គ្រូបង្រៀន និងប្រពន្ធជួបគ្រោះអកុសលគួរឱ្យរន្ធត់
- ភ្នំពេញ
រាជធានីភ្នំពេញ ៖ លោកគ្រូបង្រៀនគណិតវិទ្យាម្នាក់ឌុបប្រពន្ធពីផ្ទះមិត្តភក្តិត្រឡប់ទៅផ្ទះដល់ពាក់កណ្តាលផ្លូវត្រូវរថយន្តមួយគ្រឿងបើកបរដោយជនជាតិចិនម្នាក់បោះពួយលឿនដូចហោះ ធ្វើដំណើរស្របទិសគ្នាមកបុកកៀរម៉ូតូគាត់ពីក្រោយបណ្តាលឱ្យលោកគ្រូខ្ទាតបោកនឹងកញ្ចក់រថយន្តធ្លាក់បោកនឹងថ្នល់ស្លាប់ភ្លាមៗនៅកន្លែងកើតហេតុ ចំណែកប្រពន្ធរងរបួសធ្ងន់។ ហេតុការណ៍នេះដែរបានកើតឡើងកាលពីវេលាម៉ោង១០នឹង១៥នាទីយប់ថ្ងៃទី៣១ ខែកក្កដា នៅតាមបណ្តោយផ្លូវជាតិលេខ១ ជិតវត្តក្តីតាកុយ ភូមិក្តីតាកុយ…
ជនរងគ្រោះជាប្តីដែលស្លាប់ឈ្មោះ អុឹម សុធី អាយុ៥៦ឆ្នាំ ជាគ្រូបង្រៀនមុខវិជ្ជាគណិតវិទ្យានៅវិទ្យាល័យបឹងកេងកង ស្នាក់នៅភូមិស្វាយតាអុក១ សង្កាត់វាលស្បូវ ខណ្ឌច្បារអំពៅ និងប្រពន្ធឈ្មោះ ហែម សុគន្ធារី ជាបុគ្គលិកអនាម័យនៅមន្ទីរពេទ្យមិត្តភាពខ្មែរ-សូវៀត បានរងរបួសធ្ងន់។
ប្រភពពីសាច់ញាតិជនរងគ្រោះបានប្រាប់ឱ្យដឹងថា មុនកើតហេតុ គាត់(លោកគ្រូរងគ្រោះ) មានកម្មវិធីជួបជុំនៅផ្ទះតិចតួច ស្រាប់តែមានមិត្តភក្តិទូរស័ព្ទហៅទៅលេងផ្ទះនៅភ្នំពេញ ហើយគាត់បានឌុបប្រពន្ធចេញទៅ លុះដល់វេលាកើតហេតុ តាមប្រភពពីអ្នកឃើញហេតុការណ៍បានប្រាប់ឱ្យដឹងថា គេឃើញជនរងគ្រោះខាងលើជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ ភ្នំពេញ ១GI-៩១៧១ ឌុបប្រពន្ធធ្វើដំណើរតាមផ្លូវជាតិលេខ១ ក្នុងទិសដៅពីត្បូងទៅជើង បើកកណ្តាលផ្លូវ ។
ប្រភពដដែលបានបន្តថា លុះមកដល់ចំណុចកើតហេតុក៏បើកអែបមកខាងស្តាំ ស្រាប់តែមានរថយន្តមួយគ្រឿងម៉ាកឡិចស៊ីស RX300 ពណ៌ស ពាក់ស្លាកលេខ ភ្នំពេញ ២AL-៦៨៥៥ បើកបរដោយបុរសជនជាតិម្នាក់សង្ស័យស្រវឹងបើកបរក្នុងល្បឿនយ៉ាងលឿន ធ្វើដំណើរស្របទិសគ្នាបើកជែងគេឯងពេញផ្លូវទៅបុកកៀរពីក្រោយចំហៀងខាងស្តាំម៉ូតូជនរងគ្រោះពេញទំហឹង បណ្តាលឱ្យអ្នកបើកបរម៉ូតូជាប្តីរងរបួសបាក់ជើងខាងស្តាំ និងប៉ើងបោកផ្ទប់នឹងកញ្ចក់រថយន្តធ្លាក់បោកនឹងថ្នល់ស្លាប់ភ្លាមៗនៅកន្លែងកើតហេតុ ចំណែកស្ត្រីជាប្រពន្ធដួលបោកនឹងថ្នល់អូសតាមម៉ូតូជាង៣០ម៉ែត្រ រងរបួសធ្ងន់សន្លប់ស្តូកស្តឹង រីឯម៉ូតូរងការខូចខាតមួយចំហៀងខាងស្តាំ ចំណែករថយន្តបង្ករងការខូចខាតបែកស្តុបផ្នែកខាងឆ្វេង និងកញ្ចក់ខាងមុខ។ ភ្លាមៗនោះជនរងគ្រោះជាប្រពន្ធដែលរងរបួសធ្ងន់ធ្ងរត្រូវបានរថយន្តសង្គ្រោះដឹកទៅសង្គ្រោះនៅមន្ទីរពេទ្យមិត្តភាពខ្មែរ-សូវៀតភ្លាមៗ រីឯជនបង្កត្រូវកម្លាំងសមត្ថកិច្ចឃាត់ខ្លួនបានភ្លាមៗផងដែរ។
ក្រោយកើតហេតុ សពជនរងគ្រោះត្រូវបានសាច់ញាតិដឹកយកទៅតម្កល់ធ្វើបុណ្យនៅវត្តវាលស្បូវ ចំណែកម៉ូតូរបស់ជនរងគ្រោះ និងរថយន្តបង្ក រួមទាំងអ្នកបើកបរជាជនជាតិចិនត្រូវបានកម្លាំងសមត្ថកិច្ចជំនាញចរាចណ៏ធ្វើការវាស់ និងឃាត់ខ្លួនយកទៅកាន់ការិយាល័យនគរបាលចរាចរណ៍ជើងគោកក្រុងរង់ចាំដោះស្រាយគ្នាតាមផ្លូវច្បាប់នៅពេលក្រោយ ៕
ចែករំលែកព័តមាននេះ