រាជធានីភ្នំពេញ ៖ សាលាដំបូងរាជធានីភ្នំពេញកាលពីថ្ងៃទី២៣ កក្កដា បានលើកយកសំណុំរឿងក្តីមួយពីបទ ឆបោកលើទឹកប្រាក់រាប់លានដុល្លារអាមេរិក មកបើកសវនាការផ្តន្ទាទោសលើជនជាប់ចោទ ពាក់ព័ន្ធរឿងលក់ម៉ូតូខ្យល់ ។
អង្គសវនាការបានធ្វើឡើងដោយលោក ពេជ្រ វិជ្ជាធរ ជាចៅក្រមជំនុំជម្រះ និង លោក ឡុង ជាប ព្រះរាជអាជ្ញារង ជាតំណាងអយ្យការ ក្រោមការចូលរួមសាកសួរដេញដោល ពីសំណាក់មេធាវីការពារក្តីដោយអាណត្តិឱ្យភាគីទាំងសងខាង ដែលសវនាការនោះមានជនជាប់ចោទឈ្មោះ ម៉ៅ សុខទី ភេទប្រុស អាយុ២៧ឆ្នាំ មានវត្តមានឈនៅមុខរង្វង់ក្រចកសេះ ដើម្បីឆ្លើយឆ្លងរាល់សំនួរពីអង្គជំនុំជម្រះក្តី ។ ប៉ុន្តែសវនាការនេះក្រោយពីសាកសួរដេញដោលចប់សព្វគ្រប់ ចៅក្រមជំនុំជម្រះបានលើពេលប្រកាសសាលក្រមទៅថ្ងៃទី៦ ខែសីហា ឆ្នាំ២០១៨ ខាងមុខនេះ ។
គួរបញ្ជាក់ថា ជនជាប់ចោទឈ្មោះ ម៉ៅ សុខទី ភេទប្រុស អាយុ២៧ឆ្នាំ មានទីលំនៅផ្ទះ លេខ២២ ផ្លូវលេខ១៩២ ក្រុមទី៥ សង្កាត់ទឹកល្អក់ទី៣ ខណ្ឌទួលគោក មានមុខរបរបើកហាងលក់គ្រឿងតុបតែងម៉ូតូ និង រកស៊ីនាំចូលម៉ូតូពីប្រទេសថៃ យកមកបោះដុំ និងលក់រាយឲ្យម៉ូយ ទិញបន្តយកទៅលក់ក្នុងរាជធានី ខេត្ត ។
សំណុំរឿងនេះមានដើមបណ្តឹងចំនួន៧នាក់ ហើយក៏បានចូលស្តាប់សវនាការដែរ តាមពាក្យបណ្ដឹងរបស់អាជីវករ៧នាក់នោះបានប្តឹងចូលទៅសាលាដំបូងរាជធានីភ្នំពេញ កាលពីខែតុលា ឆ្នាំ២០១៧ ពីបទក្បត់ទំនុកចិត្តដែលមានទឹកប្រាក់រហូតដល់ទៅជាង១លានដុល្លារអាមេរិក តាមរូបភាពយកប្រាក់មុនដើម្បីទៅដឹកនាំម៉ូតូរាប់សិបគ្រឿងពីប្រទេសថៃមកឱ្យម៉ូយ (ប៉ុន្តែដូចយកប្រាក់ទៅដឹកខ្យល់) ។
ក្នុងសវនាការជនជាប់ចោទ ម៉ៅ សុខទី ក៏បានសារភាពដែរថា ខ្លួនពិតជាបានទទួលយកប្រាក់ពីដើមបណ្តឹងចំនួន៧នាក់នោះមែន ដែលជាចំណុចនៃការចាប់ផ្ដើមឆបោកប្រាក់ជាង១លានដុល្លារអាមេរិក ក្នុងការយកទៅចំណាយធ្វើដើមទុនមុន ដើម្បីបានចំណេញជាក្រោយ សម្រាប់ចែកទៅម្ចាស់ប្រាក់ផងនោះ ៕
ចែករំលែកព័តមាននេះ