រាជធានីភ្នំពេញ ៖ សមត្ថកិច្ចប៉ុស្តិ៍ទំនប់ទឹកល្បាតជិះកាត់តាមផ្លូវ៥១ ក៏ប្រទះឃើញជនសង្ស័យ ស្របពេលនោះមានគេស្រែកថាចោរៗ ទើបជិះម៉ូតូដេញតាមមកដល់ម្តុំបឹងកក់វិហារចាមក៏ឃាត់បានជនសង្ស័យ២នាក់យកទៅសួរនាំ ។ ហេតុការណ៍នេះបានកើតឡើងកាលពីវេលាម៉ោង១១និង៣០នាទីយប់ថ្ងៃទី១២ ខែសីហា ឆ្នាំ២០១៨ តាមបណ្តោយផ្លូវបេតុង នៅចំណុចប្លុកបឹងកក់វិហារចាម ស្ថិតនៅក្នុងសង្កាត់ស្រះចក ខណ្ឌដូនពេញ ។
តាមប្រភពព័ត៌មានពីសាក្សីដែលឃើញហេតុការណ៍បានឱ្យដឹងថា មុនពេលកើតហេតុ គេបានឃើញសមត្ថ
កិច្ចប៉ុស្តិ៍ទំនប់ទឹកម្នាក់កំពុងតែជិះម៉ូតូល្បាតកាត់តាមផ្លូវ៥១ សង្កាត់បឹងកេងកង១ ខណ្ឌចំការមន បើកបរក្នុងទិសដៅពីជើងទៅត្បូង ក៏ស្រាប់តែប្រទះឃើញជនសង្ស័យ២នាក់ជិះម៉ូតូមួយគ្រឿងម៉ាកស្មាស ពណ៌ក្រហមលាយខ្មៅ ពាក់ស្លាកលេខ ភ្នំពេញ ១CK-៤៣៨១ បើកបរតាមបណ្តោយផ្លូវ៥១ ក្នុងទិសដៅពីត្បូងទៅជើង ហើយមានគេតាមស្រែកពីក្រោយថាចោរៗ ។
ប្រភពដដែលបានបន្តថា ឮគេស្រែកចោរៗដូច្នេះ ធ្វើឱ្យសមត្ថកិច្ចសង្ស័យថាជាករណីឆក់ទូរស័ព្ទដៃ ឬមួយឆក់កាបូប ទើបសមត្ថកិច្ចជួយដេញតាមរហូតទៅដល់ចំណុចម្តុំបឹងកក់វិហារចាម ទើបឃាត់បានទាំង២នាក់តែម្តង ហើយជនសង្ស័យទាំង២នាក់ខាងលើត្រូវបានប្រជាពលរដ្ឋព្រួតគ្នាវាយម្នាក់មួយដៃម្នាក់មួយជើង បណ្តាលឱ្យរងរបួសយ៉ាងដំណំ ហើយយុវជនជាជនសង្ស័យទាំង២នាក់នោះបានឆ្លើយប្រកែកថា ខ្លួនមិន
មែនជាចោរឆក់នោះទេ គឺពួកខ្លួនទាំង២នាក់ទើបតែចេញមកពីផ្លូវស្ពានអាកាស៥មករា ហើយក៏មានជនសង្ស័យចំនួន៤នាក់ជិះម៉ូតូហុងដាឌ្រីម២គ្រឿងដេញវាយពួកខ្លួន រួចស្រែកថាចោរៗ ទើបពួកខ្លួនបើកម៉ូតូគេចខ្លួនក៏ជួបរឿងបែបនេះតែម្តង ។
ក្រោយពេលកើតហេតុ សមត្ថកិច្ចក៏បានឃាត់ខ្លួនជនសង្ស័យទាំង២នាក់យកទៅប៉ុស្តិ៍បឹងកេងកង១ដើម្បីសួរនាំរួចចាត់ការទៅតាមនីតិវិធី ៕
ចែករំលែកព័តមាននេះ