តោះមកដឹង តារាឆ្នើមណាខ្លះបានពានផ្ទាល់ខ្លួនត្រឡប់ទៅផ្ទះវិញ

ថ្ងៃទី ១៧ ខែ កក្កដា ឆ្នាំ ២០១៨
ម៉ោង ០៩:២៤
ជិន សំអូន

ជារឿងគួរឱ្យត្រេកអរបំផុតសម្រាប់អ្នកគាំទ្រ និងក្រុមជម្រើសជាតិបារាំងផ្ទាល់ ក្រោយពួកគេយកឈ្នះក្រូអាស៊ីដណ្តើមបានពានរង្វាន់ World Cup ២០១៨ ដែលប្រារព្ធធ្វើនៅប្រទេសរុស្ស៊ីអស់រយៈពេល១ខែមកនេះ ។

យ៉ាងណាមិញ FIFA នៅមានពានរង្វាន់ជាច្រើនផ្សេងទៀតសម្រាប់ផ្តល់ជូនកីឡាកររូបណាដែលបង្ហាញខ្លួនបានយ៉ាងល្អ ជាមួយនឹងសមត្ថភាពលេចធ្លោជាងគេនៅលើទីលានប្រកួត ចាប់តាំងពីវគ្គចែកពូលមក ។ ខាងក្រោមនេះ ជាឈ្មោះកីឡាករ និងក្រុមដែលឈ្នះពានរង្វាន់ទៅតាមសមត្ថភាពលេងរបស់ពួកគេ ៖

១-បាល់មាស ៖

កីឡាករ Luka Modric អាយុ៣២ឆ្នាំក្នុងនាមជាប្រធានក្រុម និងជាខ្សែបម្រើមកពីក្លិប Real Madrid កីឡាករ Luka Modric ដែលខ្នះខ្នែងជួយជ្រោមជ្រែងក្រូអាស៊ី ឡើងមកដល់វគ្គផ្តាច់ព្រ័ត្រជាលើកដំបូងក្នុងប្រវត្តិសាស្ត្រ រកបាន២គ្រាប់ និង Assist ១គ្រាប់ក្នុងព្រឹត្តិការណ៍ World Cup ២០១៨ នេះ ។ ២គ្រាប់នេះ Modric រកបានដោយស៊ុតប៉េណាល់ទី១គ្រាប់ពេលប្រកួតប៉ះនីហ្សេរីយ៉ា និង១គ្រាប់ទៀតពេលលេងទល់នឹងអាហ្សង់ទីន ។

២-បាល់ប្រាក់ ៖

កីឡាករ Eden Hazard អាយុ២៧ឆ្នាំ ក្រោយរកបាន៣គ្រាប់ និង Assist ១គ្រាប់ ជួយបែលហ្ស៊ិកឡើងដល់វគ្គពាក់កណ្តាលផ្តាច់ព្រ័ត្រ និងដណ្តើមបានចំណាត់ថ្នាក់លេខ៣ផងនោះ ខ្សែប្រយុទ្ធមកពីក្លិបChelsea កីឡាករ Hazard ក៏បានជាប់ឈ្មោះទទួលបានពានរង្វាន់បាល់ប្រាក់ពី FIFA ។

៣-ស្បែកជើងមាស ៖

កីឡាករ Harry Kane អាយុ២៤ឆ្នាំខ្សែប្រយុទ្ធរបស់ក្រុមជម្រើសជាតិអង់គ្លេស Harry Kane ជាប្រធានក្រុមដ៏ឆ្នើមមួយរូបដែលរកបាន៦គ្រាប់លើសគេក្នុងព្រឹត្តិការណ៍ World Cup ២០១៨នេះ ។ ៦គ្រាប់នេះ ខ្សែប្រយុទ្ធមកពីក្លិប Tottenham ខាងលើ រកបានក្នុងជំនួបអង់គ្លេសប៉ះទុយនីស៊ីចំនួន២គ្រាប់ និង៣គ្រាប់ម្នាក់ឯងពេលប៉ះប៉ាណាម៉ា ខណៈ១គ្រាប់ទៀតពេលលេងទល់នឹងកូឡុំប៊ី ។ យ៉ាងណាមិញ គ្រាប់បាល់ទាំងនេះ Kane ធ្វើបានសម្រេចដោយស៊ុតប៉េណាល់ទី៣គ្រាប់ ស៊ុតក្នុងប្រអប់គ្រោះថ្នាក់២គ្រាប់ និងតែត១គ្រាប់ ។

៤-ស្បែកជើងប្រាក់ និងបាល់សំរឹទ្ធ ៖

កីឡាករ Antoine Griezmann អាយុ២៧ឆ្នាំខ្សែប្រយុទ្ធមកពីក្លិប Atletico រូបនេះ
បានដើរតួយ៉ាងសំខាន់នៅក្នុងក្រុមជម្រើសជាតិបារាំងតាំងពីវគ្គចែកពូលមកម៉្លេះ ។ ជាមួយ
នឹងការខិតខំប្រឹងប្រែងកន្លងមក Griezmann រកបាន៤គ្រាប់ ខណៈជ័យជម្នះបារាំងឈ្នះក្រូអាស៊ី៤ទល់២ ក៏តារាឆ្នើមរូបនេះ ស៊ុតបាន១គ្រាប់ផងដែរ ។ Griezmann ចូលរួមលេងជាមួយក្រុមជម្រើសជាតិឆ្នាំ២០១៤ ហើយរហូតមកទល់ពេលនេះ រូបលោកស៊ុតបានចំនួន២៤គ្រាប់ ។

៥-ស្បែកជើងសំរឹទ្ធ ៖

កីឡាករ Romelu Lukaku អាយុ២៥ឆ្នាំខ្សែប្រយុទ្ធស្បែកខ្មៅរបស់ក្រុមជម្រើសជាតិបែលហ្ស៊ិក កីឡាករ Lukaku រកបាន៤គ្រាប់ ក្នុងព្រឹត្តិការណ៍ World Cup រយៈពេល១ខែមកនេះ និងជួយឱ្យក្រុមដែលមានរហស្សនាម “បិសាចក្រហម” ដណ្តើមបានចំណាត់ថ្នាក់លេខ៣ផងដែរ ។ តារាឆ្នើមមកពីក្លិបបិសាចក្រហមរូបនេះ បានចូលរួមជាបែលហ្ស៊ិកកាលពីឆ្នាំ២០១០ ដោយបង្ហាញខ្លួនបាន៧៥ប្រកួត ស៊ុតបាន៤០គ្រាប់ ។

៦-ស្រោមដៃមាស ៖

អ្នកចាំទី Thibaut Courtois អាយុ២៦ឆ្នាំក្នុងការបង្ហាញខ្លួនជាមួយបែលហ្ស៊ិក ចាប់តាំងពីវគ្គចែកពូលដល់វគ្គដណ្តើមចំណាត់ថ្នាក់លេខ៣ អ្នកចាំទីដៃស្អិត Courtois ធ្វើបានយ៉ាងល្អដោយរបូតគ្រាប់បាល់តែ៦គ្រាប់ប៉ុណ្ណោះខណៈបែលហ្ស៊ិករកបាន១៦គ្រាប់ ។ Courtois ដែលបច្ចុប្បន្នលេងនៅក្លិប Chelsea បានចូលរួមជាមួយក្រុមជម្រើសជាតិឈុតធំអំឡុងឆ្នាំ២០១១ និងរហូតមកដល់ពេលនេះ រូបលោកបានបង្ហាញខ្លួនចំនួន៦៥ប្រកួត ។

៧-ពានកីឡាករឆ្នើមវ័យក្មេង ៖

កីឡាករ Kylian Mbappe អាយុ១៩ឆ្នាំខ្សែប្រយុទ្ធវ័យក្មេងរបស់ក្រុមជម្រើសជាតិបារាំងរូបនេះ ពិតជាមានសមត្ថភាពខ្លាំងមិនធម្មតានោះទេ ។ គ្រាប់បាល់ជ័យជម្នះនៅវគ្គផ្តាច់ព្រ័ត្រ ដែលបារាំងឈ្នះក្រូអាស៊ី៤ទល់២ ក៏ Mbappe ស៊ុតបាន១គ្រាប់ផងដែរ ។ ក្នុងការបង្ហាញខ្លួននៅ World Cup ២០១៨ នេះ តារាឆ្នើមមកពីក្លិប Paris SG ខាងលើរកបាន៤គ្រាប់ ធ្វើឱ្យពិភពលោកភ្ញាក់ផ្អើលយ៉ាងខ្លាំងចំពោះសមត្ថភាពដ៏ប៉ិនប្រសប់របស់គេ ។

៨-ពានFair Play ៖

ក្រុមជម្រើសជាតិអេស្ប៉ាញក្រុមជម្រើសជាតិអេស្ប៉ាញ ដែលបាត់បង់ឱកាសតាំងពីវគ្គ១៦ក្រុមមកនោះ ត្រូវបានក្រុមបច្ចេកទេសរបស់ FIFA ប្រគល់ពាន Fair Play បន្ទាប់ពីពួកគេប្រកួតដោយមានឥរិយាបថត្រឹមត្រូវជាងគេនៅលើទីលាន ។ ម្យ៉ាងទៀត អេស្ប៉ាញទទួលបានកាតលឿងតែ២ប៉ុណ្ណោះ ក្នុងចំណោមការប្រកួតទាំង៤លើកនៅ World Cup ៕
ជិន សំអូន