រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់កំពង់ផែស្វយ័តក្រុងភ្នំពេញ ដែលបានចេញផ្សាយកាលពីចុងសប្ដាហ៍មុននេះ បានឲ្យដឹងថា ទីតាំងកំពង់ផែស្វយ័តបច្ចុប្បន្ន ត្រូវបានប្រកាសជួលទៅឲ្យវិនិយោគិនចិនរយៈពេល៥០ឆ្នាំ ដើម្បីអភិវឌ្ឍន៍ជាមជ្ឈមណ្ឌលពាណិជ្ជកម្មចម្រុះ The City Gate ។ ការជួលផ្ទៃដីទីតាំងនេះ ត្រូវបានកំពង់ផែស្វយ័តប្រកាសថា ដើម្បីបង្កើនប្រាក់ចំណូលបន្ថែម និងចូលរួមអភិវឌ្ឍន៍ទីក្រុងតាមដងទន្លេ ។
តាមសេចក្តីប្រកាសដដែលបានឲ្យដឹងផងដែរថា កិច្ចសន្យាជួលនេះ មានរយៈពេល៥០ឆ្នាំ ដោយគិតចាប់ពីថ្ងៃទី២៩ ខែមិថុនា ឆ្នាំ២០១៨ រហូតដល់ថ្ងៃទី២៨ ខែមិថុនា ឆ្នាំ២០៦៨ ដែលមានកំណត់ក្នុងអនុក្រឹត្យលេខ៣២ អនក្រ.បក ចុះថ្ងៃទី៩ ខែមីនា ឆ្នាំ២០១៨ ស្ដីពីការធ្វើអនុបយោគទីតាំងដីនៅបណ្ដោយទន្លេសាប ពីស្ពានជ្រោយចង្វា មកដល់ផ្សាររាត្រី ។ ចំណែកប្រាក់ឈ្នួលលើការជួលដីនេះ គឺជាការបង់ប្រាក់ឈ្នួលផ្ដាច់តែម្ដងក្នុងចំនួន១៦,៥លានដុល្លារអាមេរិកសម្រាប់រយៈពេល៥០ឆ្នាំ រួមបញ្ចូលទាំងអាករលើតម្លៃបន្ថែម (VAT) ចំនួន១០% ។
ផ្ទៃដីដែលត្រូវបានជួលឲ្យវិនិយោគិនចិន អភិវឌ្ឍសម្រាប់កំពង់ផែស្វយ័តក្រុងភ្នំពេញ គឺចាប់ពីស្ពានជ្រោយចង្វា ដល់ផ្សាររាត្រី ហើយនៅក្នុងគម្រោងរបស់ចិន នឹងអភិវឌ្ឍជាអគារបណ្ដុំការិយាល័យពាណិជ្ជកម្ម មជ្ឈមណ្ឌលសិល្បៈ ទីធ្លាសម្ដែងវប្បធម៌សិល្បៈ ទីធ្លាសួនបាញ់ទឹក របាំលើទឹក និងផ្សារអណ្ដែតទឹក សួនកំពង់ផែ ទីធ្លាកម្សាន្តនិងសួនច្បារសាធារណៈ មជ្ឈមណ្ឌលទេសចរណ៍រាជធានីភ្នំពេញ ការិយាល័យបច្ចេកវិទ្យា អគារស្នាក់នៅរួមបែបវប្បធម៌ អគារស្នាក់នៅរួមបែបច្នៃប្រឌិតទំនើប និងសណ្ឋាគារលំដាប់ផ្កាយប្រាំ ជាដើម ។
ដោយឡែក ចំពោះកំពង់ផែស្វយ័តក្រុងភ្នំពេញ នឹងនៅតែធ្វើប្រតិបត្តិការរបស់ខ្លួនលើទីតាំងជួលនេះដដែល ដោយទុកជាចំណតផែលើកដាក់ទំនិញ ចំណតផែទេសចរណ៍ជាតិ និងអន្តរជាតិ ជាធម្មតា ។
ក្រៅពីប្រគល់ប្រាក់ឈ្នួលជាង១៦លានដុល្លារអាមេរិកដល់កម្ពុជាហើយនោះ ក្រុមហ៊ុននេះក៏បានយល់ព្រមចេញចំណាយផ្ទាល់ខ្លួនសាងសង់ហេដ្ឋារចនាសម្ព័ន្ធជូនកំពង់ផែស្វយ័តក្រុងភ្នំពេញផងដែរ ក្នុងនោះ សាងសង់ច្រាំងទន្លេពីគល់ស្ពានជ្រោយចង្វា ដល់ផ្សាររាត្រីមាត់ទន្លេ ចំណាយទឹកប្រាក់១៩លានដុល្លារអាមេរិក, សាងសង់ផ្លូវថ្មើរជើង និងផ្លូវសម្រាប់រថយន្តធុនតូច ស្របតាមមាត់ទន្លេពីគល់ស្ពាន ដល់ផ្សាររាត្រី ចំណាយទឹកប្រាក់១១លានដុល្លារអាមេរិក ។ បន្ថែមពីលើនេះ ក្រុមហ៊ុនក៏បានយល់ព្រមសាងសង់អគាររដ្ឋបាលថ្មីជូនកំពង់ផែស្វយ័តក្រុងភ្នំពេញ មានទឹកប្រាក់១១លានដុល្លារអាមេរិក និងសាងសង់ចំណតផែពហុបំណងថ្មីចំនួន២ ដែលមានទឹកប្រាក់ចំនួន៣០លានដុល្លារអាមេរិកផងដែរ ។
លោក វ៉ាស៊ឹម សុរិយា អ្នកនាំពាក្យក្រសួងសាធារណការ និងដឹកជញ្ជូន បានមានប្រសាសន៍តាមទូរស័ព្ទថា ពាក់ព័ន្ធនឹងការជួលទីតាំងនេះទៅឲ្យវិនិយោគិនចិនអភិវឌ្ឍន៍លើផ្ទៃដីកំពង់ផែស្វយ័តក្រុងភ្នំពេញ គឺពិតជាបានជួលមែន ហើយវាជាការសម្រេចរបស់ថ្នាក់ដឹកនាំ ក្នុងការអភិវឌ្ឍតំបន់នោះឲ្យក្លាយជាទីក្រុងអភិវឌ្ឍន៍ថ្មីមួយនៅរាជធានីភ្នំពេញ ក៏ប៉ុន្តែទឹកប្រាក់ប៉ុនណា, ជួលរយៈពេលប៉ុន្មាន និងនីតិវិធីយ៉ាងណានោះ លោកមិនអាចដឹងលម្អិតនោះទេ ។
ដោយឡែក លោក ហ៊ី ប៉ាវី អគ្គនាយកកំពង់ផែស្វយ័តក្រុងភ្នំពេញ មិនអាចទាក់ទងបានទេ នៅរសៀលថ្ងៃទី២៤ កក្កដា ឆ្នាំ២០១៨នេះ ដោយទូរស័ព្ទចូលហើយ តែពុំមានអ្នកទទួល ។
បើតាមលោក ច្រឹក សុខនីម អគ្គនាយកក្រុមហ៊ុនCentury21 Mekong បានថ្លែងថា ការវិនិយោគបែបនេះ ពិតជាប្រសើរណាស់សម្រាប់ទីផ្សារកម្ពុជា និងជំរុញកំណើនសេដ្ឋកិច្ចជាតិ បើទោះជាគម្រោងនេះធំក្តី តែមិនមានបញ្ហាសម្រាប់ទីផ្សារនោះទេ ព្រោះអ្នកវិនិយោគពួកគេមកបោះទុនវិនិយោគធំបែបនេះ ពួកគេបានសិក្សាពីទីផ្សារ និងអតិថិជនគោលដៅពួកគេរួចហើយ ។
លោកបន្តថា ៖« មិនមានអ្វីគួរឲ្យព្រួយបារម្ភពីទំហំទីផ្សារនោះទេ ទោះជាប្រជាជនយើងត្រឹម១៦លាននាក់ក៏ដោយ តែទីផ្សារនេះកំពុងទាក់ទាញអ្នកវិនិយោគអន្តរជាតិកាន់តែ
ច្រើន »។
គួរបញ្ជាក់ផងដែរថា ក្រុមហ៊ុនវិនិយោគលើទីតាំងកំពង់ផែស្វយ័តក្រុងភ្នំពេញនេះ បានចូលមកវិនិយោគនៅកម្ពុជារយៈពេលប្រមាណ៧ឆ្នាំមកហើយ ហើយក៏បានបណ្ដាក់ទុនវិនិយោគអគារខុនដូកណ្ដាលទីក្រុងភ្នំពេញមួយបានដោយជោគជ័យផងដែរ គឺគម្រោងអគារខុនដូ East One ។ ជាជំហានបន្ត គេចាំមើលថា តើក្រុមហ៊ុននេះ នឹងទទួលបានជោគជ័យប៉ុនណាទៀតលើការបណ្ដាក់ទុនវិនិយោគទឹកប្រាក់រាប់រយលានដុល្លារនៅកម្ពុជា ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ