រាជធានីភ្នំពេញ ៖ រថយន្តមួយគ្រឿងបានបើកបរក្នុងល្បឿនលឿន ហើយស្រាប់តែរេចង្កូតជ្រុលទៅបុកពីក្រោយម៉ូតូសណ្ដោងរ៉ឺម៉កមានដឹកកេសសត្វក្រួចមួយគ្រឿងបណ្ដាលឲ្យធ្លាក់ចូលទៅក្នុងប្រឡាយទឹកស្អុយទាំងព្រឹក ។ ប៉ុន្តែសំណាងល្អអ្នកបើកបរម៉ូតូសណ្ដោងរ៉ឺម៉ករងរបួសស្រាលប៉ុណ្ណោះ ចំណែរថយន្តបានជ្រុលទៅបុកជាប់ក្បាលលូ ទើបមិនបានធ្លាក់ចូលប្រឡាយ។ ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៦និង១៥នាទីព្រឹក ថ្ងៃទី២៧ ខែកក្កដា ឆ្នាំ២០១៨ នៅតាមផ្លូវជាតិ លេខ៤ ត្រង់ចំណុចច្រកចូលបុរីសែនមនោរម្យ ស្ថិតនៅក្នុងភូមិកន្ទោកជើង សង្កាត់កន្ទោក ខណ្ឌពោធិ៍សែនជ័យ ។
តាមប្រភពព័ត៍មានបានឲ្យដឹងថា រថយន្តមួយគ្រឿង ពណ៌ស្លែ ពាក់ស្លាកលេខ ភ្នំពេញ ២AJ-០១០៣ ជិះគ្នា២នាក់ដែលបុរសម្នាក់ជាអ្នកបើកបរ និងនារីម្នាក់ទៀតជាសង្សារបានរួមដំណើរជាមួយ ។ ដោយឡែកម៉ូតូសណ្ដោងរ៉ឺម៉កមួយគ្រឿង ម៉ាកស៊ុយហ្ស៊ុយគីវីវ៉ា មានដឹកសត្វក្រួចដែលសម្លាប់រួចចំនួន៥កេស បើកបរដោយបុរសម្នាក់មិនស្គាល់ឈ្មោះ។
ប្រភពដដែលបានឲ្យដឹងថា នៅមុនពេលកើតហេតុ ម៉ូតូសណ្ដោងរ៉ឺម៉កមានដឹកសត្វក្រួច រធ្វើដំណើរក្នុងទិសដៅពីលិចទៅកើតស្របគ្នាជាមួយរថយន្តដែរ លុះពេលទៅដល់ត្រង់ចំណុចកើតហេតុ ស្រាប់តែរថយន្តបង្កបានជែងស្ដាំរថយន្តផ្សេងទៀត ហើយក៏ជ្រុលទៅបុកពីក្រោយ កន្ទុយរ៉ឺម៉កម៉ូតូ បណ្ដាលឲ្យម៉ូតូសណ្តោងរ៉ឺម៉កធ្លាក់ចូលទៅក្នុងប្រឡាយទឹកស្អុយទាំងកំរោល ។ ចំណែករថយន្តបានជ្រុលទៅបុកផ្ទប់នឹងក្បាលខឿនមាត់លូកល់ជាប់ទៅមុខលែងរួច ទើបរថយន្តអត់ធ្លាក់ចូលប្រឡាយទឹកស្អុយ។
ប្រភពខាងលើបានបន្តថា ពេលនោះអ្នកបើកបរម៉ូតូសណ្ដោង រ៉ឺម៉កកខាងលើរងរបួសស្រាល ហើយ សត្វក្រួចចំនួន៥កេសដែលសម្លាប់រួចបានរងខូចខាតដោយប្រឡាក់ដី ភក់ និងត្រាំទឹកស្អុយទាំងអស់ ហើយភាគីខាងអ្នកបើកបររថយន្តបានសុខចិត្តចេញសងចំនួន៤០០ដុល្លារ តែភាគីខាងម៉ូតូសណ្តោងរ៉ឺម៉កមិនព្រម និងទាមទារថ្លៃព្យាបាលរបួស និងខូចខាតសម្ភារៈសរុបចំនួន១២០០ដុល្លារ ហើយក្រោយពេលធ្វើការសម្របសម្រួលគ្នាមួយសន្ទុះក្រោយមក អ្នកបើកបររថយន្តបានថែម៥០ដុល្លារទៀតសរុបចំនួន៤៥០ដុល្លារ ទើបអ្នកបើកបរម៉ូតូសណ្ដោងរ៉ឺម៉កសុខចិត្តទទួលយកដើម្បីបញ្ចប់រឿង៕
ចែករំលែកព័តមាននេះ