ខេត្តកំពង់ឆ្នាំង ៖ បន្ទាប់ពីមានបណ្តឹងពីអ្នកភូមិចំនួន៧៥គ្រួសារ នៅភូមិសិរី ឃុំខុនរ៉ង ស្រុកបរិបូណ៌ បានផ្តិតមេដៃប្តឹងទៅមន្ត្រីសង្ឃស្រុកបរិបូណ៌ ឱ្យដកភិក្ខុសង្ឃ១អង្គនាម ប៊ូ ចាន់មុន្នី…
ខេត្តកំពង់ឆ្នាំង ៖ បន្ទាប់ពីមានបណ្តឹងពីអ្នកភូមិចំនួន៧៥គ្រួសារ នៅភូមិសិរី ឃុំខុនរ៉ង ស្រុកបរិបូណ៌ បានផ្តិតមេដៃប្តឹងទៅមន្ត្រីសង្ឃស្រុកបរិបូណ៌ ឱ្យដកភិក្ខុសង្ឃ១អង្គនាម ប៊ូ ចាន់មុន្នី ហៅណេង គង់នៅវត្តសិរី ចេញពីវត្ត ដោយចោទប្រកាន់ថា ភិក្ខុសង្ឃអង្គនេះ បានប្រព្រឹត្តខុសវិន័យសង្ឃ បំបែកបំបាក់ប្រជាពលរដ្ឋនិងសង្ឃ និងបានប្រព្រឹត្តខុសគន្លងព្រះពុទ្ធសាសនា ដោយតាំងខ្លួនជាគ្រូហ្មមើលជំងឺក្នុងវត្ត ។
កាលពីល្ងាចថ្ងៃទី៦ សីហា កន្លងមកនេះ ព្រះវិន័យធរ និងជាព្រះអនុគណស្រុកបរិបូណ៌ មន្ត្រីធម្មការស្រុក និងលោកមេភូមិ មេឃុំបាននិមន្តភិក្ខុ ប៊ូ ចាន់មុន្នី មកប្រជុំនិងសាកសួរពីដំណើររឿងដែលភិក្ខុអង្គនេះ ត្រូវអ្នកភូមិប្តឹងដោយចោទប្រកាន់ពីការប្រតិបត្តិខុសវិន័យព្រះពុទ្ធសាសនា ។
ព្រះវិន័យធរ និងជាព្រះអនុគណស្រុកបរិបូណ៌នាម ជួប សុផល មានថេរដីកាថា បណ្តឹងរបស់ប្រជាពលរដ្ឋចំនួន៧៥គ្រួសារ ចុះថ្ងៃទី៤ ខែសីហា បានចោទចំនួន៦ចំណុចដូចជា ព្រះអង្គ ប៊ូ ចាន់មុន្នី ហៅណេង បានញុះញង់បំបែកបំបាក់សាមគ្គីរវាងពុទ្ធបរិស័ទ និងពុទ្ធបរិស័ទ មិនស្តាប់អាជ្ញាធរភូមិ-ឃុំ បង្កភាពច្របូកច្របល់ បង្កើតជម្លោះ នៅក្នុងវត្តដែលមិនធ្លាប់មាន ចាក់ទឹកប្រោះព្រំ បោកក្អម និងចោលរបស់ផ្សេងៗក្នុងវត្ត ធ្វើអ្វីៗអត្តនោម័តដោយខ្លួនឯង មានថេរដីកាគំរោះគំរើយ គ្មានសីលធម៌ជាសង្ឃ និងប្រើមន្តអាគមអរូបីនៅក្នុងវត្តអារាម ធ្វើឱ្យអាប់ឱនព្រះពុទ្ធសាសនា និងបង្ករឿងគ្រប់បែបយ៉ាង ។
ប្រជាពលរដ្ឋបានសំណូមពរ និមន្តឱ្យចេញពីវត្ត និងសុំរើអាសនៈដែលមិនមែនបម្រើឱ្យវិស័យព្រះពុទ្ធសាសនាចេញ ។ ក្រៅពីពាក្យបណ្តឹងរបស់ប្រជាពលរដ្ឋខាងលើ មន្ត្រីសង្ឃគ្រប់ឋានានុក្រម បានលើកឡើងពីវិន័យសង្ឃ និងកំហុសខុសឆ្គងផ្សេងទៀតដែលភិក្ខុ ប៊ូ ចាន់មុន្នី បានប្រព្រឹត្តខុសវិន័យសង្ឃដូចជា បានឡាយ (Live) តាមបណ្តាញសង្គមហ្វេសប៊ុក ដោយមានថេរដីកាចោទមន្ត្រីសង្ឃស្រុកថា បានប្រព្រឹត្តអំពើពុករលួយ ប្រកាន់បក្សពួក ប្រមាថអាជ្ញាធរភូមិឃុំ និងឡាយ(Live) ពេលស្រោចទឹកប្រោះព្រំ សូត្រផ្លុំមន្តអាគម បង្ហោះតាមហ្វេសប៊ុក និងមើលជំងឺតាំងខ្លួនជាអ្នកខ្លាំងពូកែ កាប់មិនមុត។ល។ មិនទទួលស្គាល់ការចាត់តាំងរបស់ចៅអធិការស្តីទីវត្តសិរី និងមន្ត្រីសង្ឃស្រុកជាដើម ។
ភិក្ខុ ប៊ូ ចាន់មុន្នី ហៅណេង នៅក្នុងអង្គប្រជុំនោះ ដំបូងឡើយបានបដិសេធទាំងស្រុងនូវពាក្យបណ្តឹងថា ព្រះអង្គមិនបានប្រព្រឹត្តខុសដូចពាក្យបណ្តឹងចោទប្រកាន់នោះឡើយ ។ ព្រះអង្គសុំតទល់ផ្ទាល់ចំពោះមុខម្ចាស់បណ្តឹង និងថា ពាក្យបណ្តឹងមានមេដៃក្លែងក្លាយទៀតផង ។ ប៉ុន្តែក្រោយពីព្រះវិន័យធរ អនុគណស្រុក ព្រមានខ្លាំងៗនៅក្នុងអង្គប្រជុំរួចមក ព្រមទាំងបង្ហាញភ័ស្តុតាងក្នុងទូរស័ព្ទដៃជាច្រើន មានការមើលជំងឺប៉ះពាល់ដល់ស្រី្តភេទ ខុសវិន័យសង្ឃជាដើម ទើបភិក្ខុ ប៊ូ ចាន់មុន្នី ព្រមទទួលស្គាល់កំហុសខ្លះ និងព្រមកែប្រែខ្លួន ប៉ុន្តែនៅប្រឆាំងដាច់ខាតមិនព្រមរើអាសនៈចេញជាដាច់ខាត ។
នៅចំពោះមុខអ្នកសារព័ត៌មាន ភិក្ខុ ប៊ូ ចាន់មុន្នី ហៅណេង មានថេរដីកាថា ព្រះអង្គទទួលកំហុសខ្លះ និងមិនទទួលកំហុសខ្លះ ដូចជាសូមទទួលស្គាល់ការប្រកាសតែងតាំងព្រះសង្ឃ នៅ ចក់ ជាចៅអធិការស្តីទី ព្រមទាំងឈប់ឡាយ(Live)តាមបណ្តាញសង្គមហ្វេសប៊ុក ប្រមាថមើលងាយមន្ត្រីសង្ឃទៀតហើយ ។ ប៉ុន្តែចំណុចរើអាសនៈ និងចំណុចដែលចោទថា ព្រះអង្គមកបំបែកបំបាក់ពុទ្ធបរិស័ទក្នុងវត្ត គឺមិនទទួលយកបានឡើយ ។
ទោះជាយ៉ាងនេះក្តី លោក អៀម វន មេភូមិសិរី និងលោក ចាន់ អាន មេឃុំខុនរ៉ងបានផ្តល់កិច្ចសម្ភាសន៍ថា ការដោះស្រាយនេះ អាជ្ញាធរភូមិ-ឃុំ ក៏ដូចជាប្រជាពលរដ្ឋ មិនអាចទទួលយកបានឡើយ ដោយសារតែមិន ព្រមរើសអាសនៈ ដោយនៅតាំងខ្លួនជាគ្រូហ្ម មើលអ្នកជំងឺក្នុងវត្ត បង្កឱ្យមានមនុស្សម្នាចេញចូលស្នាក់នៅក្នុងវត្ត អាជ្ញាធរមិនអាចគ្រប់គ្រងអ្នកស្នាក់នៅ ដែលបង្កឱ្យប៉ះពាល់ដល់គោលនយោបាយភូមិឃុំមានសុវត្ថិភាព ។
ម្យ៉ាងវិញទៀត ភិក្ខុអង្គនេះ មានពាក់អង្កាំរយីងរយោងមើលទៅសង្ឃមិនចំសង្ឃ តាបសមិនចំតាបស ឥសីមិនចំឥសី វាទៅជាបែបព្រហ្មញ្ញសាសនា មិនមែនព្រះពុទ្ធសាសនា ។ រឿងសំខាន់មួយទៀត គឺព្រះអង្គបានយករូបសម្តេច ហ៊ុន សែន មកស្គែនដាក់ជាមួយរូបថតរបស់ខ្លួន ក្នុងចេតនាបង្អួតថា ខ្លួនមានឥទ្ធិពល ដែលសុទ្ធតែខុសទាំងអស់ មិនអាចទទួលយកបានឡើយ ហើយការដោះស្រាយនេះនឹងមិនចប់ទេព្រោះប្រជាពលរដ្ឋមិនអាចទទួលយកបាន ។
ជុំវិញរឿងរ៉ាវខាងលើនេះ បើសិនមានអ្វីប្លែកភ្នាក់ងារយើងនឹងរាយការណ៍បន្តទៀត ព្រោះថា ការដោះស្រាយអធិករណ៍ខាងលើនេះ មិនទាន់បានលទ្ធផល១រយភាគរយនៅឡើយទេ ៕
ចែករំលែកព័តមាននេះ