ខេត្តស្វាយរៀង ៖ ដោយសារបញ្ហាអាកាសធាតុមានការប្រែប្រួលជាបន្តបន្ទាប់នោះប្រជាពលរដ្ឋត្រូវធ្វើការផ្លាស់ប្តូរពូជស្រូវជាបន្ទាន់ដើម្បីផលិតឲ្យត្រូវនឹងអាកាសធាតុដោយមានការពិភាក្សាស្វែងរកការគាំទ្រពីក្រសួង មន្ទីរជំនាញផងដែរ សំដៅជម្នះឧបសគ្គដែលកំពុងយាយីនៅក្នុងតំបន់ ។
លោក ពេជ សាវ៉ាន់ អភិបាលរងខេត្តស្វាយរៀងបានស្នើដល់ពលរដ្ឋត្រូវធ្វើការផ្លាស់ប្តូរឥរិយាបទផលិតស្រូវតាមទម្លាប់ដោយងាកមកចាប់យកពូជស្រូវថ្មីខ្លីថ្ងៃ ទិន្នផលខ្ពស់ ដែលក្រសួងកសិកម្ម រុក្ខាប្រម៉ាញ់ និងនេសាទ បានកំណត់សំដៅផលិតឲ្យត្រូវនឹងអាកាសធាតុរួមនឹងទីផ្សារស្រូវអង្ករផងដែរ ដើម្បីបម្រើការហូបចុក និងបង្កើនប្រាក់ចំណូល ។
ការថ្លែងរបស់អភិបាលរងខេត្តរូបនេះបានធ្វើឡើងក្នុងពិធីសំណេះសំណាលចែកពូជស្រូវ និងចូលរួមដកស្ទូងជូនដល់ពលរដ្ឋខ្វះកម្លាំងពលកម្មនៅក្នុងឃុំប្រសូតិ ស្រុកស្វាយទាប កាលពីថ្ងៃចុងសប្តាហ៍កន្លងទៅនេះ ។
លោក ពេជ សាវ៉ាន់ បន្តថា ការផ្លាស់ប្តូរពូជស្រូវដើម្បីផលិតតម្រូវនឹងអាកាសធាតុ និងទីផ្សារ គឺជារបត់ថ្មីមួយដែលពលរដ្ឋគ្រប់រូបអ្នកផលិតស្រូវ ត្រូវតែបន្តការសិក្សាស្វែងយល់ពូជស្រូវឲ្យបានច្បាស់ពីសណ្តានអម្បូរស្រូវជាមួយនឹងមន្ទីរកសិកម្ម មុននឹងយកទៅផលិត ពីព្រោះពូជស្រូវថ្មីខ្លីថ្ងៃតម្រូវនឹងដីប្រភេទណា និងប្រើប្រាស់ជីអ្វី ការដែលបងប្អូនបានសិក្សាច្បាស់ ទើបការផលិតរបស់យើងមិនបរាជ័យ ។
លោក ថាច់ រតនា ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្ត ឲ្យដឹងនៅថ្ងៃទី៣១ ខែកក្កដា ឆ្នាំ២០១៨ ថាការងារបង្កបង្កើនផលស្រូវវស្សារបស់ពលរដ្ឋនៅក្នុងខេត្ត ចាប់ពីដើមរដូវរហូតមកដល់ថ្ងៃទី២៤ ខែកក្កដា កសិករសម្រេចការភ្ជួររាស់សាបព្រោះ ដកស្ទូងបានចំនួន១២២.៧៤៣ហិកតា ស្មើនឹង៧៣% លើផែនការ១៦៧.៥០០ហិកតា ។
ដោយឡែកការច្រូតស្រូវស្រាលដើមរដូវ ធ្វើឡើងបានចំនួន៨.២៦៤ហិកតា និងធ្វើកម្មវិធីស្រែបង្ហាញពង្រីកពូជស្រូវពូជផ្ការំដួល ដល់គ្រួសារកសិករបានចំនួន៦៦គ្រួសារ ក្នុងចំណោមគ្រួសារគោលដៅចំនួន១០០ ដើម្បីបង្ហាញដល់កសិករនៅទូទាំងខេត្តផងដែរ ៕
ចែករំលែកព័តមាននេះ