រាជធានីភ្នំពេញ ៖ បុរសជនអនាថាម្នាក់ដើរតែលតោលម្នាក់ឯងឆ្លងថ្នល់ត្រូវរថយន្តមួយគ្រឿងមិនចាំម៉ាក បើកបុកពេញទំហឹងបណ្តាលឱ្យរងរបួសធ្ងន់សន្លប់ស្តូកស្តឹងនៅកណ្តាលថ្នល់ បង្កការភ្ញាក់ផ្អើលកាលពីវេលាម៉ោង៩និង៤០នាទីយប់ ថ្ងៃទី១ ខែសីហា នៅតាមបណ្តោយផ្លូវ២៧១ ចំណុចគល់ស្ពានអាកាសស្ទឹងមានជ័យចុះទៅពេទ្យរុស្ស៊ី សង្កាត់ស្ទឹងមានជ័យ២ ខណ្ឌមានជ័យ។
ប្រភពព័ត៌មានពីប្រជាពលរដ្ឋបានប្រាប់អោយដឹងថា រាល់ថ្ងៃគេតែងតែឃើញជនអនាថារងគ្រោះខាងលើនោះ ដើរតែលតោលតែម្នាក់ឯងមានស្ពាយការ៉ុងពណ៌សមួយ ហើយនៅដៃមានកាន់កាវក្បាលឆ្កែទុកសម្រាប់ហិត តែងតែដើរទៅមកៗក្រោមស្ពានអាកាសស្ទឹងមានជ័យ រហូតទៅដល់មុខពេទ្យរុស្ស៊ី គ្មានគោលដៅច្បាស់លាស់ ពេលយប់ដេកតាមគំនរសំរាម និងមុខផ្ទះគេ ពេលខ្លះមានគេសួរនាំដែរ តែជនអនាថាម្នាក់នោះឆ្លើយខ្លីៗ ហើយព្យាយាមដើរគេចចេញពីកន្លែងណាដែលមនុស្សច្រើន។
ប្រភពដដែលបានបន្តទៀតថា មុនកើតហេតុ គេឃើញជនអនាថាដែលរងគ្រោះនោះដើរហិតកាវទៅមកៗតាមបណ្តោយផ្លូវ២៧១ លុះមកដល់ចំណុចកើតហេតុ គាត់បានដើរឆ្លងផ្លូវមកដល់កណ្តាលផ្លូវបានឡើងលើរបាំងថ្មទ្រូងផ្លូវរួចលោតចុះដើម្បីឆ្លងទៅផ្លូវម្ខាងទៀត ក៏ត្រូវរថយន្តមិនចាំម៉ាកមួយគ្រឿង ធ្វើដំណើរចុះមកពីលើស្ពានអាកាសស្ទឹងមានជ័យបុកជនអនាថាខាងលើនោះពេញទំហឹង បណ្តាលឱ្យគាត់ដួលបោកនឹងថ្នល់បែកក្បាលហូរឈាមសន្លប់ស្តូកស្តឹងនៅកណ្តាលថ្នល់។ ភ្លាមៗនោះក៏មានពលរដ្ឋចិត្តល្អ និងសមត្ថកិច្ចមូលដ្ឋានចុះមកជួយអន្តរាគមន៏ដោយលើកជនអនាថានោះដាក់មកកៀនផ្លូវ និងមានអ្នកបើកម៉ូតូកង់បីឥណ្ឌាចិត្តល្អម្នាក់បើកឆ្លងកាត់ទីនោះឃើញហើយអាណិតក៏ជួយដឹកជនអនាថាម្នាក់ទៅសង្គ្រោះនៅមន្ទីរមិត្តភាពខ្មែរ-សូវៀត ហៅពេទ្យរុស្សី ភ្លាមៗដែរ។
ក្នុងហេតុការណ៍នេះដែរ ក៏មានប្រជាពលរដ្ឋបានអំពាវនាវតាមរយៈអ្នកសារពត៌មាន អោយអាជ្ញាធរ ឬអង្គការស្ថាប័នពាក់ព័ន្ធ មេត្តាជួយសង្គ្រោះជនអនាថាដែលរងគ្រោះខាងលើនោះផង មើលទៅគាត់ពិតជាគួរឱ្យអាណិតខ្លាំងណាស់ ដូចជាយកគាត់ទៅបន្សាបសារធាតុញៀន និងបណ្តុះបណ្តាលគាត់ឱ្យមានជំនាញផ្ទាល់ខ្លួនមួយ ដើម្បីអនាគតទៅថ្ងៃមុខផង ៕
ចែករំលែកព័តមាននេះ