ខេត្តស្វាយរៀង ៖ កម្មករ កម្មការិនីរោងចក្រសេងយ៉ាវប្រមាណ១,៤០០នាក់ បាននាំគ្នាធ្វើកូដកម្មរយៈពេល២ថ្ងៃជាប់គ្នាមកហើយដោយមិនចូលធ្វើការ ហើយក៏បានផ្ទុះជាបាតុកម្មតវ៉ាដោយសារថៅកែចិន កាត់លុយថ្ងៃទៅបោះឆ្នោត២ថ្ងៃ គឺថ្ងៃសៅរ៍និងថ្ងៃចន្ទ ហើយដាក់ចំនួនសម្ភារឱ្យផលិតកើនឡើង និងបង្ខំឱ្យធ្វើការថែមម៉ោងទៀត…
ខេត្តស្វាយរៀង ៖ កម្មករ កម្មការិនីរោងចក្រសេងយ៉ាវប្រមាណ១,៤០០នាក់ បាននាំគ្នាធ្វើកូដកម្មរយៈពេល២ថ្ងៃជាប់គ្នាមកហើយដោយមិនចូលធ្វើការ ហើយក៏បានផ្ទុះជាបាតុកម្មតវ៉ាដោយសារថៅកែចិន កាត់លុយថ្ងៃទៅបោះឆ្នោត២ថ្ងៃ គឺថ្ងៃសៅរ៍និងថ្ងៃចន្ទ ហើយដាក់ចំនួនសម្ភារឱ្យផលិតកើនឡើង និងបង្ខំឱ្យធ្វើការថែមម៉ោងទៀត បើកម្មករកម្មការិនីណាមិនធ្វើតាមត្រូវបញ្ឈប់ពីការងារ ទើបផ្ទុះការតវ៉ាឡើងនិងអំពាវ
នាវឱ្យក្រសួងការងារ និងវិជ្ជាជីវៈ ជាពិសេសសម្តេចតេជោ ហ៊ុន សែន ជួយអន្តរាគមន៍លើលក្ខខណ្ឌ១៣ចំណុច ។
ការតវ៉ានេះបានកើតឡើងចាប់ពីថ្ងៃទី៧ និងទី៨ សីហា នៅរោងចក្រសេងយ៉ាវធ្វើអំពូលភ្លើង ស្ថិតនៅភូមិដើមពោធិ ឃុំកណ្តៀងរាយ ស្រុកស្វាយទាប ។ បើតាមតំណាងកម្មករឈ្មោះ គង់ ដា ភេទប្រុស អាយុ២៣ឆ្នាំ នៅភូមិឆ្អឹងពោះ ឃុំចក ស្រុករំដួលបានឱ្យដឹងថា មូលហេតុនាំឱ្យកម្មករធ្វើកូដកម្មនិងបាតុកម្មនេះ ៖
ទី១-គឺថៅកែចិន សេង យ៉ាវ បានកាត់លុយកម្មករថ្ងៃបោះឆ្នោត២ថ្ងៃ គឺថ្ងៃសៅរ៍និងថ្ងៃចន្ទ ទឹកប្រាក់សរុប១៥ដុល្លារគឺជាការរំលោភសិទ្ធិកម្មករ កម្មការិនី ដែលសម្តេចតេជោ ហ៊ុន សែន បានប្រកាសឱ្យបុគ្គលិកកម្មករ និយោជិត ឈប់សម្រាករយៈពេល៣ថ្ងៃទៅបោះឆ្នោត ។
ទី២-ដាក់កំណត់ចំនួនសម្ភារឱ្យកម្មករផលិតកើនឡើង ហើយបង្ខំឱ្យកម្មករធ្វើការបន្ថែមម៉ោង បើកម្មករកម្មការិនីណាមិនព្រមតាមថៅកែកំណត់បញ្ឈប់ពីការងារ ។ កន្លងមកថៅកែចិនបានកំណត់ឱ្យកម្មករម្នាក់ធ្វើអំពូលភ្លើងចំនួន៥,០០០ដុំក្នុងមួយថ្ងៃដោយចូលធ្វើការចាប់ពីម៉ោង៧និង៣០នាទីព្រឹក រហូតដល់ម៉ោង៦និង៣០នាទីល្ងាច ធ្វើស្ទើរតែមិនគ្រប់ចំនួន ថ្ងៃខ្លះមានការស្ទះផ្លូវយឺតយ៉ាវធ្វើមិនបានតាមការតម្រូវ ថៅកែព្រមាន ហើយបើគ្រប់៣ដងត្រូវបញ្ឈប់ការងារ ដូច្នេះហើយ បើថៅកែបន្ថែមចំនួនសម្ភារឱ្យផលិតកើនឡើងទៀត កម្មករមិនអាចធ្វើបានទេ។
ទី៣-សូមឱ្យថៅកែចិនបញ្ចូលកម្មករ កម្មការិនីបណ្តែត៣០០នាក់ ឱ្យក្លាយជាកម្មករពេញសិទ្ធិ ។ បើតាមលក្ខខណ្ឌការងារ កម្មករចូលថ្មី ធ្វើការបណ្តែតសាកល្បងរយៈពេល៥៤ថ្ងៃ បើធ្វើការល្អតាមលក្ខខណ្ឌត្រូវទទួលឱ្យធ្វើការពេញសិទ្ធិ ចំណែកកម្មករ កម្មការិនីធ្វើការម្នាក់ៗចាប់ពី៤ខែទៅ៥ខែ ហើយនៅតែមិនបានពេញសិទ្ធិទៀត ដោយថៅកែប្រើល្បិចមួយខែប្តូរកាតម្តង ដូច្នេះថ្មីរហូតធ្វើឱ្យខាតប្រយោជន៍របស់កម្មករ
(ប្រាក់សុខភាព) បើតវ៉ាបញ្ឈប់ពីការងារភ្លាម ។
ទី៤-សុំជ្រើសរើស តំណាងសហជីពប្រចាំរោងចក្រដោយខ្លួនឯង ដោយបោះឆ្នោតកន្លងមក គ្មានសហជីពគ្មានតំណាងកម្មករ ។ ចំណែក៩ចំណុចទៀត ជាចំណុចអាចចរចាបាន ។
កម្មករ កម្មការិនី ភាគច្រើននិយាយថាពួកគេចូលធ្វើការនៅរោងចក្រសេងយ៉ាវនេះ ដើម្បីសម្ភាសន៍ជាប់បានធ្វើការគឺត្រូវបង់ឱ្យអ្នកសម្ភាសន៍១៣០ដុល្លារ ទៅ១៥០ដុល្លារ ទើបបានជាប់ ហើយខ្លះធ្វើបាន៥ខែត្រូវគេបញ្ឈប់ការងារ ហើយប្រកាសជ្រើសរើសបុគ្គលិក កម្មករថ្មីរាល់ថ្ងៃដែលករណីនេះក៏ សូមក្រសួងការងារមេត្តាជួយអន្តរាគមន៍ផង ៕
ចែករំលែកព័តមាននេះ