រាជធានីភ្នំពេញ ៖កញ្ញា សំ ថារ័ត្ន កីឡាការិនីល្បុក្កតោ ដែលជាកូនស្រីតន្ត្រីករឆ្នើមលោកអ៊ុំ ដរ៉ា បានពោលពាក្យយ៉ាងកម្សត់លាយឡំដោយទឹកភ្នែក ពីជំងឺឪពុកដែលមិនបានធូរស្បើយពីមួយថ្ងៃទៅមួយថ្ងៃ ។…
រាជធានីភ្នំពេញ ៖កញ្ញា សំ ថារ័ត្ន កីឡាការិនីល្បុក្កតោ ដែលជាកូនស្រីតន្ត្រីករឆ្នើមលោកអ៊ុំ ដរ៉ា បានពោលពាក្យយ៉ាងកម្សត់លាយឡំដោយទឹកភ្នែក ពីជំងឺឪពុកដែលមិនបានធូរស្បើយពីមួយថ្ងៃទៅមួយថ្ងៃ ។ ទោះជាយ៉ាងណាក្តីកញ្ញាថារ័ត្ន នៅតែបន្តព្យាបាលព្រោះតែសង្ឃឹមថាឪពុកនឹងអាចងើបឈរឡើងវិញបាន ។
ស្តេចវីយូឡុងលោកអ៊ុំ ដរ៉ា ល្បីឈ្មោះខ្លាំងអំឡុងទសវត្ស៦០ ។ ក្នុងអំឡុងពេលនោះលោកបាននិពន្ធបទចម្រៀងជាច្រើនបទ ហើយបទចម្រៀងដែលល្បីខ្លាំងរហូតមកដល់បច្ចុប្បន្នមានដូចជា បទចម្រៀងរបស់លោកស៊ីន ស៊ីសាមុត «រូបអូនហ្នឹងហើយ» បទ«ថ្ងៃណាមានសង្ឃឹម» បទច្រៀងដោយអ្នកស្រីរស់ សេរីសុទ្ធា «ឈប់ស្រលាញ់អូនទៅ» បទ«នេះ ឬផលបុណ្យ» បទ«ស្រលាញ់អូនដល់ណា» «ចាស់ជូរឯម» ជាដើម ។
បច្ចុប្បន្នលោកអ៊ុំ ដរ៉ា មានវ័យ៧៩ឆ្នាំ កំពុងមានជំងឺប្រចាំកាយផ្នែកឆ្អឹងត្រគាកខាងឆ្វេងដើរមិនរួចជាច្រើនឆ្នាំមកហើយ ។ ទោះបីជាមានជំងឺប្រចាំកាយជាយូរក្តី កូនស្រីកវីឆ្នើមរូបនេះមិនអស់សង្ឃឹមទេ នាង និងក្រុមគ្រួសារបានសម្រេចចិត្តសាជាថ្មី ដោយនាំគាត់ទៅឲ្យគ្រូខ្មែរបុរាណព្យាបាល ព្រោះពេទ្យវិទ្យាសាស្ត្រ លែងទទួលព្យាបាលទៅហើយ ។
សំ ថារ័ត្ន និយាយថា «ពេទ្យលែងព្យាបាលដោយសារពុកចាស់ជ្រុល ហើយខ្សោយមិនអាចទប់ទល់បាននូវការអនុវត្តព្យាបាលរបស់ពេទ្យទេ ។ ដូច្នេះមានតែវិធីអាគមផ្សំអាយុ ដែលប្រហែលនឹងអាចជួយឪពុកនាងខ្ញុំបាន ។ ថ្លៃព្យាបាលក៏អស់មិនតិចដែរអាចដល់ទៅ២ពាន់ដុល្លារអាមេរិកឯណោះ ។
ទោះបីជាមិនមានលទ្ធភាព ប៉ុន្តែនាងខ្ញុំចង់តស៊ូនឹងការងារជាច្រើនតាមតែអាចធ្វើបានព្រោះតែ កូនៗចង់ឃើញឪពុកឈរបាន មានតែត្រូវប្រឹងរកលុយ ។ ទោះបីជាស្ថានភាពជំងឺឪពុកមិនដូចដើម១០០ភាគរយ ក៏យ៉ាងហោចណាស់ ក៏អាចធ្វើឲ្យឪពុកនាងខ្ញុំបានថយការឈឺចាប់ និងក្រោកឈរបានវិញ និងចង់ឲ្យពុក អង្គុយឲ្យបានយូរ និងកូតវីយូឡុងឲ្យពួកខ្ញុំស្ដាប់ទៀត» ។
បើឪពុកឈរបានវិញមែន សំ ថារ័ត្ន ថានាងនឹងសុំគេឲ្យគាត់ និងនាងឡើងឆាកតន្ត្រីណាមួយជាមួយគ្នា ដោយឪពុកនាងលេងវីយូឡុង ឯនាងជាអ្នកច្រៀង ។ ថារ័ត្ន ពោលទាំងទឹកភ្នែកថា«អរគុណឪពុក ដែលបានសហការជាមួយកូនអំឡុងពេលកូននៅមើលថែ ពេលដែលពុកស្ថិតក្នុងដង្ហើមផិតផើយ ប្រឹងរស់បន្ត ជីវិតដើម្បីជាជនគំរូសម្រាប់សង្គមគ្រួសារ និងប្រទេសជាតិ និងឲ្យ កូនៗបានមើល និងរៀនសូត្រតាម។
ទោះបីពុកមិនបានសម្ដី វោហារស្ដីប្រដៅដូចពុកគេដទៃ តែទង្វើដែលពុកបានបង្ហាញ គឺមានន័យណាស់ទៅហើយ ។ស្ថានភាពគ្រួសារយើងពីមុនវេទនា ឥឡូវនេះពួកយើងបានអង្គុយ គ្រាន់សង្ឃឹមថាថ្ងៃខាងមុខពួកយើងនឹងបានឈរយ៉ាងស្រស់ស្រាយក្ដីសុខបំផុត។
ស្ដាយពុកប្រញាប់ធ្លាក់ខ្លួនឈឺ ពុកអត់ទាន់បានដេញធាក់ កូនៗឲ្យរៀនភ្លេង រៀននិពន្ធអីផង ។ ក៏មិនដែលលឺពុកអួតប្រាប់កូនមួយម៉ាត់ថា «ឪពីមុនល្បីដែរណា ! អួតមួយម៉ាត់ពីរអី អត់អាលីង ។
លោកឪលោកម៉ែ កូនសុំទោស ដែលមិនបានដើរតាមផ្លូវឪ ឪបានចំណូលមិនឈឺសាច់ដូចកូនមែន តែឪចុករួយចង្កេះ ឈឺក្បាល ស្ត្រេស ព្រោះឪប្រើខួរក្បាលគិតច្រើន ។ រឿងធ្វើការបម្រើជាតិ គឺកូនគិតថាកូនដើរផ្លូវជាមួយឪ អ៊ីចឹង សូមឪ និងម៉ែ កុំខកចិត្តអី» ៕
ចែករំលែកព័តមាននេះ