ខេត្តរតនគិរី ៖ បុរសម្នាក់ដើររកជីកដំឡូងព្រៃតាមចម្ការកៅស៊ូធ្លាក់រណ្តៅជីកត្បូងស្លាប់ភ្លាមៗយ៉ាងអាណោចអាធម៌នៅកន្លែងកើតហេតុ ។ ហេតុការណ៍នេះបានកើតឡើងនៅវេលាម៉ោង៨និង៣០នាទីព្រឹកថ្ងៃទី១៥ ខែសីហា ឆ្នាំ២០១៨ នៅចំណុចកើតហេតុ ស្ថិតនៅចម្ការកៅស៊ូឈ្មោះ ម៉ៅ ផល្លី ក្នុងភូមិ១ ឃុំឡាមិញ ស្រុកបរកែវ ។
បើតាមរបាយការណ៍សមត្ថកិច្ចប៉ូលិសស្រុកបរកែវបានឲ្យដឹងថា ជនរងគ្រោះមានឈ្មោះ ឡែវ សុផាត ភេទប្រុស អាយុ៤២ឆ្នាំ មុខរបរកសិករ ជនជាតិខ្មែរ រស់នៅភូមិមួយ ឃុំឡាមិញ ស្រុកបរកែវ ។
ក្រោយពីកើតហេតុសមត្ថកិច្ចប៉ូលិសឃុំ និងស្រុកបានចុះទៅកន្លែងកើតហេតុបានធ្វើកោសល្យវិច្ច័យលើសពជនរងគ្រោះ លទ្ធផលឃើញថា សពជនរងគ្រោះខាងលើពិតជាបានធ្លាក់រណ្តៅដីស្លាប់ពិតប្រាកដមែន គ្មានរឿងឃាតកម្មកើតឡើងនោះទេ ។ ស្ថានភាពនៅកន្លែងកើតហេតុជនរងគ្រោះបានធ្លាក់រណ្តៅជីកត្បូងជម្រៅជាង២០ម៉ែត្រ ហើយនៅលើដងខ្លួនសពមានស្នាមរបួសទី១- បាក់.ក ទី២- ខ្ទាំពេញខ្លួន បច្ចុប្បន្នសមត្ថកិច្ចបានប្រគល់សពជនរងគ្រោះទៅឲ្យបងប្អូនសាច់ញាតិយកទៅធ្វើបុណ្យតាមប្រពៃណី ។
សមត្ថកិច្ចបានបញ្ជាក់ទៀតថា ដំណើររឿងមុនដំបូងជនរងគ្រោះរួមទាំងអ្នកភូមិ៣-៤នាក់ទៀត បាននាំគ្នាទៅរកជីកដំឡូងព្រៃឃ្លាតពីផ្ទះជនរងគ្រោះចំងាយ៧០០-៨០០ម៉ែត្រ ហើយតំបន់ដែលគាត់រកជីកដំឡូងព្រៃនោះ ជាភូមិសាស្ត្ររណ្តៅជីកត្បូង រាប់ពាន់រណ្តៅ បណ្តាលឲ្យគាត់ដើរផុងធ្លាក់រណ្តៅស្លាប់យ៉ាងអាណោចអាធម៌ ៕
ចែករំលែកព័តមាននេះ