របាយការណ៍ក្រសួងសុខាភិបាល ៖ ករណីស្លាប់ដោយសារតែជំងឺមហារីកមានចំនួន១២៨នាក់

ថ្ងៃទី ២៧ ខែ កក្កដា ឆ្នាំ ២០១៨
ម៉ោង ០៩:០០
គុច ណារ៉េន

រាជធានីភ្នំពេញ៖ ជំងឺមហារីកគឺជាជំងឹធ្ងន់ធ្ងរម្យ៉ាងដែលកំពុងតែឆក់យកជីវិតប្រជាពលរដ្ឋខ្មែរយ៉ាង ច្រើន ជាក់ស្តែងក្នុងឆ្នាំ ២០១៧ កន្លងទៅ គឺមានករណីស្លាប់ដោយសារតែជំងឺមហារីកមានចំនួន ១២៨ នាក់ ខណៈចំនួននៃការចូលសម្រាកព្យាបាលនៅមន្ទីរពេទ្យក៏មានការកើនឡើងខ្ពស់គួរឲ្យកត់សម្គាល់ ។

យោងតាមរបាយការណ៍នៃសមិទ្ធផលសុខាភិបាល ឆ្នាំ2017 និងទិសដៅការងារ ឆ្នាំ 2018 ចេញផ្សាយកាលពីខែ កុម្ភៈ ឆ្នាំ ២០១៨ បានឲ្យដឹងថា អន្តរកាលប្រជាសាស្ត្រ និងសុខភាព នៅប្រទេសកម្ពុជាបានបង្ហាញពីសន្ទុះកើនឡើងនៃជំងឺមិនឆ្លង ជាពិសេសជំងឺទឹកនោមផ្អែម ជំងឺឡើងសំពាធឈាម និងជំងឺមហារីក ។ ការស្លាប់មុនអាយុកាលរំពឹងទុកដែលបណ្តាលមកពីជំងឺមិនឆ្លងដូចជា ជំងឺមហារីក កំពុងកើនឡើង ហើយកត្តាហានិភ័យនៃជំងឺមិនឆ្លងកំពុងផ្តល់សញ្ញាឲ្យប្រុងប្រយ័ត្ន ។ បច្ចុប្បន្ន ពាក់កណ្តាលនៃបន្ទុកជំងឺ គឺបណ្តាលមកពីជំងឺមិនឆ្លង ។

តាមរយៈរបាយការណ៍របស់ក្រសួងសុខាភិបាលបានរកឃើញថា មូលហេតុចំបងនៃការស្លាប់ដោយសារជំងឺមហារីកដែលបានសង្កេតឃើញនៅឆ្នាំ2017 រួមមាន៖ (1) – មហារីកមាត់ស្បូន 7% , (2)- មហារីកសុដន់ 5% , (3) – មហារីកថ្លើម 13% , (4)- មហារីកសួត 7% និងមហារីកពោះវៀនធំ 2% និង(5)- មហារីកស្បូន 2% ។

ពាក់ព័ន្ធនឹងជំងឺមហារីក របាយការណ៍របស់ក្រសួងសុខាភិបាលបានបញ្ជាក់ថា ការគ្រប់គ្រងសេវាជំងឺមហារីក មានតែនៅមន្ទីរពេទ្យថ្នាក់ជាតិប៉ុណ្ណោះ ដែលមានសមត្ថភាពធ្វើរោគវិនិច្ឆ័យបញ្ជាក់ជំងឺ និងផ្តល់ការព្យាបាលថែទាំជំងឺសម្រាប់អ្នកជំងឺមហារីក ។ ការវិនិយោគលើហេដ្ឋារចនាសម្ព័ន្ធរូបវ័ន្តឧបករណ៍ និងបច្ចេកវិទ្យាវេជ្ជសាស្ត្រទំនើប បាននិងកំពុងពង្រីកនៅមនី្ទរពេទ្យកាល់ម៉ែត (មជ្ឈមណ្ឌលជំងឺមហារីក) និងមនី្ទរពេទ្យមិត្តភាពខ្មែរសូវៀត ។

កម្មវិធីពិនិត្យស្រាវជ្រាវមហារីកមាត់ស្បូន និងមហារីកសុដន់ កំពុងស្ថិតនៅក្នុងដំណាក់កាលដំបូងនៅតាមមូលដ្ឋានសុខាភិបាលមួយចំនួនទៀត ។ ទោះជាដូច្នេះ ក្រសួងសុខាភិបាលបានបញ្ជាក់ថា មនី្ទរពេទ្យបង្អែករាជធានី-ខេត្តមួយចំនួនអាចផ្តល់ការពិគ្រោះពិនិត្យស្រាវជ្រាវអ្នកជំងឺសង្ស័យមានជំងឺមហារីក រួចបញ្ជួនមកមន្ទីរពេទ្យជាតិ ដើម្បីធ្វើការបញ្ជាក់រោគវិនិច្ឆ័យឱ្យច្បាស់ និងមានសមត្ថភាពផ្តល់ការព្យាបាល និងថែទាំ ដូចជាព្យាបាលសម្រន់ការឈឺចាប់ ជាដើម។ សេវាពិនិត្យស្រាវជ្រាវ (Screening) រកជំងឺមហារីកបានដំណើរការសេវានៅមនី្ទរពេទ្យបងែ្អកកំរិត3 ចំនួន 11 មនី្ទរពេទ្យបង្អែកកំរិត2 ចំនួន 12 មនី្ទរពេទ្យបង្អែកកំរិត1 ចំនួន 8 និងមណ្ឌលសុខភាពចំនួន 238៕

អត្ថបទនេះនាំជូនមកដោយក្រុមហ៊ុនធានារ៉ាប់រងជីវិត AIA