ខេត្តកណ្ដាល ៖ បុរសជាបុគ្គលិកក្រុមហ៊ុនម្នាក់បែកគំនិតដោយប្រើល្បិចជាជួលរថយន្ដគេចំនួន២គ្រឿងរួចយករថយន្ដនោះទៅបញ្ចាំដើម្បីយកប្រាក់តែត្រូវម្ចាស់រថយន្ដដឹងបានប្ដឹងនគរបាលឲ្យធ្វើការចាប់ខ្លួន ។ ហេតុការណ៍នេះកាលពីវេលាម៉ោង០១និង១០នាទីរសៀល ថ្ងៃទី១៦ ខែសីហា ឆ្នាំ២០១៨ ស្ថិតក្នុងភូមិព្រែករុន ឃុំព្រែកគយ ស្រុកស្អាង ខេត្តកណ្ដាល ។
នគរបាលស្រុកស្អាងបានឲ្យដឹងថា ជនសង្ស័យឈ្មោះ ឃិន វឌ្ឍនា ភេទប្រុស អាយុ២៦ឆ្នាំ ជនជាតិខ្មែរ មុខរបរបុគ្គលិកក្រុមហ៊ុន មានទីលំនៅភូមិព្រែករុន ឃុំព្រែកគយ ស្រុកស្អាង ខេត្តកណ្ដាល ។ រីឯជនរងគ្រោះឈ្មោះ សេង ប៊ុនសិញ ភេទប្រុស អាយុ៤១ឆ្នាំ ជនជាតិខ្មែរ មុខរបរលក់ដូរ មានទីលំនៅភូមិព្រែកស្នាយ ឃុំព្រែកគយ ស្រុកស្អាង ខេត្តកណ្ដាល ។
ដោយឡែកទ្រព្យសម្បត្តិបាត់បង់មាន រថយន្តចំនួន២គ្រឿងម៉ាក LEXUS RX-300 ពាក់ស្លាកលេខ ភ្នំពេញ 2AU-7052 ចំនួន១គ្រឿង និងរថយន្ដម៉ាក HYUNDAI ពាក់ស្លាកលេខ ភ្នំពេញ 3B-9486 ចំនួន១គ្រឿង និងប្រាក់ដល្លារចំនួន៦៦៣០ដុល្លារ ។
នគរបាលបញ្ជាក់ថា កាលពីរយៈពេល២ខែកន្លងទៅជនសង្ស័យបានជួលរថយន្ដរបស់ជនរងគ្រោះចំនួន២គ្រឿងដោយពុំដឹងថា ជនសង្ស័យយករថយន្ដ២គ្រឿងនោះទៅឯណានោះទេ លុះមកដល់ថ្ងៃទី១៦ ខែសីហា ឆ្នាំ២០១៨ ជនរងគ្រោះបានលក់រថយន្ដទៅឲ្យជនសង្ស័យមួយគ្រឿងទៀតម៉ាក COROLA ស៊េរីឆ្នាំ1994 ក្នុងតំលៃ៣៩០០ដុល្លារ តែជនសង្ស័យពុំទាន់ប្រគល់ប្រាក់ទៅឲ្យជនរងគ្រោះនោះទេ ដោយបានធ្វើកិច្ចសន្យាប្រគល់ប្រាក់គ្រប់ចំនួននៅម៉ោង០២រសៀល ថ្ងៃខែដដែល ទៅឲ្យជនរងគ្រោះ ។
លុះមកដល់វេលាម៉ោង០២រសៀលជាពេលវេលាដែលជនសង្ស័យកំណត់ប្រគល់ប្រាក់ឲ្យជនរងគ្រោះស្រាប់តែជនសង្ស័យពុំបានប្រគល់ប្រាក់ឲ្យជនរងគ្រោះដូចដែលបានកំណត់ក្នុងកិច្ចសន្យានោះទេ ភ្លាមនោះជនរងគ្រោះមានការសង្ស័យថា ជនសង្ស័យមានគំនិតមិនល្អក៏សួរដេញដោលអំពីរថយន្ដចំនួន២គ្រឿងបន្ថែមទៀតដែលជនសង្ស័យបានជួលអស់រយៈពេល២ខែកន្លងទៅ ។
ក្រោយពីជនរងគ្រោះជាម្ចាស់រថយន្ដសួររួចជនសង្ស័យបានឆ្លើយថា រថយន្តទាំង២គ្រឿងនោះ ខ្លួនបានយកទៅដាក់បញ្ចាំនៅទៅឲ្យឈ្មោះ ផល វិចិត្រ ភេទប្រុស អាយុជាង៣០ឆ្នាំ លក់សាំងនៅគល់ស្ពានព្រែកសំរោង ក្រុងតាខ្មៅ ត្រើយខាងកើត ក្នុងតំលៃ១៥០០០ដុល្លារ ។ ទន្ទឹមដែលជនសង្ស័យជួលរថយន្ដនោះផងដែរ ជនសង្ស័យក៏បានចងការប្រាក់ពីជនរងគ្រោះចំនួនសរុប២៧៣០ដុល្លារ នៅថ្ងៃទី២ ខែសីហា ឆ្នាំ២០១៨ បន្ថែមទៀតដោយនិយាយថា យកទៅទិញប្រេង ។
ប្រភពដដែលបន្ដទៀតថា ក្រោយពីជនរងគ្រោះស្ដាប់ការរៀបរាប់របស់ជនសង្ស័យរួចភ្លាមនោះជនរងគ្រោះបានទៅដាក់ពាក្យបណ្ដឹងប្ដឹងសមត្ថកិច្ចស្រុកស្អាងដើម្បីចាត់ការតាមនីតិវិធីច្បាប់ ។ ក្រោយពីសមត្ថកិច្ចទទួលបានពាក្យបណ្ដឹងពីជនរងគ្រោះភ្លាមនោះសមត្ថកិច្ចក៏បានទៅធ្វើការឃាត់ខ្លួនជនសង្ស័យខាងលើបញ្ជូនទៅកាន់អធិការដ្ឋានដ្ឋាននគរបាលស្រុកដើម្បីកសាងសំណុំរឿងបញ្ជូនទៅកាន់សាលាដំបូងខេត្ដដើម្បីចាត់ការបន្ដ ៕
ចែករំលែកព័តមាននេះ