រាជធានីភ្នំពេញ ៖ បុរសជាជនសង្ស័យថាជាចោរលួចខ្សែរភ្លើងរបស់គេនៅក្នុងការដ្ឋានសំណង់មួយកន្លែង នៅក្នុងទីក្រុងកោះពេជ្រ ដែលត្រូវបានកម្លាំងមានសមត្ថកិច្ចចាប់ឃាត់ខ្លួនកាលពីវេលាម៉ោង១២ និង ៣០នាទីថ្ងៃត្រង់ ថ្ងៃទី១០ ខែកក្កដា ឆ្នាំ២០១៨ ម្សិលមិញនោះ។
ពេលនេះបុរសម្នាក់នោះត្រូវកម្លាំង នគរបាល ខណ្ឌចម្ការមន បានធ្វើការដោះលែងឱ្យមានសេរីភាពវិញហើយ ក្រោយពីគេបានឃើញស្ត្រី ជាប្រពន្ធបីកូនតូចអាយុ២ខែម្នាក់ និងដៃម្ខាងដឹកដៃកូនស្រីអាយុ៤ឆ្នាំម្នាក់ទៀតមកយំអង្វរ ឲ្យធ្វើការដោះលែងប្តីរបស់ខ្លួនវិញនោះ។ តាមប្រភពព័ត៌មានពីមន្ត្រីនគរបាលខណ្ឌចម្ការមនម្នាក់ បានប្រាប់ឱ្យដឹងថា បុរសជាជនសង្ស័យដែលបានលួចខ្សែភ្លើង របស់គេម្នាក់ដែលត្រូវបានកម្លាំង សន្តិសុខកោះពេជ្រចាប់ប្រគល់ឲ្យនគរបាលប៉ុស្តិ៍ទន្លេបាសាក់ និងបញ្ជូនបន្តមកកាន់អធិការនគរបាល ខណ្ឌចម្ការមននោះ នាពេលនេះដែរត្រូវបានធ្វើការដោះលែងឲ្យមានសេរីភាព និងវិលត្រឡប់ទៅផ្ទះ វិញហើយ។
ក្រោយពីកម្លាំងមានសម្ថកិច្ចរបស់លោកធ្វើការចាប់ឃាត់ខ្លួន និង បញ្ជូនមកកាន់អធិការដ្ឋាន ខណ្ឌចម្ការមន កាលពីថ្ងៃម្សិលមិញនោះ និងមើលឃើញស្ត្រីជាប្រពន្ធម្នាក់់មានកូនតូចបីនឹងដៃ និង មានកូនស្រីម្នាក់មកជាមួយផងដែរនោះ ដោយក្តីអាណិតអាសូរខ្លាំងពេក។ ម្ចាស់ខាងការដ្ឋានសំណង់ ក៏បានមកសុំដកពាក្យបណ្តឹង ដែលបានចោទប្រកាន់ ទៅលើបុរសម្នាក់ខាងលើវិញ ហើយកម្លាំង នគរបាល ខណ្ឌចម្ការមនក៏បានឆ្លងយោបល់អំពីសំណាក់ ព្រះរាជអាជ្ញារបស់សាលាដំបូងរាជធានីភ្នំពេញ ដោយគ្រាន់តែធ្វើការណែនាំ និងអប់រំទើបធ្វើការដោះលែងឲ្យមានសេរីភាពវិញនាល្ងាចថ្ងៃដដែលនោះ។
លោកក៏បានប្រាប់បន្តទៀតថា បុរសជាជនសង្ស័យម្នាក់ខាងលើមានឈ្មោះ ម៉ន សារ៉ាន អាយុ២៥ឆ្នាំ មានប្រពន្ធ និងកូនប្រុស ស្រី សរុបចំនួន៣នាក់ឯណោះ ដោយកូនទី១មានអាយុ១០ឆ្នាំ កូនទី២-មានអាយុ៤ឆ្នាំ និងកូនទី៣ទើបតែកើតបាន២ខែប៉ុណ្ណោះ ពួកគេមានទៅនៅខាងប្រពន្ធនៅឯស្រុកកោះធំ ខេត្តកណ្តាលឯណោះ៕
https://youtu.be/_03lYnctTJc
ចែករំលែកព័តមាននេះ