ខេត្តស្វាយរៀង ៖ ប្រជាពលរដ្ឋព្រួយបារម្ភអំពីការបាត់សត្វគោ ក្របី ខណៈមានក្រុមហ៊ុននាំគោ ក្របី ចេញទៅប្រទេសវៀតណាម ដោយគ្មានការត្រួតពិនិត្យពីមន្ត្រីជំនាញ គឺដឹកតាមរថយន្តយកទៅ ទម្លាក់តាមព្រំដែនរួចដឹកចេញតាមច្រករបៀងក្នុងមួយថ្ងៃៗ២០ទៅ៣០ក្បាល ដោយមានការបើកភ្លើងខៀវ ពីសមត្ថកិច្ចឈរជើងតាមច្រករបៀងទាំងនោះ។ ជាក់ស្តែងនៅថ្ងៃទី២ សីហា ឆ្នាំ២០១៨នេះ ឈ្មួញបានដឹកក្របីតាមរថយន្តចំនួន២គ្រឿងមានក្របីប្រមាណជាង២០ក្បាល ចុះត្រង់ចំណុចវត្តតាឡុក ស្ថិតនៅភូមិបាវិតកណ្តាល សង្កាត់បាវិត ក្រុងបាវិតនោះ គឺរថយន្តកូរ៉េ ម៉ាកហ៊ីយ៉ាន់ដាយចំណុះ២តោនកន្លះ ពាក់ស្លាកលេខ ភ្នំពេញ 3B-0348 និងរថយន្ត១គ្រឿងទៀត ម៉ាកហ៊ីយ៉ាន់ដាយចំណុះ២តោនកន្លះដូចគ្នា ពណ៌ស មិនបានឃើញស្លាកលេខ។
ទាក់ទិនករណីឈ្មួញ នាំក្របីចេញទៅប្រទេសវៀតណាមនេះ លោក ឈិន សៅ មន្ត្រី ការិយាល័យផលិតកម្ម និងបសុព្យាបាល នៃមន្ទីរកសិកម្មរុក្ខាប្រមាញ់ និងនេសាទខេត្ត មានប្រសាសន៍ថា បញ្ហាឈ្មួញនាំក្របីចេញទៅប្រទេស វៀតណាម តាមច្រករបៀង វត្តតាឡុក ក្រុងបាវិតនេះ លោកមិនបានដឹងទេ។ កន្លងមកមានក្រុមហ៊ុន យុវពាណិជ្ជ ដោយមានឈ្មោះ ស្នា ជាអ្នកគ្រប់គ្រង នាំក្របីឆ្លងកាត់ និងគ្រប់គ្រងប្រមូលទិញ គោ និងក្របី ផ្គត់ផ្គង់ទីផ្សារក្នុងស្រុក ឬឡសត្តឃាតក្នុងខេត្តប៉ុណ្ណោះ រឿងនាំក្របីគោចេញលោកអត់បានដឹងទេ។
ពាក់ពន្ធ័ករណីនាំក្របីគោចេញទៅប្រទេសវៀតណាមនេះដែរ លោក ស្នា តំណាងក្រុមហ៊ុនយុវពាណិជ្ជ បានឲ្យដឹងថា បញ្ហាច្បាប់ទម្លាប់លោកមិនសូវដឹងទេ លោកគ្រាន់តែមើលការងារឲ្យក្រុមហ៊ុននាំក្របីឆ្លងកាត់ រីឯក្របី គោ ក្នុងខេត្តស្វាយរៀងគឺមាន អាជីវករដើរប្រមូលទិញ តាមភូមិស្រុកផ្គត់ផ្គង់ទីផ្សារក្នុងស្រុក ហើយលើសពីការផ្គត់ផ្គង់ក្នុងស្រុក អជីវករបានសុំ នាំចេញ ទៅលក់នៅប្រទេសវៀតណាម ពី១០ក្បាលទៅ២០ក្បាល លោកក៏ជួយសម្រួលទៅ។ ចំណែកអាជីវករនៅភូមិព្រៃផ្តៅ សង្កាត់បាវិតក្រុងបាវិត បាននិយាយថា ពួកគេប្រមូលទិញក្របីគោពីប្រជាពលរដ្ឋលក់ឲ្យវៀតណាមគេមកទិញដល់ក្រោល ហើយជួលរថយន្តខ្មែរ ដឹកទៅទម្លាក់នៅតាមព្រំដែន ដោយបង់ឲ្យឈ្មោះស្នា ក្របីតូច១ក្បាល៥ម៉ឺនរៀល ក្របីធំ ១ក្បាល១០ម៉ឺនរៀល។
ក្នុងនោះវៀតណាមក៏បានបង់ឲ្យសមត្ថកិច្ចយាមនៅច្រករបៀង និងពេទ្យសត្វដែរ ក៏ប៉ុន្តែមិនដឹង១ក្បាលប៉ុន្មានទេ។ រីឯជនរងគ្រោះឈ្មោះ លឹម ពិសិដ្ឋ ភេទស្រី អាយុ៤០ឆ្នាំ នៅភូមិថ្នល់កែង ឃុំកណ្តៀងរាយ ស្រុកស្វាយទាប បានឲ្យដឹងថា កាលពីថ្ងៃទី០៣ កក្កដា ២០១៨ វេលាម៉ោង២រសៀល មានចោរលួចគោរបស់គាត់មួយក្បាល ដែលចងឲ្យស៊ីស្មៅនៅស្រែក្រោយផ្ទះចម្ងាយ២០០ម៉ែត្រ ទៅបាត់។ ក្រោយមកស្រាប់តែឃើញគេដឹក តាមរ៉ឺម៉កក៏នាំគ្នាជិះម៉ូតូដេញតាមរហូតដល់ខាងមុខរោងចក្រសានតុងស្ថិតនៅភូមិជ្រៃធំ សង្កាត់ព្រៃអង្គុញ ក្រុងបាវិត ទើបស្ទាក់ចាប់បាន ជនសង្ស័យឈ្មោះ ប៉ុន វុន ភេទប្រុស អាយុ៧៦ឆ្នាំ មានទីលំនៅភូមិដើមពោធិ ឃុំស្វាយតាយាន ស្រុកកំពង់រោទិ៍ បានប្រគល់ឲ្យសមត្ថកិច្ច សង្កាត់ព្រៃអង្គុញ ដោះស្រាយ។
ក៏ប៉ុន្តែសមត្ថកិច្ចនគបាលព្រៃអង្គុញបញ្ជូនជនសង្ស័យទៅឃុំស្វាយតាយានធ្វើការសាកសួរ ជនសង្ស័យបានឆ្លើយថា គេគ្រាន់តែជាអ្នកដឹកស៊ីឈ្នួលឲ្យក្រុមហ៊ុននោះទេ សមត្ថកិច្ចកំពុងស្រាវជ្រាវបន្ត។ ហើយកន្លងមកគោក្របីប្រជាពលរដ្ឋបាត់រកមិនឃើញទេ ដូច្នេះប្រជាពលរដ្ឋមានការព្រួយបារម្ភយ៉ាងខ្លាំង អំពីសុវត្ថិភាពគោក្របី ពួកគាត់ដោយមានឈ្មួញដើរប្រមូលទិញ គោក្របីទៅប្រទេសវៀតណាមនេះយកស្លាកក្រុមហ៊ុន មកលួចលាក់ប្រមូលទិញគោក្របីពីអ្នកស្រុក រីឯចោរឆ្លៀតឱកាសលួចគោក្របីអ្នកស្រុកទាំងថ្ងៃ នាំទៅវៀតណាម។ ចំណែកមន្ត្រីម្នាក់សុំមិនបញ្ចេញឈ្មោះបានបង្ហើបឲ្យដឹងថា សមត្ថកិច្ចតាមច្រករបៀង មិនហ៊ានជាមួយតំណាងក្រុមហ៊ុនទេ គេនិយាយយកឈ្មោះអ្នកធំៗមកលាបទើបសមត្ថកិច្ច សុំតែលុយបាយ មួយក្បាល៥ម៉ឺនដុងប្រាក់វៀតណាមប៉ុណ្ណោះ៕
https://youtu.be/72spQMTfGs0
ចែករំលែកព័តមាននេះ