ខេត្តស្វាយរៀង ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រីរដ្ឋមន្ត្រីក្រសួងការពារជាតិនិងលោកជំទាវកិត្តិសង្គហបណ្ឌិត ម៉ែនសំអន ឧបនាយករដ្ឋមន្ត្រីរដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច អញ្ជើញជាគណអធិបតីក្នុងពិធីប្រារព្ធខួបលើកទី២៥ទិវាកងរាជអាវុធហត្ថ១៤កក្កដា ១៩៩៣ និង១៤កក្កដា ២០១៨ និងសម្ភោធដាក់ឲ្យប្រើប្រាស់ជាផ្លូវការទីបញ្ជាការដ្ឋានកងរាជអាវុធហត្ថខេត្តស្វាយរៀងដោយមានការចូលរួមពីសំណាក់តំណាងរាស្ត្រមណ្ឌលស្វាយរៀង លោកនាយឧត្តមសេនីយ៍ ឧត្តមសេនីយ៍ គណប្រតិភូក្រសួងការពារជាតិ កងរាជអាវុធហត្ថលើផ្ទៃប្រទេស មន្ត្រីរាជការ យុវជនសហភាពសហពន្ធ័យុវជនខេត្តជាច្រើនកុះករ ។
ពិធីនេះបានរៀបចំនាព្រឹកថ្ងៃទី១៤ កក្កដា ២០១៨ នៅទីបញ្ជាការដ្ឋានកងរាជអាវុធហត្ថខេត្តស្ថិតនៅភូមិថ្មីសង្កាត់សង្ឃរ័ ក្រុងស្វាយរៀង ។ ក្នុងឱកាសនោះដែរ លោកនាយឧត្តមសេនីយ៍សៅ សុខា អគ្គបញ្ជាការស្តីទីនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេសបានអានសុន្ទរកថានូវប្រវត្តិនៃការបង្កើតកងរាជអាវុធហត្ថថា ដំណើរការវិវត្តន៍ស្ថាប័ន កងរាជអាវុធហត្ថ គឺត្រូវបានបង្កើតឡើងដំបូងនៅឆ្នាំ១៩៥៧ ហើយត្រូវបានប្តូរឈ្មោះ កងរាជអាវុធហត្ថខ្មែរនោះ បើតាមព្រះរាជក្រិត្យលេខ៤៤៦SN និង៤៤៧SN ហើយត្រូវបានប្តូរឈ្មោះមកជាកងរាជអាវុធហត្ថជាតិវិញ នៅឆ្នាំ១៩៧១ នោះ បើតាមក្រិត្យលេខ៥៧៤/ ៧១CE ។
ហើយនៅក្នុងរបបកម្ពុជាប្រជាធិបតេយ្យប៉ុលពត ស្ថាបន័ សង្គមជាតិត្រូវបានលប់ចោល និងបានកាប់សម្លាប់មន្ត្រីរាជការប្រជាពលរដ្ឋយ៉ាងរង្គាលឃោឃៅយង់ឃ្នង ។ លោកបន្តទៀតថា ទើបតែក្រោយថ្ងៃបោះឆ្នោតលើកទី១ ឆ្នាំ១៩៩៣ តាមក្រិត្យចុះថ្ងៃទី១៤ កក្កដា ១៩៩៣ ក្នុងរចនាសម្ពន្ធ័នៃអគ្គសេនាធិការដ្ឋាននោះក៏មានកងអាវុធហត្ថដែរ ។ តាមស្មារតីនៃអនុក្រិត្យនោះកងរាជអាវុធហត្ថបានកំណត់ថ្ងៃទី១៤ កក្កដា ១៩៩៣ ជាទិវាកងរាជអាវុធហត្ថរហូតរៀងមក ។ កងរាជអាវុធហត្ថមានតួនាទី និងភារកិច្ចថែរក្សាការពារសន្តិសុខ សណ្តាប់ធ្នាប់ ជួយសង្គ្រោះប្រជាពលរដ្ឋ ស្រាវជ្រាវ និងបង្ក្រាបបទល្មើសព្រហ្មទណ្ឌទូទៅ ការពារកិត្តិយស និងផលប្រយោជន៍យោធា និងផ្តល់កម្លាំងគាំទ្រ ក្រសួង ស្ថាប័ន ដើម្បីពង្រឹងការអនុវត្តន៍ច្បាប់ ។ មានវិសាលភាពលើផ្ទៃប្រទេសទាំងមូលទៅលើយោធាក្នុងជួរកងទ័ព និងលើពលរដ្ឋស៊ីវិលថែមទៀតផងនេះ ។ ហើយកងរាជអាវុធហត្ថបានចូលរួមអភិវឌ្ឍន៍ផងដែរ ជាក់ស្តែង គឺទីបញ្ជាការដ្ឋាន កងរាជអាវុធហត្ថ ខេត្តស្វាយរៀងដែលកំពុងប្រារព្ធពិធី សម្ពោធដាក់ឲ្យប្រើប្រាស់ជាផ្លូវការនាពេលនេះ ស្របជាមួយថ្ងៃបង្កើតកងរាជអាវុធហត្ថ ហើយក៏ជាសក្ខីភាពបញ្ជាក់ពីការចូលរួមចំណែកក្នុងការអភិវឌ្ឍន៍ប្រទេសកម្ពុជា ក្នុងសម័យតេជោ ជាប្រវត្តិសាស្ត្រផងដែរ ។
ទីបញ្ជាការដ្ឋានកងរាជអាវុធហត្ថខេត្តស្វាយរៀងមានផ្ទៃដីសរុប២៨,៩៤៣ម៉ែត្រការ៉េបានសាងសង់អាគាររួចរាល់ជាស្ថាពរនៅថ្ងៃទី០៩ កក្កដា ២០១៨ ចំណាយថវិកាសរុ៩,៥៣២, ៦២២,៧០០រៀល ។ ដែលកសាងហេដ្ឋារចនាសម្ពន្ធ័ក្នុងទីបញ្ជាការរួមមាន កសាងអាគារសេនាធិការ០១ខ្នង កម្ពស់៣ជាន់ ទទឹង១១ម៉ែត្រ បណ្តោយ៥៦ម៉ែត្រ អាគារស្នាក់នៅ ១ខ្នង កម្ពស់៤ជាន់ទទឹង៩ម៉ែត្រ បណ្តោយ៥៦ម៉ែត្រ ។ របងជុំវិញបន្ទាយ៧៦៦ម៉ែត្រកម្ពស់២,៥០ម៉ ទ្វារបង២ និងប៉ុស្ត៍យាមប្រចាំការចំនួន២ខ្នង និងគ្រុឌ១ ។
សម្តេចពិជ័យសេនា ទៀ បាញ់ ឧបនាយករដ្ឋមន្ត្រីរដ្ឋមន្ត្រីក្រសួងការពារជាតិបានថ្លែងកោតសរសើរ និងវាយតម្លៃខ្ពស់ដល់នាយទាហ៊ានកងយោធពលខេមរភូមិន្ទបានធ្វើការ ដើម្បីបុព្វហេតុជាតិមាតុភូមិ ការពារសន្តិសុខសណ្តាប់ធ្នាប់បានល្អ ឲ្យសង្គមជាតិមានសុខសន្តិភាព ។ សម្តេចពិជ័យសេនាទៀបាញ់ក៏បានលើកឡើងដែរថា ភាពជោគជ័យ២៥ឆ្នាំ នៃកងរាជអាវុធហត្ថក៏មានការកែទម្រង់រៀបចំ ក្រោយពេលបោះឆ្នោតដំបូងឆ្នាំ១៩៩៣ ដោយមានវីរៈបុរស នាយទាហ៊ានចាស់ៗ ដែលជានាយកទាហានជាន់ខ្ពស់ និងអ្នកឧកញ៉ាចក្រី ញ៉ឹក យូឡុង ជួយរៀបចំអនុក្រិត្យឋានន្តរសក្តិយកតាមម៉ូដែលបារាំង ហើយបារាំងបានបញ្ជូនបេសកជនមកជួយរៀបចំដែរ មានរចនាសម្ព័ន្ធល្អប្រសើររហូតដល់បច្ចុប្បន្ន ។
ដើម្បីមន្ត្រីកងរាជអាវុធហត្ថបំពេញតួនាទីភារកិច្ចជាមន្ត្រីនគរបាលយុត្តិធម៌បាន គឺក្រសួងការពារជាតិ និងក្រសួងយុត្តិធម៌ បានចុះហត្ថលេខាជាមួយគ្នាទើបមន្ត្រីកងរាជអាវុធហត្ថទៅជាមន្ត្រីយុត្តិធម៌ ដូច្នេះត្រូវតែបន្ត បេសកកម្មពង្រឹងការអនុវត្តន៍ច្បាប់ជូនសង្គមជាតិឲ្យមានប្រសិទ្ធភាព ជាពិសេសចូលរួមការការពារសន្តិសុខសណ្តាប់ធ្នាប់ ក្នុងពេលដំណើរការឃោសនាបោះឆ្នោតពេលបោះឆ្នោតថ្ងៃ២៩កក្កដា ២០១៨ ខាងមុខនេះ ៕
ចែករំលែកព័តមាននេះ