រាជធានីភ្នំពេញ ៖ យុវជនម្នាក់បានបានធ្វើដំណើរទៅកាន់ប៉ុស្ដិ៍នគរបាលចោមចៅ៣ កាលពីវេលាម៉ោង៣ និង៤០នាទីរសៀល ថ្ងៃទី២៦ ខែកក្កដា ឆ្នាំ២០១៨ ដើម្បីដាក់ពាក្យបណ្ដឹង។ ដោយអះអាងថា ត្រូវជនសង្ស័យ៣នាក់ធ្វើជាសុំស្គាល់គ្នា និងសុំចាប់ដៃ បន្ទាប់មកបានដាក់ថ្នាំ ធ្វើឲ្យរូបគេវង្វេងវង្វាន់ បាត់ស្មារតីលែងដឹងអី ក៏ត្រូវជនសង្ស័យទាំងនោះលួចយកទ្រព្យសម្បត្តិ ដូចជាកាបូបលុយ ម៉ូតូ ទូរស័ព្ទដៃ និងគ្រឿងអលង្ការ រួចគេចខ្លួនបាត់អស់។ ប៉ុន្តែករណីនេះត្រូវបាននគរបាលសង្ស័យថា យុវជនខាងលើ ចាញ់ល្បិចជនសង្ស័យបង្ខំឲ្យផឹកតហូតស្រវឹងលែងដឹងខ្លួន ទើបលួចយកទ្រព្យសម្បត្តិជាក្រោយ ពុំមែនដាក់ថ្នាំនោះឡើយ។
យុវជនខាងលើបាននិយាយថា ខ្លួនឈ្មោះ ធី ដារ៉ូ អាយុ១៨ឆ្នាំ មុខរបរកម្មករ ក្រុមហ៊ុននបង្គោលភ្លើង មានស្រុកកំណើតនៅក្នុងភូមិស្វាយអណ្ដូង ឃុំជីផុច ស្រុកមេសាង ខេត្តព្រៃវែង។ សព្វថ្ងៃបានមកស្នាក់នៅធ្វើការនៅក្នុងភូមិកើតហេតុខាងលើ ហើយបានបាត់បង់ម៉ូតូម៉ាកហុងដាឌ្រីម សេ១២៥ ស៊េរីឆ្នាំ២០១១ ពណ៌ខ្មៅ ពាក់ស្លាកលេខ ភ្នំពេញ 1AT- 4618 មួយគ្រឿង កាបូបដៃ១មានលុយចំនួន៧០,០០០រៀល ទូរស័ព្ទ១គ្រឿង អត្តសញ្ញាណប័ណ្ណ កាតគ្រីម៉ូតូ ខ្សែដៃប្លាទីន១ខ្សែ និងចិញ្ចៀន១វង់ផងដែរ។ យុវជននេះបាបបន្តទៀតថា កាលពី វេលាម៉ោង៥ល្ងាច ថ្ងៃទី២៥ ខែកក្កដា ឆ្នាំ២០១៨ ខ្លួន និងមិត្តភក្ដិ២នាក់ទៀត បាននាំគ្នាទៅផឹកស៊ីនៅកន្លែងលក់ទឹកត្នោតជូរ ម្ដុំរោងចក្រដំបូលខៀវ ក្នុងភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ។
លុះពេលទៅបានជួប ជាមួយនឹងជនសង្ស័យចំនួន៣នាក់កំពុងផឹកស៊ីនៅទីនោះដែរ ហើយក្រោយពេលផឹកបានមួយសន្ទុះ ក្រោយមកមិត្តភក្ដិម្នាក់បានត្រឡប់ទៅផ្ទះមុនដោយសារតែប្រពន្ធហៅឲ្យត្រឡប់ទៅផ្ទះ។ ប្រភពខាងលើបានបន្តថា ខណៈនោះស្រាប់តែជនសង្ស័យ៣នាក់ខាងលើដែលខ្លួនមិនធ្លាប់ស្គាល់សោះ បានទៅសុំជល់កែវ និងសុំស្គាល់រាប់អានគ្នា ទើបមានការជល់កែវទៅវិញទៅមក។ លុះក្រោយមកជនសង្ស័យខាងលើបានហៅរូបគេ និងមិត្តភក្ដិម្នាក់ឈ្មោះ ម៉ូវ អាយុ២១ឆ្នាំ ទៅអង្គុយផឹកជុំគ្នាកន្លែងតែមួយតែម្ដង ហើយជនសង្ស័យបានចាប់ដៃពួកខ្លួនទាំង២នាក់ ស្រាប់តែក្រោយមកពួកខ្លួនលែងដឹងអីហាក់ដូចត្រូថ្នាំសណ្ដំ ក៏ត្រូវជនសង្ស័យលួចយកទ្រព្យសម្បត្តិ ទាំងអស់រួចគេចខ្លួនបាត់អស់។
រហូតដល់វេលាម៉ោង៧យប់ថ្ងៃដដែល ទើបដឹងខ្លួនហើយខ្លួនបានបាត់ទ្រព្យសម្បត្តិខាងលើគ្មានសល់ ចំណែកឈ្មោះ ម៉ូវ ដែលជាមិត្តភក្ដិបាត់ទូរស័ព្ទ ម៉ាកអាយហ្វូនតម្លៃ៧០០ដុល្លារ១គ្រឿង។ ប៉ុន្តែមិនបានប្ដឹងនគរបាលភ្លាមៗឡើយ រហូតដល់វេលាម៉ោង៣ និង៤០នាទីរសៀល ថ្ងៃទី២៦ ខែកក្កដា ទើបប្ដឹងនគរបាលប៉ុស្តិ៍ចោមចៅ៣ឲ្យជួយ។ ប៉ុន្តែខណៈនោះដោយសារតែហេតុការណ៍នេះកើតឡើង នៅក្នុងភូមិសាស្ត្រ សង្កាត់ចោមចៅ១ ទើបនគរបាលប៉ុស្តិ៍ចោមចៅ៣ប្រាប់ឲ្យទៅប្ដឹងនៅទីនោះវិញ៕
https://www.youtube.com/watch?v=7osoilh0qd0
ចែករំលែកព័តមាននេះ