ខេត្តកណ្ដាល ៖ ព័ត៌មានបឋមបានឲ្យដឹងថា កាលពីវេលាម៉ោង១០ និង៣០នាទីព្រឹក មានករណីបុរស ម្នាក់ត្រូវចរន្តអគ្គិសនីឆក់ស្លាប់ នៅចំណុចក្នុងការដ្ឋានវាយយកថ្មភ្មំខ្សាក របស់ក្រុមហ៊ុន ហុង…
ខេត្តកណ្ដាល ៖ ព័ត៌មានបឋមបានឲ្យដឹងថា កាលពីវេលាម៉ោង១០ និង៣០នាទីព្រឹក មានករណីបុរស ម្នាក់ត្រូវចរន្តអគ្គិសនីឆក់ស្លាប់ នៅចំណុចក្នុងការដ្ឋានវាយយកថ្មភ្មំខ្សាក របស់ក្រុមហ៊ុន ហុង ហ្វុង ស្ថិតនៅ ភូមិពាមសាលា ឃុំស្អាងភ្នំ ស្រុកស្អាង ខេត្តកណ្តាល។ ជនរងគ្រោះឈ្មោះ វី សែ ហៅត្រេន ភេទប្រុស អាយុ២៥ ឆ្នាំមុខរបរកម្មករបូមទឹក (វាយយកថ្មភ្នំខ្សាក) មានទីលំនៅភូមិជន្លង់ម្លូរ ឃុំរំដួល ស្រុកភ្នំស្រួច ខេត្តកំពង់ស្ពឺ។
ករណីខាងលើនេះត្រូវបានសាក្សីកម្មករធ្វើឲ្យក្រុមហ៊ុនវាយថ្មភ្នំដូចគ្នា រៀបរាប់ប្រាប់សមតត្ថកិច្ចថា មុនកើតហេតុជនរងគ្រោះឈ្មោះ វី សែ ហៅត្រេន បានទៅបូមទឹកចេញពី រណ្ដៅត្បាល់កិនថ្មទី២។ ពេលនោះមានមេការចិនម្នាក់ឈ្មោះ ហុង វៃហ្វុង បានដើរពិនិត្យការងារកិនថ្ម ក៏បានឃើញ ដាច់ចរន្តអគ្គិសនីត្រង់កន្លែងបូមទឹក ស្រាប់តែឃើញឈ្មោះ វី សែ ហៅត្រេន ដេកផ្កាប់មុខ នៅក្នុងរណ្តៅនោះ ដែលមានទឹកត្រឹមពាក់កណ្តាលភ្លៅ។
សាក្សីជាកម្មករបានបន្តថា ពេលឃើញដូច្នោះ ឈ្មោះ ហុង វៃហ្វុង បានហៅខ្លួនជួយលើកជនរងគ្រោះឡើងគោគ រួចដឹកឈ្មោះ វី សែ ហៅត្រេន តាមរថយន្តមកទៅពេទ្យបង្អែកស្រុកស្អាង ប៉ុន្តែឈ្មោះ វី សែ ហៅត្រេន បានដាច់ខ្យល់ស្លាប់ ពេលដល់មន្ទីរពេទ្យ។ ក្រោយកើតហេតុសមត្ថកិច្ចនគរបាលស្រុកស្អាង និងគ្រូពេទ្យស្រុក បានចុះទៅពិនិត្យស្លាកស្នាមជនរងជនគ្រោះ ដោយឃើញមានរលាត់កូនជើងខាងឆ្វេង០១កន្លែង ស្នាមរលាត់ខ្នង០១កន្លែង និងមានស្នាមជាំម្រាមដៃខាងឆ្វេង១កន្លែង ក្រៅពីនេះពុំមានអ្វីគួរឲ្យកត់សម្គាល់ទេ។
ការសន្និដ្ឋានរបស់សមត្ថកិច្ច យោងលើការពិនិត្យកន្លែងកើតហេតុ និង តាមការបំភ្លឺពីសាក្សី និងការអះអាងពីឈ្មោះ ហុង វៃហ្វុង មេការក្រុមហ៊ុនចិន បានបញ្ជាក់ថា ជនរងគ្រោះឈ្មោះ វី សែ ហៅត្រេន ពិតជាស្លាប់ដោយសារឆក់ចរន្តអគ្គិសនី(ម៉ូទ័របូមទឹក) ដែលនៅក្នងរណ្តៅទឹកនោះប្រាកដមែន។ បន្ទាប់ពីសមត្ថកិច្ចពិនិត្យរួច សាកសពត្រូវបានប្រគល់ ឲ្យក្រុមគ្រួសារ នាំយកទៅធ្វើបុណ្យតាមប្រពៃណី៕
ចែករំលែកព័តមាននេះ