងផ្សារម្នាក់មិនបានសម្រេច ហើយក៏ត្រូវសមត្ថកិច្ចដេញតាមចាប់ខ្លួនបានជនសង្ស័យទាំង២នាក់នោះតែម្តង ។ ហេតុការណ៍នេះបង្កឱ្យមានការភ្ញាក់ផ្អើលបានកើតឡើងកាលវេលាម៉ោង៧និង៣០នាទីព្រឹកថ្ងៃទី១៨ ខែសីហា ឆ្នាំ២០១៨ ក្នុងផ្សារដំដែក ស្ថិតនៅតាមបណ្តោយផ្លូវជាតិលេខ៦…
ខេត្តសៀមរាប ៖ ជនសង្ស័យជាជនជាតិចិន២នាក់បានធ្វើសកម្មភាពឆក់កាបូបលុយពីស្ត្រីអ្នកលក់ត្រីក្នុងផ្សារម្នាក់មិនបានសម្រេច ហើយក៏ត្រូវសមត្ថកិច្ចដេញតាមចាប់ខ្លួនបានជនសង្ស័យទាំង២នាក់នោះតែម្តង ។ ហេតុការណ៍នេះបង្កឱ្យមានការភ្ញាក់ផ្អើលបានកើតឡើងកាលវេលាម៉ោង៧និង៣០នាទីព្រឹកថ្ងៃទី១៨ ខែសីហា ឆ្នាំ២០១៨ ក្នុងផ្សារដំដែក ស្ថិតនៅតាមបណ្តោយផ្លូវជាតិលេខ៦ ក្នុង ភូមិកំពង់គរ ឃុំគៀនសង្កែ ស្រុកសូទ្រនិគម ខេត្តសៀមរាប ។
ជនសង្ស័យទាំង២នាក់ខាងលើ ម្នាក់ឈ្មោះ LUO GONG CHEN ភេទប្រុស អាយុ៥៣ឆ្នាំ ជាជនជាតិ ចិន មុខរបរមិនពិតប្រាកដ ស្នាក់នៅរាជធានីភ្នំពេញ ជាអ្នកធ្វើសកម្មភាព និងម្នាក់ទៀតឈ្មោះ LUO BIN ភេទប្រុស អាយុ៤៣ឆ្នាំ ជាជនជាតិចិន កាន់លិខិតឆ្លងដែនថតចម្លងលេខ E១៨២៩៣១៤៧ មុខរបរមិនពិតប្រាកដ ស្នាក់នៅរាជធានីភ្នំពេញ ជាអ្នកបើកបរម៉ូតូចាំនៅខាងក្រៅ ។ ពួកគេទាំងពីរនាក់នេះធ្វើដំណើរពីភ្នំពេញមកកាន់ខេត្តសៀមរាបដោយជិះម៉ូតូមួយគ្រឿងម៉ាកស៊ុយហ្សុ៊យគីស្មាស់ ។ ចំណែកជនរងគ្រោះជាម្ចាស់កាបូបឈ្មោះ យឹម ចន្ថា ហៅស្រី ភេទស្រី អាយុ៥៦ឆ្នាំ មុខរបរលក់ត្រី មានទីលំនៅភូមិដំដែក ឃុំដំដែក ស្រុកសូទ្រនិគម ខេត្តសៀមរាប ។
តាមការឱ្យដឹងពីស្ត្រីរងគ្រោះបានរៀបរាប់ប្រាប់សមត្ថកិច្ចថា មុនពេលកើតហេតុ គាត់នៅលក់ត្រីក្នុងផ្សារដំដែក និងទុកកាបូបលុយដូចសពមួយដង ពេលកំពុងតែលក់ត្រីនោះក៏ឃើញជនសង្ស័យម្នាក់ចូលមកក្នុងផ្សារដើរទិញត្រី និងទិញបន្លែធម្មតា ប៉ុន្តែគាត់មិននឹកស្មានថា ជនសង្ស័យនោះមកឆក់យកកាបូបលុយរបស់គាត់សោះ ពេលឃើញទាន់ គាត់ក៏ប្រទាញប្រទង់គ្នា ដើម្បីដណ្តើមយកកាបូបលុយនោះមកវិញ ហើយបង្កឱ្យការភ្ញាក់ផ្អើលឆោឡោឡើងតែម្តង ចំណែកជនសង្ស័យក៏រត់ចេញទៅក្រៅបាត់ ។
ស្ត្រីដដែលបានបន្តថា នៅក្នុងផ្សារដំដែកនេះមិនដែលមានជនជាតិណាមកធ្វើសកម្មភាពប្លន់ ឬលួចយកអ្វីនោះទេ នេះគឺជាលើកទី១សម្រាប់ផ្សារដំដែក ។
លោកវរសេនីយ៍ឯក ណុប សារ៉ាក់ អធិការនគរបាលស្រុក បានឱ្យដឹងថា ក្រោយពេលទទួលបានព័ត៌មានពីប្រជាពលរដ្ឋនៅក្នុងផ្សារដំដែកថា មានជនសង្ស័យចូលក្នុងផ្សារ និងធ្វើសកម្មភាពឆក់កាបូបលុយពីអ្នកលក់ត្រីមិនបានសម្រេច ភ្លាមៗនោះលោកបានបញ្ជាឱ្យកម្លាំងផ្នែកព្រហ្មទណ្ឌនៃអធិការនគរបាលស្រុកសូទ្រនិគម និងប៉ុស្ដិ៍នគរបាលរដ្ឋបាល តាមមូលដ្ឋានចេញប្រតិបតិ្តការស្ទាក់តាមផ្លូវជាតិលេខ៦ ពេលនោះក៏បានឃើញជនសង្ស័យ២នាក់កំពុងជិះម៉ូតូម៉ាកស៊ុយហ្សុ៊យគីស្មាស់មួយគ្រឿងធ្វើដំណើរតាមផ្លូវជាតិលេខ៦ មានភិនភាគដូចពលរដ្ឋបានរាយការណ៍មែន សមត្ថកិច្ចក៏ធ្វើការឃាត់ខ្លួនជនសង្ស័យទាំង២នាក់ភ្លាមៗដើម្បីយកមកសួរនាំនៅអធិការស្រុក ទើបដឹងថាជនសង្ស័យជាជនជាតិចិនទាំង២នាក់នោះអត់ចេះនិយាយភាសាខ្មែរសោះ លោកក៏ឱ្យកម្លាំងជំនាញរៀបចំកសាងសំណុំរឿងបញ្ជូនទៅកាន់ការិយាល័យនគរបាលផ្នែកអន្តោប្រវេសន៍នៃស្នងការនគរបាលខេត្តភ្លាមៗដើម្បីចាត់ការបន្ត ។
បច្ចុប្បន្នជនសង្ស័យជាជនជាតិចិនទាំងពីរនាក់ខាងលើត្រូវបានលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាបសម្រេចឱ្យឃាត់ខ្លួនបណ្តោះអាសន្ននៅស្នងការដ្ឋាននគរបាលខេត្ត ដើម្បីបន្តការសាកសួរ៕
ចែករំលែកព័តមាននេះ