ទីក្រុងបាងកក ៖ ខុទ្ទកាល័យនាយករដ្ឋមន្ត្រីប្រទេសថៃបានអនុញ្ញាតឲ្យមានការពន្យារពេលសងបំណុល និងកាត់បន្ថយអត្រាការប្រាក់សម្រាប់កសិករទ្រង់ទ្រាយតូច ដើម្បីជំរុញដល់វិស័យកសិកម្មនៅក្នុងប្រទេសនេះ ។
យោងតាមលោក Nathporn Chatusripitak ទីប្រឹក្សាប្រចាំខុទ្ទកាល័យនេះ បានឲ្យដឹងថា វិធានការទាំងនេះចាំបាច់ណាស់ ពីព្រោះវិស័យកសិកម្មក្នុងប្រទេសថៃបន្តជួបប្រទះនឹងបញ្ហាតម្លៃឡើងចុះ និងគ្រោះធម្មជាតិ ។
ក្រោមវិធានការទាំងពីរនេះ រដ្ឋាភិបាលថៃអាចកាត់បន្ថយអត្រាការប្រាក់រយៈពេល១ឆ្នាំ សម្រាប់កសិករទ្រង់ទ្រាយតូច គឺចាប់ពីថ្ងៃទី១ ខែសីហាឆ្នាំនេះ ដល់ថ្ងៃទី៣១ ខែកក្កដា ឆ្នាំ២០១៩ ដែលបានខ្ចីប្រាក់ដំបូងចំនួន៩.០០០ដុល្លារ ។
រដ្ឋាភិបាលនឹងរ៉ាប់រងលើអត្រាការប្រាក់ប្រចាំឆ្នាំចំនួន២,៥% ខណៈធនាគារ Bank of Agriculture and Agricultural Cooperatives (BAAC) នឹងរ៉ាប់រងអត្រាការប្រាក់០,៥%ទៀត ។
កម្មវិធីអនុគ្រោះបំណុលនេះ នឹងត្រូវចំណាយប្រាក់អស់ជិត៥០០លានដុល្លារ ។ ទោះជាយ៉ាងណា កសិករនៅតែត្រូវបង់ការប្រាក់ជាធម្មតាសម្រាប់រាល់ប្រាក់កម្ចីដែលលើសពី៩.០០០ដុល្លារ ។
ធនាគារ BAAC បានឲ្យដឹងថា កសិករទ្រង់ទ្រាយតូចខ្ចីប្រាក់ប្រមាណ១៩,៦ប៊ីលានដុល្លារ ខណៈរដ្ឋាភិបាលគិតថា កសិករចំនួន១០លាននាក់មានសិទ្ធិទទួលបានការអនុគ្រោះនេះ ។
សម្រាប់វិធានការមួយទៀត លោក Nathporn Chatusripitak បាននិយាយថា ខុទ្ទកាល័យនាយករដ្ឋមន្ត្រីបានអនុញ្ញាតឲ្យមានការពន្យារពេលសងប្រាក់កម្ចី រហូតដល់រយៈពេល៣ឆ្នាំ (ចាប់ពីថ្ងៃទី១ ខែសីហា ឆ្នាំ២០១៨ ដល់ថ្ងៃទី៣១ ខែកក្កដា ឆ្នាំ២០២១) សម្រាប់អ្នកដែលបានខ្ចីប្រាក់ពីធនាគារ BAAC ប្រមាណ៣,៨១លាននាក់ ៕
ចែករំលែកព័តមាននេះ