ខេត្តសៀមរាប៖ បុរសជនជាតិអាមេរិកាំងម្នាក់ដេកស្លាប់នៅក្នុងបន្ទប់លេខ១១១ ក្នុងសណ្ឋាគារមួយក្នុងក្រុងសៀមរាប យីហោ GOLDENBUTTERFLYVILLA ត្រូវបានបុគ្គលិកសណ្ឋាគារប្រទះឃើញបង្កឱ្យមានការភ្ញាក់ផ្អើលពេញសណ្ឋាគារកាលពីវេលាម៉ោងប្រហែល២រសៀលថ្ងៃទី១៤ ខែសីហា ឆ្នាំ២០១៨ ស្ថិតនៅភូមិស្ទឹងថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប ។
ជនរងគ្រោះដែលស្លាប់ឈ្មោះ GILDRED JOSEPH DANIEL ភេទប្រុស អាយុ៤១ឆ្នាំ ជាជនជាតិអាមេរិកាំង កាន់លិខិតឆ្លងដែនលេខ៤៨៤០៨១៣៨៨ ជាភ្ញៀវទេសចរណ៍ ។
តាមប្រភពពីសមត្ថកិច្ចនគរបាលជំនាញខេត្តបានប្រាប់ឱ្យដឹងថា សមត្ថកិច្ចជំនាញបានទទួលព័ត៌មានពីបុគ្គលិកសណ្ឋាគារ GOLDENBUTTERFLYVILLAថា មានករណីជនបរទេសម្នាក់ស្លាប់ ភ្លាមៗនោះសមត្ថកិច្ចក៏បានចុះទៅដល់កន្លែងកើតហេតុ រួចពិនិត្យឃើញថា បុរសរងគ្រោះជាជនជាតិអាមេរិកាំងបានដេកស្លាប់នៅក្នុងបន្ទប់លេខ១១០នៃសណ្ឋាគារ GOLDENBUTTERFLYVILLA។
ប្រភពដដែលបានបន្តថា បុរសជាជនរងគ្រោះខាងលើចូលមកព្រះរាជាណាចក្រកម្ពុជាកាលពីថ្ងៃទី១ ខែ សីហា ឆ្នាំ ២០១៨ តាមច្រកព្រលានយន្តហោះអន្តរជាតិសៀមរាប ស្នាក់នៅបន្ទប់លេខ១១១ សណ្ឋាគារ GOLDENBUTTERFLYVILLA ភូមិស្ទឹងថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប។
ក្រោយកើតហេតុ សមត្ថកិច្ចជំនាញសហការជាមួយពេទ្យបង្អែកខេត្តចុះមកពិនិត្យសព ព្រមទាំងផ្អែកតាមការស្រាវជ្រាវរបស់សមត្ថកិច្ចជំនាញ និងលោកវេជ្ជបណ្ឌិត គង់ រិទ្ធី ជាគ្រូពេទ្យនៅមន្ទីរពេទ្យបង្អែកខេត្តសៀមរាប បន្ទាប់មកបានសន្និដ្ឋានថា ជនរងគ្រោះបានស្លាប់តាំងពីថ្ងៃទី១៣ ខែសីហា ឆ្នាំ២០១៨ មកម្ល៉េះ ដោយសារជម្ងឺស្ទះសរសៃឈាមបេះដូង និងដាច់សរសៃឈាមខួរក្បាល។
បច្ចុប្បន្ន សពជនរងគ្រោះខាងលើត្រូវបានសមត្ថកិច្ចនគរបាលជំនាញកំពុងរៀបចំបញ្ជូនទៅតម្កល់ទុកបណ្តោះអាសន្ននៅមន្ទីរពេទ្យមិត្តភាពខ្មែរសូវៀត (ពេទ្យរុស្ស៊ី) នៃរាជធានីភ្នំពេញតាមសំណូមពររបស់ក្រុមគ្រួសារនិងតំណាងស្ថានទូតអាមេរិក៕
ចែករំលែកព័តមាននេះ