ខេត្តស្ទឹងត្រែង ៖ ទីធ្លាដែលដុះស្មៅញ៉ុក និងរុំព័ទ្ធដោយកម្អែលស្លា និមិត្តរូបត្រីប៉ាសេអីុតំណាងឱ្យមច្ឆជាតិមួយប្រភេទដ៏មានតម្លៃនៅប៉ែកឦសានប្រទេស នឹងមានសោភ័ណភាពដ៏ទាក់ទាញអមទៅដោយក្បាច់រចនាសម្បូរបែប ជាមួយនឹងភ្លើងអគ្គិសនីចម្រុះពណ៌ ហើយក៏ជាទីធ្លាអង្គុយលេងប្រកបដោយផាសុកភាព នឹងរំលេចចេញជារូបរាងនៅចុងខែកក្កដានេះ ។…
ខេត្តស្ទឹងត្រែង ៖ ទីធ្លាដែលដុះស្មៅញ៉ុក និងរុំព័ទ្ធដោយកម្អែលស្លា និមិត្តរូបត្រីប៉ាសេអីុតំណាងឱ្យមច្ឆជាតិមួយប្រភេទដ៏មានតម្លៃនៅប៉ែកឦសានប្រទេស នឹងមានសោភ័ណភាពដ៏ទាក់ទាញអមទៅដោយក្បាច់រចនាសម្បូរបែប ជាមួយនឹងភ្លើងអគ្គិសនីចម្រុះពណ៌ ហើយក៏ជាទីធ្លាអង្គុយលេងប្រកបដោយផាសុកភាព នឹងរំលេចចេញជារូបរាងនៅចុងខែកក្កដានេះ ។
លោក ឆៃ ហាន ជាជាងសំណង់ដែលគាំទ្រដោយអាជ្ញាធរខេត្ត បានធ្វើការកែសម្រួលសួនច្បារនេះឡើងវិញ ព្រោះទីតាំងនេះ ជាចំណុចសំខាន់របស់ខេត្ត ពេលភ្ញៀវទេសចរមកពីខេត្តនានាតែងមកអង្គុយកម្សាន្តនៅទីកន្លែងនេះ មើលទេសភាពទឹកទន្លេសេសាន និងទន្លេមេគង្គ ។
លោក ឆៃ ហាន ថ្លែងថា រូបសំណាកត្រីប៉ាសេអីុ ត្រូវបានរៀបចំកែលម្អសោភ័ណភាពថ្មីដាក់នៅចំណុចកណ្តាលអាងទឹក ជារង្វង់មូលទំហំធំជាងមុន មានផ្កាភ្ញីបង្ហាញពីរចនាបថខ្មែរពីបុរាណ ដែលអាចទាក់ទាញភ្ញៀវទេសចរឱ្យចាប់អារម្មណ៍ និងធ្វើឲ្យក្រុងស្ទឹងត្រែងទាំងមូលមានសោភ័ណភាពពិតប្រាកដ ។ អាងទឹកនេះ មានកម្ពស់១,៣ម៉ែត្រ អង្កត់ផ្ចិត៨ម៉ែត្រ ស្ថិតនៅសួនច្បារប្របមាត់ទន្លេទល់មុខកំពង់ផែទីរួមខេត្ត ។និមិត្តរូបត្រីប៉ាសេអីុ ព័ទ្ធដោយអាងទឹកនិងសួនច្បារនេះ ក្រុមអ្នកជំនាញនឹងគ្រោងបញ្ចប់ការស្ថាបនានៅចុងខែកក្កដា ឬនៅដើមខែសីហា ឆ្នាំ២០១៨នេះ ។
លោក សាយ កុសល អភិបាលក្រុងស្ទឹងត្រែង បានថ្លែងថា អាជ្ញាធរខេត្តបានសម្រេចពង្រីកអាងទឹកដែលជារង្វង់មូល កន្លែងតម្កល់រូបសំណាកត្រីប៉ាសេអីុឱ្យធំជាងមុននេះ ព្រោះវា អាចធ្វើឱ្យខេត្តមានសោភ័ណភាព ដើម្បីទាក់ទាញភ្ញៀវទេសចរឱ្យមកទស្សនាបានច្រើននៅចុងឆ្នាំ២០១៨នេះ ។
លោកអភិបាលក្រុងបន្ថែមថា ការរៀបចំរូបសំណាកត្រីប៉ាសេអុីនេះ ក៏ជាចំណែកមួយដាស់ស្មារតីប្រជាអ្នកនេសាទឱ្យជួយអភិរក្សពូជត្រីដ៏មានតម្លៃនេះ ដែលមាននៅទន្លេមេគង្គលើ ។ លោកបន្តថា សំណង់នេះក្រុមជាងត្រូវពន្លឿនការស្ថាបនាទីតាំងសួនច្បារមាត់ទន្លេ និងរង្វង់មូលដាក់រូបសំណាក«ត្រីប៉ាសេអីុ»ឱ្យបានលឿន ដើម្បីបង្ហាញដល់ភ្ញៀវទេសចរបានស្គាល់ពីសម្បត្តិធនធានធម្មជាតិដ៏មានតម្លៃ រួមគ្នាអភិរក្សត្រីប្រភេទនេះផង និងអាចធ្វើឲ្យក្រុងស្ទឹងត្រែងមានសោភ័ណភាពស្រស់ស្អាតផង ៕
ចែករំលែកព័តមាននេះ