ខេត្តបាត់ដំបង៖ សេចក្តីរាយការណ៍បឋមឱ្យដឹងថា លំនៅឋានប្រជាពលរដ្ឋចំនួន២ខ្នង ត្រូវអគ្គិភ័យឆាបឆេះដែលគេសង្ស័យថា បណ្ដាលមកពីការទុស្សេខ្សែភ្លើង ដោយភ្លើងបានត្របាក់អស់ស្ទើរទាំង ស្រុង នៅវេលាម៉ោង១១ និង៤៥នាទីថ្ងៃត្រង់ថ្ងៃទី០៣ សីហា…
ខេត្តបាត់ដំបង៖ សេចក្តីរាយការណ៍បឋមឱ្យដឹងថា លំនៅឋានប្រជាពលរដ្ឋចំនួន២ខ្នង ត្រូវអគ្គិភ័យឆាបឆេះដែលគេសង្ស័យថា បណ្ដាលមកពីការទុស្សេខ្សែភ្លើង ដោយភ្លើងបានត្របាក់អស់ស្ទើរទាំង
ស្រុង នៅវេលាម៉ោង១១ និង៤៥នាទីថ្ងៃត្រង់ថ្ងៃទី០៣ សីហា នេះ ស្ថិតក្នុងភូមិវត្តលៀប សង្កាត់ចំការសំរោង ក្រុងបាត់ដំបង តែមិនមានគ្រោះថ្នាក់ដល់មនុស្សនោះទេ។
បើតាមអាជ្ញាធរមូលដ្ឋានបានឱ្យដឹងថា លំនៅឋានទាំង២ខ្នងខាងលើនេះ ធ្វើពីឈើប្រក់ស័ង្កសី ដែលផ្ដើមចេញពីផ្ទះឈ្មោះវ៉ា កូលាប ភេទស្រី អាយុ៦០ឆ្នាំ ហើយបានរាលដាលឆេះដល់ផ្ទះ១ខ្នងទៀត នៅក្បែរនោះដែលម្ចាស់បិទទ្វារមិនបាននៅ ។ អាជ្ញាធរប្រាប់ទៀតថា ផ្ទះរបស់ឈ្មោះវ៉ា កូលាប ដែលជាចំណុចចាប់ផ្ដើមត្រូវឆេះទាំងស្រុង រីឯ១ខ្នងទៀត ដែលសង់នៅជាប់គ្នាឆេះ អស់ជាងពាក់កណ្ដាល ។ បើតាមម្ចាស់ផ្ទះបានប្រាប់ទៀតថា មិនមានទ្រព្យសម្បត្តិណាបន្តិច ដែលនៅសេសសល់ទេ តែមិនបង្កគ្រោះថ្នាក់ដល់មនុស្ស។
ស្ថិតក្នុងស្ថានភាពដ៏ច្របូកច្របល់ដែលអគ្គីភ័យ កំពុងលេបត្របាត់លំនៅឋានយ៉ាងសាហាវ កូនស្រីម្ចាស់ផ្ទះឈ្មោះជា សុខគង់ អាយុ៣១ឆ្នាំ បានស្រែទ្រហោរយំបណ្ដើរនិយាយបណ្ដើរថា អគ្គិភ័យនោះ បានចាប់ផ្ដើមឆេះនៅផ្នែកខាងលើផ្ទះបន្ទាប់ពីគាត់ឮសំលេងផ្ទុះ ខណ:ពេលដែលគាត់និងក្រុមគ្រួសារកំពុងដាំស្លរនៅខាងក្រោម ។ គាត់សង្ស័យទុរស្សេខ្សែភ្លើង ទើបបណ្ដាលឲ្យមានអគ្គីភ័យនេះឡើង។
គាត់និយាយទៀតថា ពេលឃើញអណ្ដាតភ្លើងឆេះយ៉ាងខ្លាំងបែបនេះ គាត់បានអូសដៃកូននិងម្ដាយរបស់គាត់រត់ចេញពីផ្ទះដោយមិនបានយកអ្វីមកជាមួយទេ ហើយក៏មិនបានសម្រុកចូលទៅរំដោះយកទ្រព្យសម្បត្តិអ្វីដែរ ព្រោះអណ្ដាតភ្លើងឆេះខ្លាំងពេក ។ ដូច្នេះគាត់និងម្ដាយបានត្រឹមស្រែកយំឈរមើលព្រះអគ្គិលេបត្របាក់ទ្រព្យសម្បត្តិទាំងក្ដីរន្ធត់តែប៉ុណ្ណោះ ។
ជាមួយគ្នានោះមុនពេលរថយន្តពន្លត់អគ្គីភ័យរបស់ស្នងការខេត្តចុះទៅដល់ដើម្បីអន្តរាគមន៏ គេឃើញអ្នកភូមិបាននាំគ្នាយកធុងដងទឹកពាងយ៉ាងពពាក់ពពូនដើម្បីជួយពន្លត់ភ្លើង តែមិនអាចធ្វើឲ្យកម្លាំងភ្លើងថមថយឡើយ ប៉ុន្តែភ្លាមៗនោះរថយន្តពន្លត់អគ្គីភ័យចំនួន៣គ្រឿងបានទៅដល់ទីនោះ។
រថយន្តពន្លត់អគ្គីភ័យបានបាញ់ពន្លត់ និងបាញ់ការពារមិនឲ្យអគ្គីភ័យឆេះឆ្លងរាលដាលដល់លំនៅឋានដទៃទៀតដែលកំពុងប្រឈមនៅក្បែរៗនោះ។ យ៉ាងនេះក្ដីអគ្គីភ័យដែលមានសន្ទុះយ៉ាងខ្លាំងនិងលឿនបំផុតនោះបានបំផ្លាញផ្ទះ២ខ្នងស្ទើរទាំងស្រុងទៅហើយ។ ប៉ុន្តែអ្វីដែលជាបញ្ហាប្រឈមរបស់រថយន្តពន្លត់អគ្គីភ័យសម្រាប់ការជួយអន្តរាគមន៍នេះ បើតាមការពិនិត្យជាក់ស្ដែងលើភូមិសាស្ត្រនៅទីនោះ គឺបញ្ហាច្រកចូលតូចចង្អៀត ផ្លូវលំបាកដែលអាជ្ញាធរគួរតែពិនិត្យឡើងវិញចំពោះបញ្ហានេះ ។
ចែករំលែកព័តមាននេះ