ខេត្តកំពង់ចាម ៖ រថយន្តដឹកអ្នកដំណើរ១គ្រឿងបានឆ្លងចរន្តអាគុយបណ្តាលឱ្យឆាបឆេះសល់តែគ្រោងឆ្អឹងប៉ុណ្ណោះ ។ ហេតុការណ៍នេះកើតឡើងកាលពីវេលាម៉ោង៨និង២០នាទីព្រឹកថ្ងៃទី៣០ ខែកក្កដា ឆ្នាំ២០១៨ ត្រង់ចំណុចព្រលានយន្តហោះចាស់(រមូល) ក្នុងភូមិរមូល ឃុំរអាង ស្រុកកំពង់សៀម ។
នគរបាលស្រុកកំពង់សៀមប្រាប់ឲ្យដឹងថាៈ រថយន្តមួយគ្រឿងដែលរងការខូចខាតខាងលើពាក់ស្លាកលេខ ភ្នំពេញ ២Q-៣០៧៧ ជាកម្មសិទ្ធរបស់ឈ្មោះ សួរ ថេង ភេទប្រុស អាយុ៣៨ឆ្នាំ នៅភូមិអំពិលលើ ឃុំអំពិល ស្រុកកំពង់សៀម ខេត្តកំពង់ចាម ដែលទិញពីគេមកក្នុងតំលៃជិត២ម៉ឺនដុល្លារ ។
នគរបាលស្រុកកំពង់សៀមប្រាប់បន្តថា នៅពេលមុនកើតហេតុ រថយន្តមួយគ្រឿង ពាក់ស្លាកលេខ ភ្នំពេញ ២Q-៣០៧៧ បានបើកក្នុងទិសដៅពីលិចមកកើត ស្របពេលដែលបើកបរមកដល់ត្រង់កណ្តាលព្រលានយន្តហោះរមូល ស្រាប់តែឆ្លងចរន្តអាគុយបណ្តាលឱ្យឆាបឆេះតែម្តង ក្នុងពេលដែលរថយន្តកំពុងឆាបឆេះត្រូវបានលោកនាយប៉ុស្តិ៍ទូរស័ព្ទរាយការណ៍មកលោកអធិការនគរបាលស្រុកកំពង់សៀម និងសុំឲ្យរថយន្តពន្លត់អគ្គីភ័យរបស់ស្នងការដ្ឋាននគរបាលខេត្ត១គ្រឿងទៀតដើម្បីមកជួយបាញ់ទឹកពន្លត់។ តែទំរាំរថយន្តពន្លត់អគ្គិភ័យមកដល់ រថយន្តខាងលើនេះត្រូវភ្លើងឆាបឆេះស្ទើរសុសអស់ទៅហើយ តែមិនបណ្តាលឲ្យរងគ្រោះអ្នកដល់អ្នកបើកបរនោះទេ ។
ប្រភពដដែលបានបន្តទៀតថា ក្នុងពេលដែលរថយន្តកំពុងឆាបឆេះដំបូង ម្ចាស់រថយន្តបានដោះអាវរត់ទៅជ្រលក់ទឹកដើម្បីយកមកគ្របពន្លត់ដែរ គ្រាន់តែម្ចាស់បើកទ្វាររថយន្ត អណ្តាតភ្លើងបានឆាបឆេះខ្លាំងយ៉ាងពេញបន្ទុកទៅហើយ ដោយមិនមានមធ្យោបាយណាពន្លត់បានទេ ។
លោកនាយប៉ុស្តិ៍រដ្ឋបាលឃុំរអាងបានឱ្យដឹងថា ប្រសិនបើរថយន្តខាងលើនេះបើកមកដល់ហើយឆេះត្រង់មុខប៉ុស្តិ៍នោះ នគរបាលអាចនឹងជួយអន្តរាគមន៍បាញ់ទឹកពន្លត់បាន ព្រោះតែអាងទឹកនៅក្បែរនោះងាយស្រួលទាញទុយោដោតម៉ូទ័របាញ់ទឹក។ តែរថយន្តនេះបានឆាបឆេះនៅចំងាយពីប៉ុស្តិ៍ប្រមាណ៥០០ម៉ែត្រឯណោះ ហើយបើម្ចាស់រថយន្តមានបំពង់ពន្លត់អគ្គីភ័យដាក់តាមរថយន្តអាចនឹងបាញ់ពន្លត់បានទាន់ពេល ហើយភ្លើងមិនអាចឆេះរាលដាលរហូតខ្ទេចរថយន្តអស់ដូច្នេះទេ ។
រថយន្តដឹកអ្នកដំណើរខាងលើនេះទើបតែទិញមកដឹកអ្នកដំណើរបានតែប៉ុន្មានខែ ក៏ជួបនឹងហេតុការណ៍បែបនេះ។ ក្នុងពេលដែលភ្លើងឆាបឆេះរថយន្ត មិនមានអ្នកដំណើរជិះនោះទេ មានតែម្ចាស់រថយន្តតែម្នាក់ប៉ុណ្ណោះ ៕
ចែករំលែកព័តមាននេះ