រាជធានីភ្នំពេញ ៖ សកម្មភាពលើកដាក់ទំនិញនានានៅកំពង់ផែស្វយ័តក្រុងភ្នំពេញ ត្រូវបានរុះរើទៅកាន់ស្រុកកៀនស្វាយ ខេត្តកណ្តាលហើយ នៅសល់តែសកម្មភាពបន្ទាប់បន្សំប៉ុណ្ណោះ ខណៈដែលផ្ទាំងបង្ហាញពីគម្រោងអភិវឌ្ឍន៍ « មជ្ឈមណ្ឌលពាណិជ្ជកម្មចម្រុះ The City Gate » ដែលវិនិយោគដោយក្រុមហ៊ុន ចៀន ឈឹង ថៃ ជាបុត្រសម្ព័ន្ធរបស់ក្រុមហ៊ុន Yuetai Group ត្រូវបានលើកដើម្បីបង្ហាញពីការអនុវត្តគម្រោងនេះ ។
ដីនៅទីតាំងនេះត្រូវបានជួលទៅឲ្យក្រុមហ៊ុនខាងលើរយៈពេល៥០ឆ្នាំ ដោយគិតចាប់ពីថ្ងៃទី២៩ ខែមិថុនា ឆ្នាំ២០១៨ រហូតដល់ថ្ងៃទី២៨ ខែមិថុនា ឆ្នាំ២០៦៨ ដែលមានកំណត់ក្នុងអនុក្រឹត្យលេខ៣២ អនក្រ.បក ចុះថ្ងៃទី៩ ខែមីនា ឆ្នាំ២០១៨ ស្ដីពីការធ្វើអនុបយោគទីតាំងដីនៅបណ្ដោយទន្លេសាប ពីស្ពានជ្រោយចង្វា មកដល់ផ្សាររាត្រី ។ ចំណែកប្រាក់ឈ្នួលលើការជួលដីនេះ គឺជាការបង់ប្រាក់ឈ្នួលផ្ដាច់តែម្ដងក្នុងចំនួន១៦,៥លានដុល្លារអាមេរិកសម្រាប់រយៈពេល៥០ឆ្នាំ រួមបញ្ចូលទាំងអាករលើតម្លៃបន្ថែម (VAT) ចំនួន១០% ។ នេះបើយោងតាមសេចក្តីប្រកាសរបស់កំពង់ផែស្វយ័តក្រុងភ្នំពេញ ។
សេចក្ដីប្រកាសបានបញ្ជាក់ថា គម្រោង «មជ្ឈមណ្ឌលពាណិជ្ជកម្មចម្រុះ The City Gate» នេះ រួមមាន ៖
១-អគារបណ្ដុំការិយាល័យពាណិជ្ជកម្ម ២-មជ្ឈមណ្ឌលសិល្បៈ ៣-ទីធ្លាសម្ដែងវប្បធម៌សិល្បៈ ៤-ទីធ្លាសម្រាប់បាញ់ទឹក ៥-របាំទឹក និងផ្សារអណ្ដែតទឹក ៦-សួនកំពង់ផែ ៧-ទីធ្លាកម្សាន្ដ និងសួនច្បារធារណៈ
៨-មជ្ឈមណ្ឌលទេសចរណ៍ ៩-រាជធានីភ្នំពេញដ៏ឆ្លាតវៃ ១០-ការិយាល័យបច្ចេកវិទ្យា ១១-អគារស្នាក់នៅរួមបែបវប្បធម៌ ១២-អគារស្នាក់នៅរួមបែបច្នៃប្រឌិតទំនើប និងសណ្ឋាគារលំដាប់ផ្កាយប្រាំ ១៣-សាលតាំងពិព័រណ៍, មជ្ឈមណ្ឌល បេតិកភណ្ឌអរូបី និងសិប្បកម្ម, វិចិត្រសាលបែបវប្បធម៌ព្រះពុទ្ធសាសនា និងសកម្មភាពផ្សេងៗទៀត ។
សេចក្តីប្រកាសបានសង្កត់ធ្ងន់ថា ក្រៅពីប្រគល់ប្រាក់ឈ្នួលជាង១៦លានដុល្លារដល់កម្ពុជាហើយនោះ ក្រុមហ៊ុននេះក៏បានយល់ព្រមចេញចំណាយផ្ទាល់ខ្លួនសាងសង់ហេដ្ឋារចនាសម្ព័ន្ធជូនកំពង់ផែស្វយ័តក្រុងភ្នំពេញផងដែរ ក្នុងនោះ សាងសង់ច្រាំងទន្លេពីគល់ស្ពានជ្រោយចង្វា ដល់ផ្សាររាត្រីមាត់ទន្លេ ចំណាយទឹកប្រាក់១៩លានដុល្លារអាមេរិក, សាងសង់ផ្លូវថ្មើរជើង និងផ្លូវសម្រាប់រថយន្តធុនតូច ស្របតាមមាត់ទន្លេ ពីគល់ស្ពាន ដល់ផ្សាររាត្រី ចំណាយទឹកប្រាក់១១លានដុល្លារអាមេរិក ។ បន្ថែមពីលើនេះ ក្រុមហ៊ុនក៏បានយល់ព្រមសាងសង់អគាររដ្ឋបាលថ្មីជូនកំពង់ផែស្វយ័តក្រុងភ្នំពេញ មានទឹកប្រាក់១១លានដុល្លារអាមេរិក និងសាងសង់ចំណតផែពហុបំណងថ្មីចំនួន២ ដែលមានទឹកប្រាក់ចំនួន៣០លានដុល្លារអាមេរិកផងដែរ ។
អ្នកនាំពាក្យសាលារាជធានីភ្នំពេញ លោកមាស ម៉េតភ័ក្តី បានបដិសេធមិនអត្ថាធិប្បាយលម្អិតពីគម្រោងអភិវឌ្ឍន៍នៅតំបន់នេះទេ ប៉ុន្តែលោកមានប្រសាសន៍ថា ៖« ប្រសិនជាប្រទេសយើងគ្មានសុខសន្តិភាព ស្ថិរភាពនយោបាយ និងគ្មានសក្តានុពលវិនិយោគទេ អ្នកវិនិយោគអន្តរជាតិ នឹងមិនមកបោះទុនរាប់ពាន់លានដុល្លារនៅទីនេះដែរ » ។ អ្នកជំនាញផ្នែកអចលនទ្រព្យលំដាប់អន្តរជាតិ បានសម្តែងនូវសុទិដ្ឋិនិយមពីគម្រោងអភិវឌ្ឍន៍ធំៗទាំងនេះនៅរាជធានីភ្នំពេញ ។
អ្នកនាង Grace Rachny Fong នាយិកាក្រុមហ៊ុន Century21 Cambodia បានថ្លែងថា អ្នកវិនិយោគចិនមានយុទ្ធសាស្ដ្រ ឈ្នះ-ឈ្នះ ដោយគេលក់គម្រោងនៅប្រទេសចិន រួចផ្តល់ខុនដូនៅស្រុកខ្មែរមួយដោយមិនគិតថ្លៃ ប៉ុន្តែតាមពិត ពួកគេបានដាក់តម្លៃបញ្ចូលក្នុងអចលនទ្រព្យនោះរួចទៅហើយ ហេតុនេះ ទើបយើងឃើញគម្រោងចិននៅកម្ពុជាទទួលបានជោគជ័យ ។ អ្នកនាងបន្តថា ទោះជាគម្រោងនេះមានអគាររហូតដល់១៩អគារ ជាអគារកប់ពពកក្តី ប៉ុន្តែពួកគេសាងសង់តាមដំណាក់កាល មិនមែនសង់ទុកកប់ចោលនោះទេ ។ អ្នកនាងបន្តថា ៖« អ្នកវិនិយោគចិនមានបទពិសោធន៍ច្រើនលើគម្រោងអភិវឌ្ឍន៍របស់ ពួកគេ ហេតុនេះ ពួកគេសិក្សាពីទីផ្សារ និងដំណាក់កាលត្រូវសាងសង់ច្បាស់លាស់ណាស់ ដើម្បីធ្វើឲ្យប្រាកដថា គម្រោងពួកគេទទួលបានជោគជ័យ » ។
អ្នកនាងបន្តថា ៖« បច្ចុប្បន្ន ៨០%នៃអ្នកទិញខុនដូជាជនបរទេស និង២០%ជនជាតិខ្មែរ ប៉ុន្តែនៅរយៈពេល៥ទៅ១០ឆ្នាំខាងមុខ ជនជាតិខ្មែរនឹងនៅខុនដូ៨០% ហើយជនបរទេសនឹងនៅតែ២០% វិញ » ។
អ្នកនាង Grace Rachny Fong បានបន្តថា បែបផែនជីវិត (Life Style) របស់ប្រជាពលរដ្ឋនឹងផ្លាស់ប្តូរនៅពេលមានការកកស្ទះចរាចរណ៍ក្នុងទីក្រុងកាន់តែកើនឡើងខ្លាំង ហើយរបៀបនៃការគិតរបស់មនុស្សសម័យថ្មី ពិសេសយុវជនធ្លាប់ចេញទៅសិក្សានៅបរទេស ពេលពួកគេត្រឡប់មកវិញ ពួកគេនឹងផ្លាស់ប្តូររស់នៅតាមខុនដូជំនួសវិញ ។
អ្នកនាងបន្តថា បើសួរថា ហេតុអីចិនសាងសង់ខុនដូនាពេលនេះ គឺដោយសារតម្លៃដីបច្ចុប្បន្នមានភាពធូរថ្លៃខ្លាំង ធៀបនឹងដីនៅប្រទេសចិន ហេតុនេះ ការវិនិយោគនាពេលនេះពួកគេរកឱកាសចំណេញបានច្រើន ។
មន្ត្រីផ្នែកលក់ជាន់ខ្ពស់នៃគម្រោងដ៏ធំមួយទៀត គឺ R&F CITY ដែលសាងសង់អគារចំនួន២២ មានកម្ពស់៣០ជាន់ នៅតាមបណ្តោយមហាវិថីសម្តេចតេជោ ឬផ្លូវ៦០ម៉ែត្រ លោក RAY SON បានថ្លែងផងដែរថា ការវិនិយោគនៅកម្ពុជា ដោយសារកម្ពុជា ជាប្រទេសពិសេសមួយដែលទទួលបានផលប្រយោជន៍ពីគោលនយោបាយផ្លូវសូត្ររបស់ចិន និងទំនាក់ទំនងល្អរវាងរដ្ឋាភិបាលនៃប្រទេសទាំងពីរ ព្រមទាំងកត្តាសន្តិភាព កំណើនសេដ្ឋកិច្ច ដែលកម្ពុជាសម្រេចបាន គឺជាអ្វីដែលទាក់ទាញពួកគេមកវិនិយោគនៅទីនេះ ។
លោកបន្តថា ៖« គម្រោងខុនដូរបស់យើង ផ្តោតលើសហគមន៍ចិនវិនិយោគនៅកម្ពុជា និងជនជាតិខ្មែរដែលចង់បានភាពស៊ីវិល័យក្នុងជីវិតរបស់ពួកគេ » ។ លោកបន្តថា ៖« ពីមុន ប្រជាជនចិនមិនសូវចូលចិត្តរស់នៅខុនដូទេ តែបច្ចុប្បន្ន ខុនដូក្លាយជាលំនៅឋានពេញនិយមសម្រាប់ពួកគេ ហើយខ្ញុំគិតថា អនាគត ប្រជាជនកម្ពុជានឹងចូលចិត្តរស់នៅតាមខុនដូផងដែរ » ។
លោកបណ្ឌិត ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា បានថ្លែងថា កំណើនវិនិយោគរបស់ចិននៅកម្ពុជា មិនមែនជារឿងកើតឡើងដោយឯកឯងនោះទេ ប៉ុន្តែទំនាក់ទំនងដ៏ល្អរវាងប្រមុខរដ្ឋាភិបាលនៃប្រទេសទាំងពីរ គោលនយោបាយ «ខ្សែក្រវាត់មួយ ផ្លូវមួយ» របស់ចិន ព្រមទាំងកម្ពុជារក្សាបាននូវសន្តិភាព ស្ថិរភាពនយោបាយ និងកំណើនសេដ្ឋកិច្ចរឹងមាំ ក៏ជាផ្នែកសំខាន់ទាក់ទាញការវិនិយោគរបស់ចិនផងដែរ ៕
ចែករំលែកព័តមាននេះ