ខេត្តកែប ៖ ពិតជាគួរឲ្យសោកស្តាយ និងមានវិប្បដិសារីជាទីបំផុត ដែលស្ត្រីម្នាក់បានយកកូនប្រុសអាយុ២ខួបកន្លះ ទៅបេះកញ្ឆែតនៅក្នុងប្រឡាយជិតផ្ទះដែលមានទឹកជ្រៅ ហើយនៅពេលចុះបេះបានទុកកូនឲ្យឈរនៅលើភ្លឺប្រឡាយ ។ ដោយរវល់បេះភ្លេចខ្លួន មួយសន្ទុះក៏នឹកឃើញកូន ដែលឲ្យឈរចាំលើភ្លឺប្រឡាយស្រាប់តែបាត់កូនមិនឃើញ ទើបមានការសង្ស័យ ក៏រត់មកផ្ទះរកកូនក្រែងកូនដើរមកផ្ទះមុន ។
ពេលមកដល់ផ្ទះមិនឃើញកូន ទើបផ្អើលឆោឡោប្រាប់អ្នកជិតខាងឲ្យជួយរក ស្រាប់តែប្រទះឃើញកូនលង់ ទឹកប្រឡាយស្លាប់បាត់ទៅហើយ ។ ហេតុការណ៍នេះ កើតឡើងកាលពីវេលាម៉ោង១០ និង៣០នាទីព្រឹកថ្ងៃទី១៣ កក្កដា កន្លងទៅ នៅប្រឡាយទឹកមួយក្នុងភូមិកោះសោម ឃុំពងទឹក ស្រុកដំណាក់ចង្អើរ ។
លោកវរសេនីយ៍ឯក តូវ សុវណ្ណ អធិការនគរបាលស្រុកដំណាក់ចង្អើរ បានឲ្យដឹងថា ការស្លាប់បាត់បង់ជីវិតរបស់ក្មេងប្រុសនេះ មកពីម្តាយមានការធ្វេសប្រហែស គឺនៅពេលដឹកដៃកូនប្រុសដែលទើបតែអាយុជា២ឆ្នាំទៅបេះកញ្ឆែតក្នុងប្រឡាយ បានទុកកូនឲ្យឈរម្នាក់ឯងលើភ្លឺប្រឡាយ ។ លុះពេលធ្លាក់ទឹកម្តាយក៏មិនបានដឹង ទើបបណ្តាលឲ្យកូនលង់ស្លាប់គួរឲ្យសោកស្តាយបែបនេះ ។
សពក្មេងប្រុស ត្រូវបានអាណាព្យាបាលចាត់ចែងរៀបចំធ្វើបុណ្យតាមប្រពៃណីនៅឯលំនៅឋាន ។ ឪពុកក្មេងប្រុសនេះឈ្មោះ ហាន់ ខ្លិច អាយុ៣២ឆ្នាំ ម្តាយឈ្មោះ សុខ មុំ អាយុ២៥ឆ្នាំ រស់នៅក្នុងភូមិ ឃុំ ខាងលើ ៕
ចែករំលែកព័តមាននេះ