រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោតបានអះអាងពីការបោះឆ្នោតជ្រើសតាំងតំណាង រាស្ត្រអាណត្តិទី៦ថា មានភាពល្អប្រសើរ និងរលូន ដោយមានអ្នកទៅបោះឆ្នោតប្រមាណ៨២,១៧% គឺកើនជាងអាណត្តិទី៥ ។ ថ្លែងក្នុងកិច្ចប្រជុំជាមួយ…
រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោតបានអះអាងពីការបោះឆ្នោតជ្រើសតាំងតំណាង រាស្ត្រអាណត្តិទី៦ថា មានភាពល្អប្រសើរ និងរលូន ដោយមានអ្នកទៅបោះឆ្នោតប្រមាណ៨២,១៧% គឺកើនជាងអាណត្តិទី៥ ។
ថ្លែងក្នុងកិច្ចប្រជុំជាមួយ ភាគីពាក់ព័ន្ធក្រោយបញ្ចប់ការបោះឆ្នោត នារសៀលថ្ងៃទី២៩ កក្កដា នៅទីស្តីការក្រសួងមហាផ្ទៃ លោកស៊ិក ប៊ុនហុក អះអាងថា ដំណើរការបោះឆ្នោតមានភាពល្អប្រសើរ និងប្រកបដោយរលូន ហើយមានចំនួនច្រើនជាងអាណត្តិទី៥ ។
ការបោះឆ្នោត មានភាពល្អប្រសើរ ទោះបីជាការិយាល័យមួយចំនួន ត្រូវបានលិចទឹកក៏ដោយ ក៏គ.ជ.ប បានរៀបចំដំណើរការល្អដោយប្រើប្រាស់សត្វដំរីដឹកសម្ភារដំណើរការបោះឆ្នោត និងប្រើឧទ្ធម្ភាគចក្រ ដើម្បីដឹកសម្ភារផងដែរ ។
ចាប់ពីម៉ោង៧ព្រឹក នៅគ្រប់ការិយាល័យទាំងអស់ បានបើកដំណើរការបោះឆ្នោតដោយរលូន ជាងនេះមានការិយាល័យមួយចំនួនបិទមុនម៉ោង ៣ ដោយសារអ្នកមានឈ្មោះបោះឆ្នោតបានបោះអស់ និងការិយាល័យភាគច្រើនបានបិទនៅម៉ោង៣ ។
លោកស៊ិក ប៊ុនហុក មានប្រសាសន៍ថា តាមតួលេខអ្នកដែលបានចូលរួមបោះឆ្នោតនៅទូទាំងប្រទេសរួមមាន បន្ទាយមានជ័យ ៧៥,១២% បាត់ដំបង៧៦,៩០% កំពង់ចាម៨១,២៨% កំពង់ឆ្នាំង៨៧,៣៤% កំពង់ ស្ពឺ៨៨,៦៨% កំពង់ធំ៨០.៩៨% កំពត៨៥,២៤% កណ្តាល៨៦,២៩% កោះកុង៨០,៩៥% ក្រចេះ៨១,៤៤% មណ្ឌលគិរី៨១,៩៩% ភ្នំពេញ៨០,០៧% ព្រះវិហារ៨៤,៥១% ព្រៃវែង៨១,៩១% ពោធិិ៍សាត់៨៦,៣៣% រតនគិរី៨១,៣១% សៀមរាប៧៣,៥០% ព្រះសីហនុ៨២,៦៤% ស្ទឹងត្រែង៧៤,៧០% ស្វាយរៀង៨៧,១២% តាកែវ៨៤,៤៩% កែប៩០,៩៨% ប៉ៃលិន៧៩,២៤% ឧត្តរមានជ័យ៧៨,២៨% និងត្បូងឃ្មុំ៨៣,៩៨% ។ សរុបចំនួនឃុំ-សង្កាត់១៦៤៦ ចំនួនការិយាល័យបោះឆ្នោត ២២.៩៦៧ ចំនួនអ្នកបោះឆ្នោតក្នុងបញ្ជីបោះឆ្នោត៨.៣៨០.២១៧នាក់ ចំនួនអ្នកបោះឆ្នោត៦.៨៨៥.៧២៩នាក់ គិតជាភាគរយ ៨២,១៧% ។
លោកប្រធានគ.ជ.ប បានឲ្យដឹងថា គ.ជ.បនឹងប្រកាសលទ្ធផលបបឋម សម្រាប់ការបោះឆ្នោត ដើម្បីផ្តល់លទ្ធផលដល់ភាគីពាក់ព័ន្ធទូលំទូលាយ តាមទូរទស្សន៍ជាតិ នៅយប់ថ្ងៃទី២៩ កក្កដា ។ លទ្ធផលបណ្តោះ អាសន្ន នឹងប្រកាសនៅថ្ងៃទី១១ សីហា ឆ្នាំ២០១៨ ហើយគ្មានករណីបោះឆ្នោតឡើងវិញទេ ។
លទ្ធផលផ្លូវការនឹងប្រកាសនៅថ្ងៃទី១៥ សីហា ឆ្នាំ២០១៨ ។ ចំពោះតួលេខអ្នកដែលចូលរួមបោះឆ្នោតឆ្នាំ២០១៨នេះ ត្រូវបានគ.ជ.ប អះអាងថា មានចំនួនច្រើនជាងឆ្នាំ២០១៣ ព្រោះថា អ្នកដែលចួលរួមបោះឆ្នោតសុទ្ធតែយល់ដឹងបានច្បាស់ ក្នុងការជ្រើសរើសអ្នកដឹកនាំរបស់ខ្លួន ជាងនេះ អ្នកបោះឆ្នោតមានភាពចាស់ទុំនយោបាយផងដែរ ។
ចំណែកលោកហេង វ៉ាន់ដា ប្រធានសមាគមគ្រឹះស្ថានឧត្តមសិក្សា បានលើកឡើង តាមការសង្កេតការណ៍របស់ក្រុមការងារចុះសង្កេតការណ៍បោះឆ្នោត មានភាពល្អប្រសើរដោយប្រជាពលរដ្ឋមានសប្បាយរីករាយ គ្មានការបង្ខំពីបុគ្គលណាមួយនោះទេ ។
លោកបញ្ជាក់ថា «តាមភ្នាក់ងារយើង ដែលដាក់សង្កេតការណ៍នៅគ្រប់ខេត្តបានឲ្យដឹងថា អ្នកបោះឆ្នោតមានភាពសប្បាយរីករាយ គ្មានការបង្ខិតបង្ខំនោះទេ និងគ្មានព្រួយបារម្ភពីសុវត្ថិភាពដូចអាណត្តិឆ្នាំ
២០១៣ ។ នៅអាណត្តិទី៦ ឆ្នាំ២០១៨នេះ នៅក្នុងរាជធានីភ្នំពេញ ខេត្តកណ្តាល និងផ្សេងមួយចំនួនតាម
អ្នកសង្កេតការណ៍ផ្ញើមកមានភាពសប្បាយរីករាយ ។
ការបោះឆ្នោតនៅគ្រប់ខេត្ត-ក្រុងមិនមានផលប៉ះពាល់អ្វីនោះទេ គឺរលូនតែម្តង »។លោកបន្តថាការការបោះឆ្នោតនេះ ត្រូវបាន គ.ជ.ប រៀបចំឡើងដោយរលូនតាមនីតិវិធីច្បាប់ លិខិតបទដ្ឋាន ច្បាប់ច្បាស់លាស់ល្អណាស់តាមការអនុម័តរដ្ឋសភា ។
លោកគូសបញ្ជាក់ថា «ប្រជាពលរដ្ឋចេញទៅបោះឆ្នោតដោយសប្បាយរីករាយ ពេញចិត្ត ពេញថ្លើម គ្មានការគំរាមកំហែង ទិញសន្លឹកឆ្នោត លទ្ធផលជាង៨០ភាគរយនេះបង្ហាញថា ប្រជាពលរដ្ឋចង់បានលទ្ធិប្រជាធិបតេយ្យមួយដែលល្អ ។ ការចេញទៅបោះឆ្នោតនេះ បង្ហាញយ៉ាងច្បាស់ថា គាត់ចង់បានលទ្ធិប្រជាធិបតេយ្យតែម្តង ។
ការចូលរួមទៅបោះឆ្នោតរបស់ប្រជាពលរដ្ឋនេះចង់បង្ហាញគាត់ចង់បានរដ្ឋាភិបាលថ្មីដែលរៀបចំដោយ គ.ជ.ប ដែលធ្វើ អ្វីៗតាមច្បាប់។ ផ្ទុយទៅវិញប្រសិនបើពលរដ្ឋមិនចេញទៅបោះឆ្នោតនោះ អ្វីៗក៏មិនអាចរៀបចំបានឡើយ »។
តាមការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦ មានការិយាល័យ ២២.៩៦៧ ។ តាមបញ្ជីឈ្មោះចុងក្រោយរបស់ គ.ជ.ប ឆ្នាំ២០១៧ ពលរដ្ឋដែលមានសិទ្ធិទៅបោះឆ្នោតមានចំនួន៨.៣៨០.២១៧នាក់ ។ ការបោះឆ្នោតអាណត្តិទី៦ មានគណបក្ស នយោបាយ២០ចូលរួមប្រកួតប្រជែងគ្នា ។ សម្រាប់ការបោះឆ្នោតនៅឆ្នាំ២០១៣ អ្នកចូលរួមបោះឆ្នោតទូទាំងប្រទេសមានចំនួន ៦.៧៣៥.២៤៤ស្មើនឹង៦៩,៦១% ។
តាម គ.ជ.ប នៅឆ្នាំ២០១៣មានគណបក្សនយោបាយចំនួនពីរប៉ុណ្ណោះទទួលបានអាសនៈ គឺគណបក្សប្រជាជនកម្ពុជា ទទួលសំឡេងឆ្នោត ៣.២៣៥.៩៦៩នាក់ ស្មើនឹង៤៨,៨៣% ទទួលបាន៦៨អាសនៈ និងគណបក្សសង្គ្រោះជាតិ ទទួលបានសំឡេងឆ្នោត២.៩៤៦.១៧៦នាក់ ស្មើនឹង៤៤,៤៥%នៃសន្លឹកឆ្នោតបានការសរុប ទទួលបាន៥៥អាសនៈ ។ការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦ មានគណបក្សនយោបាយចំនួន២០ចូលរួមប្រកួតប្រជែងគ្នា ។
សម្តេចអគ្គមហាសេនាបតីតេជោ ហ៊ុន សែននិងសម្តេចកិត្តិព្រឹទ្ធបណ្ឌិត នាថ្ងៃទី២៩ ខែកក្កដាវេលាម៉ោង៧និង៣០នាទីព្រឹក បានអញ្ជើញទៅបោះឆ្នោតនៅសាលាគរុកោសល្យនិងវិក្រឹតការខេត្តកណ្តាល ការិយា ល័យបោះឆ្នោតលេខ១៦៩៧ ។តាមអ្នកសង្កេតការណ៍អន្តរជាតិ អង្គការ ICAPP និយាយថា លោកសង្កេតឃើញការបោះឆ្នោតនៅព្រឹកនេះប្រកបដោយសន្តិភាព ស្ងៀមស្ងាត់ ពុំមានបញ្ហាអ្វី គ្មានអំពើហិង្សា ។ លោកសង្កេតមើលតាំងពីម្សិលមិញ ឃើញការរៀបចំបានល្អ ។
លោកបានបង្ហាញជូនដល់ប្រជាពលរដ្ឋកម្ពុជាថា លោកមកសង្កេតការណ៍នៅកម្ពុជានេះគ្មានគាំទ្រអ្នកនេះ និងប្រឆាំងអ្នកនោះទេ គឺលោកឃើញការពិតបែបណាលោកនិយាយបែបនោះ។ លោកមកពីប្រទេសលីបង់ ជាសមាជិក ICAPP លោកបានឃើញនឹងភ្នែកអំពីការរៀបចំការបោះឆ្នោតនាពេលនេះ គឺមានការរៀបចំបានល្អ មានគណបក្សនយោបាយចូលរួមប្រកួតប្រជែងច្រើន និងការរៀបចំបានលំអិត ហើយនេះជារឿងមួយដែលលោកបានសង្កេតឃើញជាក់ស្តែង គឺកម្ពុជាដើរលើផ្លូវប្រជាធិបតេយ្យ ។
ចំណែកសមាជិកអង្គការនេះមួយរូបទៀត មកពីបង់ក្លាដែសនិយាយថា នេះជាការបោះឆ្នោតល្អ ការបោះឆ្នោតស័ក្តិសម ដើម្បីផ្តល់អំណាចទៅដល់ប្រជាពលរដ្ឋ ហើយប្រជាធិបតេយ្យកម្ពុជានឹងកាន់តែខ្លាំងថែមទៀត ជាមួយអំណាចប្រជាពលរដ្ឋ ។ លោកសូមជូនពរឱ្យការបោះឆ្នោតនេះ ប្រព្រឹត្តទៅដោយសុខដុមរមនានៅក្នុងបរិយាកាសសន្តិភាព ។
ចែករំលែកព័តមាននេះ