រាជធានីភ្នំពេញ ៖ មន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោតបានអះអាង ចំពោះករណីលោកជួង ជូងី មេធាវីការពាក្តីឲ្យអតីតគណបក្សសង្គ្រោះជាតិត្រូវបានគ.ជ.ប សម្រេចបញ្ជូនទៅក្រសួងពាក់ព័ន្ធ និងក្រសួងយុត្តិធម៌ ដើម្បីចាត់វិធានការតាមផ្លូវច្បាប់នៅថ្ងៃទី២៦ កក្កដា ឆ្នាំ២០១៨ ។
លោក សោម សូរីដា អគ្គលេខាធិការរង គ.ជ.ប បានឲ្យដឹងកោះសន្តិភាពនៅថ្ងៃទី២៦ កក្កដា ថា ចំពោះករណីលោកមេធាវី ជួង ជុងី ត្រូវគណៈកម្មាធិការជាតិរៀបចំការបោះឆ្នោតបានដាក់លិខិតទៅក្រសួងយុត្តិធម៌ ដើម្បីឲ្យក្រសួងចាត់វិធានការតាមផ្លូវច្បាប់ ចំពោះបុគ្គលនេះធ្វើស កម្មភាពនយោបាយគាំទ្រចលនាម្រាមដៃស្អាតរបស់លោក សម រង្ស៊ី អតីតគណបក្សសង្គ្រោះ ជាតិ ។
លោកក៏បានឲ្យដឹងថា ករណីមេធាវីការពារក្តីមិនដែលឈ្នះរបស់អតីតបក្សប្រឆាំងនេះដែរ គ.ជ.ប ក៏បានបញ្ជូនលិខិតទៅក្រសួងមហាផ្ទៃក្រសួងព័ត៌មាន និងក្រសួងប្រៃសណីទូរគមនាគមន៍ដើម្បីបណ្តាញសង្គមរបស់ជួងជុងី ដោយបុគ្គលនេះប្រើប្រាស់ធ្វើការបកស្រាយ ឬដោះស្រាយ ច្បាប់ធ្វើឲ្យមានការភ័ណ្ឌច្រឡំពីបទទំនុកចិត្តលើការបោះឆ្នោត ។ ជាមួយគ្នានោះដែរលោកក៏បានឲ្យដឹងថា គ.ជ.ប ក៏បានចេញលិខិតទៅគណៈមេធាវី ដើម្បីពិនិត្យមើលក្រមវិជ្ជាជីវៈរបស់មេធាវីផងដែរ ។
សូមជម្រាបគណបក្សប្រជាជនកម្ពុជាតាមរយៈមេធាវីការពារក្តី លោក គី តិចបានដាក់ពាក្យប្តឹងទៅគណៈកម្មាធិការជាតិរៀបចំការបោះឆ្នោត ដើម្បីចាត់វិធានការច្បាប់ចំពោះលោក មេធាវី ជូងជូងី កាលពេលថ្មីៗកន្លងមកនេះ ។ លិខិតស្នើសុំរបស់គណបក្សប្រជាជនកម្ពុជាដែលបានដាក់ទៅគ.ជ.ប បានបញ្ជាក់យ៉ាងដូច្នេះថា កាលពីថ្ងៃទី១៧ ខែកក្កដា ឆ្នាំ២០១៨ និងបន្ដរហូតមកដល់បច្ចុប្បន្ននេះឈ្មោះ ជួង ជូងី ដែលមានអាសយដ្ឋានស្នាក់នៅផ្ទះលេខ១២បេ ផ្លូវ១៩៧ សង្កាត់ទំបន់ទឹក ខណ្ឌចំការមន រាជធានីភ្នំពេញ បាន និងកំពុងធ្វើសកម្មភាពផ្សព្វផ្សាយតាមបណ្ដាញសង្គម Facebook របស់ខ្លួនប្រព្រឹត្តអំពើទុច្ចរិតរំលោភបំពានលើបញ្ញត្តិមាត្រា១៤២ នៃច្បាប់ស្ដីពីការបោះឆ្នោតជ្រើសតាំងតំណាងរាស្ដ្រ ។ លិខិតបានហៅសកម្មភាពរបស់ឈ្មោះ ជួង ជូងី នេះ គឺពិតជាមានចេតនា និងគោលបំណងច្បាស់លាស់ក្នុងការបំផុតគំនិតទប់ស្កាត់ និងរារាំងប្រជាពលរដ្ឋដែលមានសិទ្ធិបោះឆ្នោតមិនឲ្យទៅបោះឆ្នោត ដែលនឹងប្រព្រឹត្តទៅនាថ្ងៃទី២៩ ខែកក្កដា ឆ្នាំ២០១៨ខាងមុខនេះ ។
លោកមេធាវី គី តិច បានរៀបរាប់ពីដំណើររឿងថា ក្រោយលោក សម រង្ស៊ី ប្រធានចលនាស ង្ក្រោះជាតិបានធ្វើការអំពាវនាវប្រជាពលរដ្ឋឲ្យធ្វើពហិការមិនទៅចូលរួមការបោះឆ្នោតដោយចោទប្រកាន់ថា ការបោះឆ្នោតនាថ្ងៃទី២៩ ខែកក្កដា ឆ្នាំ២០១៨ ខាងមុខជាការបោះឆ្នោតក្លែងក្លាយ និងជាឆាកល្ខោន និងការបំផុសជាបន្តបន្ទាប់អំពីយុទ្ធនាការម្រាមដៃស្អាត ហើយកា លពីថ្ងៃទី១៧ ខែកក្កដា ឆ្នាំ២០១៨ លោក ជួង ជូងី បានបង្ហោះវីដេអូខ្លីប (Video Clip) មួយដែល មានរយៈពេល០៧និង៣៣វិនាទីនៅលើគណនី Facebook របស់ខ្លួន ។ លោកមេធាវី សង្កត់ធ្ងន់ថា ការចោទប្រកាន់ថា ការបោះឆ្នោតជាការបោះឆ្នោតក្លែងក្លាយ ឬជាឆាកល្ខោននឹងធ្វើឲ្យមជ្ឈដ្ឋានជាតិ និងអន្តរជាតិ មានការភ័ណ្ឌច្រឡំនាំឲ្យបាត់ទំនុកចិត្តលើការបោះឆ្នោត និងភ័ណ្ឌច្រឡំលើភាពស្របច្បាប់នៃស្ថាប័នដែលកើតចេញពីការបោះឆ្នោត ។ ការភ័ណ្ឌច្រឡំនេះនឹងបង្កឲ្យកើតមានការតវ៉ាប្រឆាំងនឹងរដ្ឋអំណាចដែលជាកត្តាធ្វើឲ្យមានភាពអសន្តិសុខសង្គម ប៉ះពាល់ដល់សណ្តាប់ធ្នាប់សាធារណៈ និងអាចនាំឲ្យកើតកលិយុគជាតិ ។
សកម្មភាពញុះញង់នេះបង្ហាញពីការរៀបចំជាអង្គការចាត់តាំងដែលមានរចនាសម្ព័ន្ធត្រឹមត្រូវ ព្រោះថា ក្រោយមានការអំពាវនាវរបស់មេចលនាសង្គ្រោះជាតិរួចមកក៏កើតមានព្រឹត្តិការណ៍ប្រឆាំងការបោះឆ្នោតជាបន្តបន្ទាប់ ។ ពាក់ព័ន្ធនឹងការលើកឡើងរបស់មេធាវីនេះដែរ បើយោងតាមមាត្រា៣៤ នៃរដ្ឋធម្មនុញ្ញនៃព្រះរាជាណាចក្រកម្ពុជាបានចែងថា «ប្រជាពលរដ្ឋខ្មែរទាំងពីរភេទ មានសិទ្ធិបោះឆ្នោត និងអាចឈរឈ្មោះឲ្យគេបោះឆ្នោត ។ និងមាត្រា១៤២នៃច្បាប់ស្តីពី ការបោះឆ្នោតជ្រើសតាំងតំណាងរាស្ត្របានចែងថា ត្រូវផាកពិន័យជាប្រាក់ពី៥,០០០,០០០ (ប្រាំលាន)រៀល ទៅ២០,០០០,០០០ (ម្ភៃលាន)រៀល ដោយគណៈកម្មាធិការជាតិរៀបចំការបោះឆ្នោតដោយពុំទាន់គិតដល់ទោសព្រហ្មទណ្ឌផ្សេងទៀត ចំពោះជនណាដែលតាមគ្រប់មធ្យោបាយទុច្ចរិតរារាំងប្រជាពលរដ្ឋដែលមានសិទ្ធិបោះឆ្នោតមិនឲ្យទៅបោះឆ្នោត, ធ្វើឲ្យបាត់ទំនុកចិត្តលើការសម្ងាត់នៃការបោះឆ្នោត និងធ្វើឲ្យមានការភ័ណ្ឌច្រឡំនាំឲ្យបាត់ទំនុកចិត្តលើ ការបោះឆ្នោត ។ ទាក់ទង និងករណីលោកជួង ជុងីនេះដែរ មិនការឆ្លើយតបពីក្រសួងយុត្តិធម៌យ៉ាងណានោះទេ ។
ប៉ុន្តែលោកគឹម សន្តិភាព អ្នកនាំពាក្យក្រសួងបានសរសេរលើបណ្តាញសង្គមបញ្ជាក់នៅថ្ងៃទី២៦ កក្កដាថា «នេះជាលទ្ធផលរបស់អ្នករំលោភច្បាប់ ! សូមចង់ចាំថា ការបង្ខំដល់រូបកាយ(ដាក់ពន្ធនាគារ) នឹងត្រូវយកមកអនុវត្តក្នុងករណីអ្នកដែលរងការផាកពិន័យ មិនអនុវត្តសេចក្តីសម្រេចអំពីប្រាក់ពិន័យស្ថាពររបស់ គ.ជ.ប តាមបញ្ញត្តិមាត្រា១៦៦នៃច្បាប់ស្តីពីការបោះឆ្នោតជ្រើសតាំងតំណាងរាស្ត្រ និងតាមបញ្ញត្តិនៃក្រមនីតិវិធីព្រហ្មទណ្ឌ !សូមបញ្ឈប់ជាបន្ទាន់នូវយុទ្ធនាការខុសច្បាប់បែបនេះ ៕
ចែករំលែកព័តមាននេះ