ខេត្តឧត្តរមានជ័យ ៖ ប៉ូលិសធ្វើការឃាត់ខ្លួនបុរសម្នាក់ដែលបង្កនូវអំពើហិង្សាដោយយកកាំបិតខ្វែវកាប់ទៅលើប្រពន្ធខ្លួនបណ្តាលឱ្យរងរបួសដៃខាងស្តាំ កាលពីវេលាម៉ោង៤និង៣០នាទីល្ងាច ថ្ងៃទី១៩ ខែកក្កដា ឆ្នាំ២០១៨ ស្ថិតនៅក្នុងភូមិត្រពាំងស្វាយឃុំបេង ស្រុកបន្ទាយអម្ពឹល ខេត្តឧត្តរមានជ័យ ។
ស្ត្រីជាប្រពន្ធដែលរងរបួសឈ្មោះ ជួ នួន អាយុ៥០ឆ្នាំ ចំណែកប្តីមានចិត្តឃោឃៅយកកាំបិតខ្វែវកាប់ប្រពន្ធឈ្មោះ រស់ ខន ហៅពៅ អាយុ៤៧ឆ្នាំ ទាំង២នាក់ប្តីប្រពន្ធរស់នៅក្នុងភូមិ-ឃុំកើតហេតុខាងលើ ។
អ្នកភូមិជិតខាងបានឱ្យដឹងថា មុនពេលកើតហេតុគេបានឮសម្លេងទាំង២នាក់ប្តីប្រពន្ធនេះជជែកឈ្លោះប្រកែកគ្នាបន្តិចក្រោយមកស្រាប់តែឃើញបុរស់ជាប្តីទាញកាំបិតខ្វែវដេញកាប់ប្រពន្ធ បន្ទាប់មកអ្នកជិតខាងឃើញហេតុការបែបនេះនាំគ្នាចាប់ឃាត់នឹងរាយការណ៍ទៅសមត្ថកិច្ចមកនាំខ្លួនយកទៅអធិការស្រុកតែម្តង អ្នកភូមិដដែលបានបញ្ចាក់ថា បុរសរូបនេះកន្លងមកតែងតែរករឿងប្រពន្ធកូនជាញឹកញាប់ផងដែរ ។
ប៉ូលិសស្រុកបន្ទាយអម្ពឹលបានឱ្យដឹងថា ក្រោយពីបានទទួលព័ត៌មានពីពលរដ្ឋសមត្ថកិច្ចបានចុះទៅដល់នឹងកន្លែងកើតហេតុហើយបាននាំខ្លួនជនសង្ស័យដែលប្រើអំពើហិង្សាទៅលើប្រពន្ធដែលបង្កឱ្យរងរបួសស្នាមយកមកអធិការស្រុកធ្វើការសាកសួរ ។
យោងទៅលើការសាកសួរ និងយោងទៅលើតាមចម្លើយរបស់ជនសង្ស័យសារភាព សមត្ថកិច្ចបានកសាងសំណុំរឿងបញ្ជូនជនសង្ស័យទៅស្នងការដ្ឋាននគបាលខេត្តចាត់ការបន្តតាមនីតិវិធីច្បាប់ ៕
ចែករំលែកព័តមាននេះ