ខេត្តកំពង់ស្ពឺ ៖ ឈើមួយឡានធំដែលឈ្មួញដឹកប្រុងលោតឆ័ត្រទៅលក់នៅខេត្តតាកែវនោះពេលនេះត្រូវសមត្ថកិច្ចមេព្រៃធ្វើការបង្ក្រាបទាំងឈើទាំងឡាន ខណៈពីដើមមកការចរាចរណ៍របស់ឈ្មួញដ៏ធំមួយនេះ រួចផុតពីការបង្ក្រាបគ្រប់ពេល ។
តៃកុងឡានដឹកឈើត្រូវបានស្គាល់ និងដឹងថា ជាប្អូនបង្កើតរបស់ឈ្មួញឈើណុបឌីតែម្តង គឺឈ្មោះ វឿន រស់នៅភូមិដំបងវេញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ ។
ការឃាត់ឡានដឹកឈើនេះធ្វើឡើងនៅចំណុចផ្លូវ១៤៤០ នាវេលាម៉ោង១២ និង៣០នាទីយប់ថ្ងៃទី១៥ សីហា ២០១៨ តាំងក្រសាំង ឃុំព្នាយ ស្រុកសំរោងទង ខេត្តកំពង់ស្ពឺ ឡានប្រភេទហ៊ីយ៉ានដាយ ពណ៌ស ពាក់ស្លាកលេខ ភ្នំពេញ 3B-4905 ។
បើតាមប្រភពបានឲ្យដឹងថា តាមការពិតឡានដឹកឈើរបស់ឈ្មួញខាងលើមាន០២គ្រឿង ដែលដឹកឈើចេញពីខេត្តពោធិ៍សាត់តាមច្រកអូរត្រាវ ឆ្លងកាត់អូររទេះភ្លូកកាត់ផ្លូវខាងលើឡើងទៅក្រុងច្បារមនបន្តទៅខេត្តតាកែវ តែជាអកុសលក៏ជួបជាមួយអ្នកកាសែតមួយក្រុមដែលមានទាំងប៉េអឹមផង បានស្ទាក់ឃាត់នៅចំណុចខាងលើ ដោយបានចចារគ្នា ពេលនោះឈ្មួញបានចំណាយលុយដល់សមត្ថកិច្ចទាំងនោះជាថ្នូរ នឹងដោះតៃកុងឡាន និងលែងឡានយីឌុបមួយគ្រឿងផ្សេងទៀតឲ្យរួចផុតពីការចាប់ខ្លួន ។ ប្រភពបន្តថា ក្រោយមកដំណឹងនេះក៏ដឹងដល់អស់លោកមេព្រៃក៏ចុះទៅចាប់ឃាត់រថយន្តខាងលើតែម្តង ។
បន្ទាប់ពីមេព្រៃទៅដល់ក៏ធ្វើការអូសយករថយន្តខាងលើទៅកាន់រដ្ឋបាលព្រៃឈើកំពង់ស្ពឺ ដើម្បីធ្វើការវាស់វែង និងចាត់វិធានការតាមច្បាប់ស្តីពីព្រៃឈើ ។
បើតាមមន្ត្រីរដ្ឋបាលព្រៃឈើបានប្រាប់ថា រហូតមកដល់ពេលនេះ ក្រោយវាស់វែងរួច រកឃើញថា ឡានដែលមេព្រៃឃាត់បានមានចំនួនឈើសរុបជាង៥ម៉ែត្រត្រីគុណ ។ ដោយឡែកចំពោះការលើកឡើងថា មានឡានយីឌុបរត់រួច០១គ្រឿងនោះខាងមេព្រៃមិនបានដឹងឡើយ គឺពេលទីដល់ឃើញតែមួយគ្រឿងខាងលើប៉ុណ្ណោះ ៕
ចែករំលែកព័តមាននេះ