ប្រមុខរាជរដ្ឋាភិបាល អះអាងជាថ្មីពីការបញ្ចុះតម្លៃភ្លើងនៅឆ្នាំ2019

ថ្ងៃទី ១៧ ខែ សីហា ឆ្នាំ ២០១៨
ម៉ោង ១៤:៤៤
គង់ ម៉ាលីន

រាជធានីភ្នំពេញ ៖ ជាថ្មីម្តងទៀត ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែននាយករដ្ឋមន្ត្រី បានប្រកាសពីការបញ្ចុះតម្លៃអគ្គិសនី និងថ្លៃទឹកជាថ្មីនៅឆ្នាំ២០១៩ខាងមុខនេះ ។ ក្នុងឱកាសជួបសំណេះ សំណាលជាមួយកម្មករ និយោជិតប្រមាណជាង១៥.០០០នាក់នៅតាមតំបន់ផ្លូវជាតិលេខ៥ នាព្រឹកថ្ងៃទី១៥ សីហា សម្តេចតេជោបានមានប្រសាសន៍ថា តម្លៃអគ្គិសនី នឹងត្រូវបញ្ចុះបន្ថែមទៀត ដើម្បីផ្តល់ផលប្រយោជន៍ដល់ប្រជាពលរដ្ឋ និងវិស័យឧស្សាហកម្មកម្ពុជា ។

សម្តេចបន្តថា ចំណែកតម្លៃទឹកមិនទាន់កំណត់នៅឡើយទេ ដោយសារទឹកត្រូវការប្រើប្រាស់សារធាតុដើម្បីធ្វើឲ្យទឹកស្អាត ព្រោះទឹកនៅតំបន់មួយចំនួនត្រូវប្រើប្រាស់សារធាតុច្រើន ដើម្បីធ្វើឲ្យទឹកស្អាតនិងអាចប្រើប្រាស់បាន ។ សម្តេចបន្តថា ៖« កម្មករនិយោជិត នឹងទទួលបានផលប្រយោជន៍ផងដែរ តាមរយៈការប្រកួតប្រជែង និងការទទួលបានផលប្រយោជន៍ពីការបញ្ចុះតម្លៃអគ្គិសនី ដែលពួកគេនឹងទទួលបានផលប្រយោជន៍កាន់តែច្រើនពីការបញ្ចុះតម្លៃអគ្គិសនី »។ នៅក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ រាជរដ្ឋាភិបាលកម្ពុជា បានដាក់ចេញនូវការបញ្ចុះតម្លៃអគ្គិសនី, ការរៀបចំតំបន់ឧស្សាហកម្ម, ការបណ្តុះបណ្តាលធនធានមនុស្ស ដើម្បីប្រែក្លាយពីឧស្សាហកម្មដោយប្រើប្រាស់អតិពលកម្ម ទៅជាកម្លាំងពលកម្មជំនាញដែលអាចបង្កើត និងទាញយកតម្លៃបន្ថែមកាន់តែច្រើន ។

ទីប្រឹក្សាឧត្តមក្រុមប្រឹក្សាសេដ្ឋកិច្ចជាតិលោកបណ្ឌិត ម៉ី កល្យាណ បានថ្លែងថា បញ្ហាប្រឈមរបស់សេដ្ឋកិច្ចកម្ពុជា គឺតម្លៃអគ្គិសនីថ្លៃជាងគេ បើធៀបនឹងប្រទេសនៅក្នុងតំបន់។ បន្ថែមលើនេះ ការដឹកជញ្ជូន និងធនធានមនុស្សក៏ជាបញ្ហាដែរ ប៉ុន្តែបញ្ហាទាំងនេះ រាជរដ្ឋាភិបាលបាននិងកំពុងដោះស្រាយហើយដើម្បីឈានទៅអភិវឌ្ឍន៍សេដ្ឋកិច្ចរបស់ខ្លួន ។ លោកបន្តថា ៖« គោលនយោបាយអភិវឌ្ឍន៍វិស័យឧស្សាហកម្ម ជាគោលនយោបាយមួយ ដែលរុញសេដ្ឋកិច្ចកម្ពុជាទៅកាន់លំដាប់ថ្មីមួយទៀត ព្រោះគោលនយោបាយដែលមានពីមុន វាប្រៀបដូចជារថយន្តចាស់ ហេតុនេះយើងត្រូវមានរថយន្តថ្មី ដែលអាចឲ្យរថយន្តរបស់យើងរត់បានលឿនជាងមុន »។ លោកបន្តថា ៖« ការដោះស្រាយបញ្ហាទាំងនេះ វាទាមទារពេលវេលា ប៉ុន្តែការដោះស្រាយបានឬមិនបាន វាទាមទារឆន្ទៈនយោបាយ »។

គួររំលឹកថា នៅថ្ងៃបិទបញ្ចប់យុទ្ធនាការឃោសនាបោះឆ្នោត សម្ដេចតេជោ ហ៊ុន សែន បានថ្លែងបញ្ជាក់ថា ការងារអាទិភាពសំខាន់មួយក្នុងចំណោមការងារអាទិភាពសំខាន់ផ្សេងៗទៀតរបស់រាជរដ្ឋាភិបាលដែលដឹកនាំដោយគណបក្សប្រជាជនកម្ពុជានោះ គឺការបញ្ចុះតម្លៃអគ្គិសនី ដែលនឹងនាំប្រយោជន៍ដល់ប្រជាជនគ្រប់រូប ។

សម្តេចតេជោបានប្រកាសថា ការដាក់ចេញនូវការបញ្ចុះតម្លៃអគ្គិសនីជូនប្រជាពលរដ្ឋនេះ មិនត្រឹមតែបានជួយសម្រួលដល់ជីវភាពរបស់ប្រជាពលរដ្ឋនោះទេ ប៉ុន្តែផ្នែកពាក់ព័ន្ធផ្សេងទៀតជាមួយអគ្គិសនី ក៏ទទួលបានប្រយោជន៍ដែរ ក្នុងនោះពេលតម្លៃអគ្គិសនីចុះ តម្លៃទឹកនឹងចុះថ្លៃដែរ, នៅពេលតម្លៃអគ្គិសនីធ្លាក់ចុះ ម្ចាស់រោងចក្រនិងម្ចាស់អាជីវកម្ម នឹងទទួលបានប្រាក់ចំណេញកើនឡើង ដូច្នេះលទ្ធភាពការដំឡើងប្រាក់ខែជូនកម្មករ កម្មការិនី ក៏កាន់តែប្រសើរផងដែរ ។ សម្តេចតេជោ ហ៊ុន សែន បានថ្លែងថា ៖ « ការបញ្ចុះថ្លៃអគ្គិសនី នឹងបានជាប្រយោជន៍ដល់ប្រជាជនគ្រប់រូបតាមរយៈនៃការបញ្ចុះថ្លៃអគ្គិសនី ។ ខ្ញុំសូមយកឱកាសនេះដើម្បីបញ្ជាក់ជូនថា ក្នុងនាមជាអនាគតនៃនាយករដ្ឋមន្ត្រីបន្ត ខ្ញុំនឹងបញ្ជាទៅស្ថាប័នពាក់ព័ន្ធ ជាពិសេសក្រសួងឧស្សាហកម្ម និងសិប្បកម្ម ឲ្យរកវិធីបញ្ចុះថ្លៃទឹកបន្ថែមទៀត ព្រោះថ្លៃភ្លើងក៏ជាផ្នែកមួយទាក់ទងទៅដល់តម្លៃទឹក នៅពេលដែលតម្លៃភ្លើងត្រូវបានធ្លាក់ចុះ នៅពេលខាងមុខតម្លៃទឹក ក៏ត្រូវមានការធ្លាក់ចុះទៅតាមនោះដែរ ទោះបីតិច ទោះបីច្រើន ព្រោះថាទឹកនៅកន្លែងនីមួយៗ មិនដូចគ្នានោះទេ កន្លែងខ្លះត្រូវប្រើប្រាស់នូវថ្លៃដើមខ្ពស់ និងកន្លែងខ្លះមានថ្លៃដើមទាប ដែលមានតម្លៃលក់នៅតាមទីកន្លែងខុសៗគ្នា »។

សម្តេចតេជោបានបន្ថែមថា ៖« ការបញ្ចុះថ្លៃអគ្គិសនី វាក៏នាំមកនូវការប្រកួតប្រជែងរវាងកម្ពុជា ជាមួយនឹងប្រទេសជិតខាង ដែលក្នុងនោះការបញ្ចុះថ្លៃអគ្គិសនី វាមិនគ្រាប់តែសម្រួលដល់ម្ចាស់រោងចក្រ ម្ចាស់សណ្ឋាគារ និងម្ចាស់អាជីវកម្មប៉ុណ្ណោះទេ ក៏ប៉ុន្តែប្រាក់ដែលចំណេញ ពីការបញ្ចុះថ្លៃអគ្គិសនី វានឹងបានទៅជាផលប្រយោជន៍ ដែលដំឡើងដល់ប្រាក់បៀវត្សសម្រាប់កម្មករ កម្មការិនី ដែលធ្វើការនៅទីនោះ » ៕