រាជធានីភ្នំពេញ ៖ បុរសម្នាក់សង្ស័យជាជនអនាថាដើរឆ្លងផ្លូវទាំងងងឹត ហើយមេឃកំពុងតែរលឹមស្រិចៗ ត្រូវម៉ូតូបុកបោកនឹងថ្នល់ បណ្តាលឲ្យបែកក្បាលស្លាប់នៅនឹងកន្លែងកើតហេតុ បង្កឲ្យមានការភ្ញាក់ផ្អើលកាលពីវេលាម៉ោង១១យប់ថ្ងៃទី១២ ខែសីហា ឆ្នាំ២០១៨ នៅតាមបណ្ដោយផ្លូវជាតិលេខ៤ មុខទីស្នាក់ការប៉ុស្តិ៍នគរបាលកំបូល ស្ថិតនៅភូមិព្រៃបឹង សង្កាត់កន្ទោក ខណ្ឌពោធិ៍សែនជ័យ។
ជនរងគ្រោះដែលស្លាប់មិនត្រូវបានស្គាល់អត្តសញ្ញាណ ស្លៀកខោកីឡាពណ៌ខៀវ អត់ពាក់អាវ មានអាយុជាង៣០ឆ្នាំ សម្បុរខ្មៅស្រអែម។
តាមប្រភពព័ត៌មានពីអ៊ំស្រីម្នាក់បាននិយាយថា ជនរងគ្រោះខាងលើសង្ស័យថាជាមនុស្សអនាថា តែងតែដើរតាមដងផ្លូវជារៀងរាល់ថ្ងៃ ហើយមិនដឹងថាមានបងប្អូននៅទីណានោះឡើយ។
តាមប្រភពព័ត៌មានពីសមត្ថកិច្ចនគរបាលប៉ុស្តិ៍កំបូលម្នាក់បាននិយាយថា គាត់ដឹងព័ត៌មានខាងលើតាមរយៈពលរដ្ឋបានប្រាប់ថា ឃើញជនរងគ្រោះខាងលើដើរតាមបណ្ដោយផ្លូវជាតិលេខ៤ក្នុងទិសដៅពីលិចទៅកើត លុះដើរមកដល់ចំណុចកើតហេតុ ជនរងគ្រោះខាងលើដើរឆ្លងផ្លូវពីត្បូងទៅជើងបានបន្តិច ស្រាប់តែមានម៉ូតូមួយគ្រឿងមិនចាំម៉ាក មិនដឹងជិះគ្នាប៉ុន្មាននាក់នោះឡើយបានបុកបុរសជាជនរងគ្រោះខាងលើពេញទំហឹង បណ្តាលឱ្យដួលបោកនឹងថ្នល់បែកក្បាលស្លាប់នៅកន្លែងភ្លាមៗតែម្តង។ ចំណែកជនបង្កបានលើកម៉ូតូជិះគេចខ្លួនបាត់ស្រមោល ។
ក្រោយពេលកើតហេតុ កម្លាំងនគរបាលប៉ុស្តិ៍កំបូលបានទាក់ទងទៅជំនាញផ្នែកសណ្តាប់ធ្នាប់ចរាចរណ៍ខណ្ឌពោធិ៍សែនជ័យដើម្បីមកពិនិត្យទីតាំងកន្លែងកើតហេតុ រួចហើយជនរងគ្រោះដោយមិនមានសាច់ញាតិ សពត្រូវបានយកទៅតម្កល់ទុកនៅវត្តទឹកថ្លារង់ចាំសាច់ញាតិមកទទួលយកទៅធ្វើបុណ្យតាមប្រពៃណី ៕
ចែករំលែកព័តមាននេះ