ខេត្តមណ្ឌលគិរី ៖ មន្ត្រីនគរបាលព្រំដែនម្នាក់បានស្លាប់ បន្ទាប់ពីផឹកស្រាពេញមួយថ្ងៃកើតអាការខ្យល់គរ កាលពីវេលាម៉ោង៨និង៤០នាទីព្រឹកថ្ងៃទី៣០ កក្កដា ២០១៨ នៅចំណុចផ្សារសែនមនោរម្យ ស្ថិតក្នុងភូមិកណ្តាល សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី។
ជនរងគ្រោះដែលស្លាប់ឈ្មោះ អៀម សាវិន ភេទប្រុស អាយុ២៩ឆ្នាំ ជាមន្ត្រីនគរបាលការពារព្រំដែនគោកវរៈ៣០៣ ទីលំនៅភូមិចំការតែ សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី។
លោកវរសេនីយ៏ឯក កាន់ ពេញ អធិការនគរបាលក្រុងសែនមនោរម្យបានឲ្យដឹងថា បុរសរងគ្រោះបានផឹកស៊ីជាមួយមិត្តភក្តិក្រោយពីទៅបោះឆ្នោតរួច តាំងពីវេលាម៉ោង៩ព្រឹកថ្ងៃទី២៩ រហូតដល់វេលាម៉ោង៨នឹង១០នាទីយប់ថ្ងៃដដែលទើបចូលផ្ទះដោយពួកគេបានផឹកស៊ីស្ទើរពញមួយថ្ងៃ។
លោកអធិការបន្តថា ក្រោយពីត្រលប់មកដល់ផ្ទះវិញ ជនរងគ្រោះបានត្អូញត្អែថា មិនស្រួលខ្លួន ហើយត្រូវបានសាច់ញាតិបញ្ជូនទៅមន្ទីរពេទ្យដើម្បីព្យាបាល តែនៅពេលទៅដល់មន្ទីរពេទ្យជនរងគ្រោះក៏បានផុតដង្ហើមស្លាប់តែម្តង ។
បើតាមគ្រួសារបានឲ្យដឹងថា កន្លងមកជនរងគ្រោះធ្លាប់ត្រូវគេវាយបណ្តាលឲ្យផុងលលាដ៏ក្បាល ហើយសព្វថ្ងៃក្បាលរបស់ជនរងគ្រោះមិនមានឆ្អឹងលលាដ៏មួយផ្នែក ដោយគ្រូពេទ្យបានហាមឃាត់ដាច់ខាតមិនឲ្យគេផឹកស្រាឡើយ។
បន្ទាប់ពីទទួលបានដំណឹងខាងលើភ្លាម កម្លាំងជំនាញការិយាល័យបច្ចេកទេស និងវិទ្យាសាស្ត្រសហការជាមួយកម្លាំងជំនាញនៃអធិការដ្ឋាននគរបាលក្រុងសែនមនោរម្យ និងក្រុមគ្រូពេទ្យនៃមន្ទីពេទ្យបង្អែកសែនមនោរម្យ បានធ្វើការពិនិត្យសពជនរងគ្រោះ ។ក្រោយពិនិត្យសព កម្លាំងជំនាញបានសន្និដ្ឋានថា ជនរងគ្រោះស្លាប់ដោយមូលហេតុស្រវឹងស្រាខ្លាំងបណ្តាលឱ្យខ្យល់គស្លាប់ ។ ចំណែកស្លាកស្នាមនៅលើខ្លួនសពចំនួន៣កន្លែង គឺជាស្លាកស្នាមដែលគាត់ដួលអំឡុងពេលផឹកស៊ី មិនមែនជាស្នាមដែលកើតចេញពីការវាយតប់គ្នានោះឡើយ៕
ចែករំលែកព័តមាននេះ