ខេត្តត្បូងឃ្មុំ ៖ មានរឿងរ៉ាវស្មានមិនដល់មួយករណីទៀតហើយ និងធ្វើឱ្យមានការរន្ធត់ចិត្តជាពន់ពេក ដែលបុរសជាប្តីចិត្តទុរយសម្នាក់ ឈ្មោះ ហ៊ាង ស៊ាងខេង អាយុ៥១ឆ្នាំ ជាកម្មករចៀរជ័រកៅស៊ូ បានប្រើអំពើហិង្សាលើប្រពន្ធយ៉ាងសាហាវឃោរឃៅបំផុត ដោយចាប់ចងច្រវាក់ព្យួរជើងផុតពីរនាបផ្ទះ និងវាយធ្វើបាបលើរូបរាងកាយនិងលើប្រដាប់ភេទថែមទៀត បណ្តាលឱ្យប្រពន្ធឈឺចុកចាប់យ៉ាងខ្លាំង ។
អំពើដ៏សាហាវយង់ឃ្នងនេះ ត្រូវបានសមត្ថកិច្ចចុះទៅអន្តរាគមន៍ចាប់បុរសជាប្តី កាលពីល្ងាចថ្ងៃទី២៣ ខែកក្កដា នៅក្នុងចម្ការកៅស៊ូវាល៧០ ភូមិឈូក ឃុំឈូក ស្រុកក្រូចឆ្មារ រួចបញ្ជូនទៅអយ្យការអមសាសាដំបូងខេត្ត ដើម្បីចាត់ការតាមនីតិវិធី ។
លោកវរសេនីយ៍ត្រី វ៉ា សម្បតិ្ត អធិការរងនគរបាលស្រុកក្រូចឆ្មារ ទទួលផែនព្រហ្មទណ្ឌបានឲ្យដឹងថា បុរសកំណាចខាងលើនេះ បានមករស់នៅក្នុងចម្ការកៅស៊ូជាមួយនឹងប្រពន្ធឈ្មោះ ស្រេង ផល្លី អាយុ២៩ឆ្នាំ រយៈពេល៣ឆ្នាំហើយ ។ ប៉ុន្តែដោយសាររបរចៀរជ័រកៅស៊ូលើផ្ទៃដីកន្លះហិកតា ចាយវាយមិនគ្រប់គ្រាន់សម្រាប់ដោះស្រាយជីវភាពគ្រួសារ បុរសនេះបានស្រុះស្រួលឱ្យប្រពន្ធទៅប្រកបរបរផ្លូវភេទនៅមង់រៀវ ស្រុកត្បូងឃ្មុំ ជាប់នឹងផ្លូវជាតិលេខ៧ ដែលក្នុង១ថ្ងៃបាន ៥ទៅ៦ម៉ឺនរៀល ដោយមានការចែកភាគរយជាមួយនឹងម៉ែយ៉ែម ឬជួនកាលបានក្រោមនេះ ក៏មានដែរ ។
លោកអធិការរងបន្តថា នៅព្រឹកព្រលឹមថ្ងៃ២៣ កក្កដា ប្តីបានសួរនាំប្រពន្ធរឿងទទួលភ្ញៀវ ដែលមករួមភេទជាមួយ ក្នុងពេលនោះប្រពន្ធបានឆ្លើយត្រង់ថា «មានភ្ញៀវខ្លះមករួមភេទប្រើប្រាស់ស្រោមអនាម័យ តែខ្លះទៀតមិនបានប្រើស្រោមទេ» ។
គ្រាន់តែឮនិយាយបែបនេះ បុរសជាប្តីក៏ខឹងច្រឡោត ហើយទះកំផ្លៀងប្រពន្ធ១ដៃ និងបានយកច្រវាក់មកចងជើងប្រពន្ធម្ខាង ហើយទាញខារឡើងផុតជើងពីរនាបផ្ទះប្រមាណ១ម៉ែត្រ និងជើងម្ខាងទៀតនៅលើរនាប រួចយកអង្រែបុកគ្រឿងមកវាយក្បាលជង្គង់ប្រពន្ធទាំងសងខាង ។
ជាមួយនេះ ថែមទាំងធ្វើទារុណកម្មលើប្រដាប់ភេទប្រពន្ធយ៉ាងអមនុស្សធម៌បំផុត ដោយប្រើទំពាំងនិងយក
ដែកកេះដុត ព្រមទាំងយកឡាមមកឆូតដៃសងខាង បណ្តាលឱ្យឈឺចុកចាប់ហួសប្រមាណស្រែកទ្រហោយំយ៉ាងទារុណ ។
តាមប្រវត្តិ ពួកគេយកគ្នាជាប្តីប្រពន្ធ ខណៈដែលបុរសនេះពោះម៉ាយកូន១ ឯស្ត្រីនេះក៏មេម៉ាយកូន១ដូចគ្នា និងរស់នៅជាមួយគ្នាបាន៣ឆ្នាំ តែមិនមានកូនទេ និងមានផ្ទៃដីដំណាំកៅស៊ូកន្លះហិកតា ។ លោកអធិការរង វ៉ា សម្បត្តិ បញ្ជាក់ថា ក្រោយពីធ្វើបាបប្រពន្ធហើយ បុរសជាប្តីនេះ ក៏ដេកលក់បាត់ទៅ លុះនៅម៉ោង១២ថ្ងៃត្រង់ ប្រពន្ធលួចស្រាយចំណងបាន ក៏ដើរចុះពីលើផ្ទះថ្នមៗ មកពួនក្នុងព្រៃចម្ការដំឡូង ។
រហូតដល់វេលាល្ងាចថ្ងៃដដែលនោះ ទើបសមត្ថកិច្ចបានដឹងពីករណីនេះ និងទទួលបញ្ជាពីលោកអធិការនគរបាលស្រុកក្រូចឆ្មារ ក៏ដូចជាលោកឧត្តមសេនីយ៍ទោ បែន រ័ត្ន ស្នងការនគរបាលខេត្តបានចាត់កម្លាំងឱ្យចុះទៅកន្លែងកើតហេតុ និងចាប់ខ្លួនបុរសជាប្តី ។
ព្រឹកថ្ងៃទី២៥ ខែកក្កដា បុរសជាប្តីកំណាចនេះ ត្រូវបានសមត្ថកិច្ចបញ្ជូនទៅអយ្យការអមសាលាដំបូងខេត្ត ចំណែកស្ត្រីជាប្រពន្ធត្រូវបានសមត្ថកិច្ចនាំទៅសង្គ្រោះនៅមន្ទីរពេទ្យបង្អែកស្រុកក្រូចឆ្មារ ៕
ចែករំលែកព័តមាននេះ