ខេត្តបាត់ដំបង ៖ បន្ទាប់ពីការអំពាវកាលពីម្សិលមិញថាឱ្យប្រជាពលរដ្ឋ ដែលរស់នៅតាមដងស្ទឹងសង្កែ ត្រូវមានការប្រុងប្រយ័ត្នចំពោះជំនន់ទឹកភ្លៀង គឺកំពុងចាប់ផ្ដើមឡើងកាន់តែខ្លាំងជាថ្មីទៀតនៅពេលនេះ ។
នាព្រឹកថ្ងៃទី១៩ កក្កដា លោកឡុង ផល្គុន ប្រធានមន្ទីរធនធានទឹកនិងឧតុនិយមខេត្ត បានស្នើដល់អាជ្ញាធរនៅតាមមូលដ្ឋានជួយជម្រុញការផ្សព្វផ្សាយបន្ថែមទៀត ដល់ពលរដ្ឋអំពីការប្រឈមនឹងជំនន់ទឹកភ្លៀងដែលកំពុងមានសន្ទុះឡើងកាន់តែខ្លាំងនាពេលនេះផងដែរ ។
ប្រធានមន្ទីរដដែលបានផ្ដល់ព័ត៌មានបន្ថែមតាមទូរស័ព្ទនៅព្រឹកនេះដូច្នេះថា មន្ត្រីនានា ជាពិសេសអាជ្ញាធរនៅក្នុងមូលដ្ឋាន សូមជួយផ្សព្វផ្សាយបន្ថែម ដើម្បីឱ្យបានជ្រាបដល់ប្រជាពលរដ្ឋ អំពីបញ្ហាជំនន់ទឹកភ្លៀងដែលកំពុងឡើងខ្លាំងនៅក្នុងស្ទឹងសង្កែនេះ ។ ជាពិសេស ប្រជាពលរដ្ឋដែលរស់នៅប៉ែកខាងក្រោម នៃដងសង្កែ ត្រូវតែមានការប្រុងប្រយ័ត្ន ឬអាចជម្លៀសទៅកាន់ទីទូលមានសុវត្ថិភាពជាបណ្ដោះអាសន្នសិន ក៏បាន ។
ប៉ុន្តែលោកឡុង ផល្គុន មិនទាន់អាចសន្និដ្ឋានអំពីកម្ពស់ទឹកស្ទឹង ដែលអាចឈានដល់ការប្រកាសអាសន្នធ្ងន់ធ្ងរ ដល់កំរិតណានៅឡើយទេ ហើយក៏មិនទាន់អាចសន្មត់ថា ជំនន់ទឹកស្ទឹងនេះ អាចនឹងអូសបន្លាយប៉ុន្មានថ្ងៃដែរ ។
ប៉ុន្តែលោក ឡុង ផល្គុន ក៏បានបញ្ជាក់ដែរថា ពេលនេះទាំងអាជ្ញាធរខេត្ត ទាំងមន្ទីរជំនាញរបស់លោក រួមទាំងមន្ទីរនានាផង បាននិងកំពុងតាមដានស្ថានភាព ការវិវឌ្ឍន៍នៃជំនន់ទឹកភ្លៀងនេះ យ៉ាងយកចិត្តទុកដាក់បំផុត ដើម្បីរកវិធីរំដោះទឹក និងទប់ស្កាត់កុំឲ្យកម្លាំងទឹកបុកខ្លាំង ។
ទោះជាយ៉ាងណា បើតាមមន្ត្រីជំនាញដែលបានតាមដានកម្ពស់ទឹកស្ទឹងសង្កែនេះជាប្រចាំបានឲ្យដឹងថា គិតត្រឹមម៉ោង១១ និង៣០នាទីថ្ងៃត្រង់នេះ កម្ពស់ទឹកស្ទឹងសង្កែបានឡើងដល់កម្ពស់១២,៥០ម៉ែត្រហើយ ។ ហើយចលនានៃទឹកកំពុងតែហក់ឡើងជាបណ្ដើរៗទៀត ព្រោះនៅប៉ែកខាងលើនៃប្រភពទឹកស្ទឹង នៅមានភ្លៀងធ្លាក់មិនឈប់ឈរនៅឡើយ ។ ដូច្នេះ ប្រជាពលរដ្ឋគួរតែប្រុងប្រយ័ត្នឱ្យបានខ្ពស់បំផុត ដើម្បីចៀសវាងអំពីផលប៉ះពាល់ ដោយសារជំនន់ទឹកភ្លៀងនេះ ។
ចែករំលែកព័តមាននេះ