រាជធានីភ្នំពេញ ៖ មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទូទាំងប្រទេសបាននាំគ្នាធ្វើពិធីវាយស្គរ វាយជួង គ្រវីទង់ជាតិ និងច្រៀងបទពង្សាវតាខ្មែរ ដើម្បីអបអរសាទរខួប១០ឆ្នាំនៃប្រាសាទព្រះវិហារ និងខួប១ឆ្នាំនៃប្រាសាទសំបូរព្រៃគុកត្រូវបានគណៈកម្មធិការបេតិកភណ្ឌពិភពលោកនៃអង្គការ…
រាជធានីភ្នំពេញ ៖ មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទូទាំងប្រទេសបាននាំគ្នាធ្វើពិធីវាយស្គរ វាយជួង គ្រវីទង់ជាតិ និងច្រៀងបទពង្សាវតាខ្មែរ ដើម្បីអបអរសាទរខួប១០ឆ្នាំនៃប្រាសាទព្រះវិហារ និងខួប១ឆ្នាំនៃប្រាសាទសំបូរព្រៃគុកត្រូវបានគណៈកម្មធិការបេតិកភណ្ឌពិភពលោកនៃអង្គការ ដើម្បីវប្បធម៌វិទ្សាសាស្ត្រ និងអប់រំរបស់អង្គការសហប្រជាជាតិយូនីស្កូ បានសម្រេចចុះតំបន់ប្រសាទសំបូរព្រៃគុក ចូលក្នុងបញ្ជីបេតិកភ័ណ្ឌពិភពលោក ក្នុងកិច្ចប្រជុំលើកទី៤១ របស់ខ្លួននៅប្រទេសប៉ូឡូញ តាមសំណើររបស់រាជរដ្ឋាភិបាលកម្ពជា សម្រាប់រាជធានីភ្នំពេញបានប្រារព្ធព្រឹត្តិការណ៍នេះ នៅពហុកីឡាដ្ឋានជាតិអូឡាំពិក នាថ្ងៃទី១៥ ខែកក្កដា ស្ថិតក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជាទៀតផង ។
ក្រៅពីព្រឹត្តិការណ៍ប្រារព្ធពិធីនៅពហុកីឡាដ្ឋានជាតិអូឡាំពិកនោះសម្រាប់មន្ត្រីរាជការ កងកម្លាំងប្រដាប់អាវុធ ក្រោមឱវាទរដ្ឋបាលរាជធានីភ្នំពេញ និងប្រជាពលរដ្ឋជាច្រើនរូបទៀត ដែលដឹកនាំដោយលោក ម៉ប់ សារិ ប្រធានក្រុមប្រឹក្សា និងលោក ឃួង ស្រេង អភិបាលរាជធានីភ្នំពេញបាននាំគ្នាធ្វើពិធីវាយស្គរ វាយជួង គ្រវីទង់ជាតិ និងច្រៀងបទពង្សាវតាខ្មែរ ដើម្បីចូលរួមអបអរសាទរខួប១០ឆ្នាំនៃប្រាសាទព្រះវិហារ និងខួប១ឆ្នាំ នៃប្រាសាទសំបូរព្រៃគុក ដែលត្រូវបានដាក់បញ្ចូលក្នុងបញ្ជីបេតិកភ័ណ្ឌពិភពលោកផងដែរ ។
លោក ឃួង ស្រេង អភិបាលរាជធានីភ្នំពេញបានឲ្យដឹងថា ដើម្បីចូលរួមអបអរសាទរនូវព្រឹត្តិការណ៍ជាប្រវត្តិសាស្ត្រនេះក្នុងនាមក្រុមប្រឹក្សា គណៈអភិបាល មន្ត្រីរាជ ការកងកម្លាំង និងប្រជាពលរដ្ឋទាំងអស់រស់នៅរាជធានីភ្នំពេញ សូមអបអរសាទរចំពោះព្រឹត្តិការណ៍ដ៏សំខាន់នេះ តាមរយៈស្នូរទូងស្គរជាសញ្ញា ។ លោកបានបញ្ជាក់ថា ការសម្រេចរបស់គណៈកម្មការបេតិកភណ្ឌពិភពលោក គឺជាមោទនភាពជាតិដ៏ធំធេងដែលកើតចេញពីការខិតខំប្រឹងប្រែងរបស់រាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំប្រកបដោយគតិបណ្ឌិតតែងតែយកចិត្តទុកដាក់លើកកិត្តិយសជាតិលើឆាកអន្តរជាតិ ក៏ដូចជា ឆ្លុះបញ្ចាំងពីការខិតខំប្រឹងប្រែងរបស់រាជរដ្ឋាភិបាល ក្នុងការគ្រប់គ្រង ការងារអភិរក្ស និងអភិវឌ្ឍន៍បេតិកភណ្ឌប្រកបដោយចីរភាពតែម្តង ។ ការដាក់បញ្ចូលតំបន់ប្រវត្តិសាស្ត្រចូលក្នុងបញ្ជីសម្បត្តិបេតិកភណ្ឌពិភពនឹងរឹតតែជំរុញការយកចិត្តទុកដាក់អំពីតម្លៃជាប្រវត្តិសាស្ត្រនៃប្រាសាទទាំងនោះ និងបន្តថែរក្សាតំបន់នេះឲ្យបានខ្ជាប់ខ្ជួនសម្រាប់កូនចៅជំនាន់ក្រោយ ។
ក្នុងសន្និសីទការសែតកាលពីពេលថ្មីៗនេះ ឯកឧត្តម ជុច ភឿន រដ្ឋលេខាធិការក្រសួងវប្បធម៌ និងវិចិត្រសិល្បៈបានឱ្យដឹងថា រាជរដ្ឋាភិបាលកម្ពុជាបានសម្រេចយកថ្ងៃទី១៥ ខែកក្កដា ជារៀងរាល់ឆ្នាំ ដើម្បីធ្វើពិធីរំលឹក និងអបអរនៃការដាក់បញ្ជូលប្រាសាទទាំងពីរនេះក្នុងបញ្ជីបេតិកភណ្ឌពិភពលោក ។ ព្រឹត្តិការណ៍នេះមិនត្រឹមតែបង្ហាញអំពីភាពថ្កុំថ្កើងរុងរឿង និងភាពសុខដុមរមនារបស់អាណាចក្រខ្មែរនាសម័យមហានគរប៉ុណ្ណោះទេ ប៉ុន្តែក៏ដើម្បីក្រើនរំលឹក និងបំផុសស្មារតីឱ្យប្រជាពលរដ្ឋផងដែរ ។ ទាក់ទិន្នទៅនឹងព្រឹត្តិការណ៍ខាងលើនេះរាជរដ្ឋាភិបាលកម្ពុជាក៏បានចេញសារាចរណ៍ណែនាំឲ្យក្រសួងស្ថាប័ន និងអាជ្ញាធរពាក់ព័ន្ធត្រូវសហការគ្នា ដើម្បីឱ្យការប្រារព្ធព្រឹត្តិការណ៍វប្បធម៌ជាតិនេះឱ្យបានអធិអធមដែលបានបង្ហាញតម្លៃលេចធ្លោជាសកលនៃបេតិកភណ្ឌវប្បធម៌ជាតិទាំងពីរនេះព្រមទាំងបានណែនាំឱ្យនៅតាមក្រសួង ស្ថាប័ន រោងចក្រសហគ្រាស និងគ្រប់លំនៅដ្ឋានរបស់ប្រជាពលរដ្ឋត្រូវលើកទង់ជាតិ ទង់ជ្វាលាបដា ពាក្យស្លោក បិទគំនូរផ្សាយតាមដងផ្លូវសាធារណៈ ទីលានសាធារណៈ ចាប់ពីថ្ងៃទី១៤-១៥ ខែកក្កដានេះផងដែរ ។
យោងតាមរបាយការណ៍ពីអាជ្ញាធរជាតិព្រះវិហារបានឱ្យដឹងថា ក្នុងមួយឆ្នាំប្រាសាទព្រះវិហារទទួលបានទេសចរណ៍សរុបជាង១៥ម៉ឺននាក់ ក្នុងនោះទេសចរណ៍អន្តរជាតិជាង២ម៉ឺននាក់ ។
ចំណែកអាជ្ញាធរជាតិ សម្បូរព្រៃគុក បានឱ្យដឹងដែរថា ក្រោយពីប្រាសាទសម្បូរព្រៃគុកចុះក្នុងបញ្ជីបេតិកភណ្ឌពិភពលោក គឺកំណើនភ្ញៀវទេសចរណ៍មានការកើនឡើងទ្វេដង ក្នុងនោះទេសចរអន្តរជាតិ កើនឡើងដល់៧៥ភាគរយ បើគិតចាប់ពីពាក់កណ្តាលឆ្នាំ២០១៧ ដល់ពាក់កណ្តាលឆ្នាំ២០១៨នេះ ។
គួររំលឹកថា ប្រាសាទព្រះវិហារ ត្រូវបានអង្គការយូណេស្កូ សម្រេចចុះក្នុងបញ្ជីបេតិកភណ្ឌពិភពលោក នៅថ្ងៃទី៧ ខែកក្កដា ឆ្នាំ២០០៨ ។ ចំណែកប្រាសាទសំបូរព្រៃគុក គឺជាបេតិកភ័ណ្ឌខ្មែរទី៣ ត្រូវបានចុះក្នុងបញ្ជីនៅថ្ងៃទី៨ ខែកក្កដា ឆ្នាំ២០១៧ និងតំបន់ប្រសាទអង្គរ ត្រូវបានបញ្ចូលក្នុងបេតិកភ័ណ្ឌពីភព លោកកាលពីឆ្នាំ១៩៩២ បន្ទាប់ពីវិនិច្ឆ័យទៅលើលក្ខណៈសម្បត្តិដូជា ភាពល្អឯកនៃតួប្រាសាទ អាយុកាលនៃប្រាសាទ រចនាបថតួប្រាសាទ និងគុណតម្លៃនៃភាពលេចធ្លោជាដើម ៕
ចែករំលែកព័តមាននេះ